20-Feb-2022

ଗୁଡଭେଲା,(ପ୍ରେରଣା ଖବର) ଗୁଡ଼ଭେଳା ବ୍ଳକର  ୬ ନମ୍ବର ଜୋନରେ ଆସନ୍ତା ୨୨ ତାରିଖ ରେ ହେବାକୁ ଥିବା ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ଭାଜପା,କଂଗ୍ରେସ ଓ ବିଜେଡ଼ି ମଧ୍ୟରେ ଜୋରଦାର ଲଢ଼େଇ ହେବାର ସମ୍ଭାବନା ରହିଛି । ଏହି ବ୍ଳକର ବିରାମୁଣ୍ଡା. ଘୂନା, ଗୁଡ଼ଭେଲା, ଜାମୁଟ, ମାଢ଼େକେଲା, ତେନ୍ତୁଳିଖୁଣ୍ଟି,ଦେଉଳଗୁଡ଼ି ଓ ଗମ୍ଭାରୀଗୁଡ଼ା ପଞ୍ଚାୟତକୁ ନେଇ ୬ ନମ୍ବର ଜୋନ ଗଠିତ ହୋଇଥିବା ବେଳେ ମୋଟ ୩୧୧୯୦ ଜଣ ଭୋଟର ରହିଛନ୍ତି । ଏହି ଜୋନରୁ କଂଗ୍ରେସ ପକ୍ଷରୁ ଗଦିରାମ ସୁନା,ବିଜେଡ଼ିରୁ ନିବାଶ ଅଗ୍ରୱାଳ ଓ ବିଜେପିରୁ ମୁରଳୀ ରଣା ପ୍ରାର୍ଥିଭାବେ ନିର୍ବାଚନରେ ଛିଡ଼ା ହୋଇଛନ୍ତି । ବିଜେଡ଼ି ନବୀନ ସରକାରଙ୍କ ୨୧ ବର୍ଷ ର ସୁଶାସନକୁ ନେଇ ଭୋଟ ଭିକ୍ଷା କରୁଥିବାବେଳେ ଭାଜପା କେନ୍ଦ୍ର ସରକାର ମୋଦୀଜୀଙ୍କ ମୁଦ୍ରା ବିମୁଦ୍ରୀକରଣ,ସ୍ୱଚ୍ଛଭାରତ ଅଭିଯାନ ,ଗରିବ୍‌ଙ୍କୁ ସୂଲଭ ମୂଲ୍ୟରେ ଗ୍ୟାସ ଯୋଗାଣ ଆଦି  ବିଭିନ୍ନ ଜନହିତକାରୀ ଯୋଜନା ଗୁଡ଼ିକକୁ ଉପସ୍ଥାପନା କରି ଭୋଟରଙ୍କ ପାଖକୁ ଯାଉଛନ୍ତି । ସେହିପରି କଂଗ୍ରେସ ରାଜ୍ୟ ଓ କେନ୍ଦ୍ର ସରକାରଙ୍କ ବିଫଳତାକୁ ନେଇ ଲୋକମାନଙ୍କ ପାଖରେ ପହଞô୍ଚ ବୁଝାଇ ନିଜ ସପକ୍ଷରେ ଭୋଟରଙ୍କୁ ଆକୃଷ୍ଟ କରିବାରେ ଲାଗିଛନ୍ତି । ଏହି ଜୋନରେ ଗତ ୧୯୯୭ ମସିହାରୁ  ଜିଳ୍ଳାପରିଷଦ ନିର୍ବାଚନ କୁ ଦେଖାଗଲେ ୬ ନମ୍ବର ଜୋନରୁ ୧୯୯୭ ରେ ଜନତା ଦଳ ରୁ ଅରୁଣ ପ୍ରଧାନ,୨୦୦୨ରେ ବିଜେପିରୁ କମଳା ନନ୍ଦ ,୨୦୦୭ରେ କଂଗ୍ରେସର ଘନଶ୍ୟାମ ପ୍ରଧାନୀ,୨୦୧୨ରେ ବିଜେଡ଼ିର ଅଶୋକ ଦୋରା ଓ ୨୦୧୭ରେ ଭାଜପାର କଳ୍ପନା ପ୍ରଧାନୀ ନିର୍ବାଚିତ ହୋଇଥିଲେ ।  ବର୍ତ୍ତମାନ ଭାଜପାର ମହେନ୍ଦ୍ର ଠାକୁର ଓ କଂଗ୍ରେସ ଦଳର ପୂର୍ବତନ ମନ୍ତ୍ରୀ ସୁରେନ୍ଦ୍ର ସିଂଭୋଇ ନିର୍ବାଚନ ପ୍ରଚାର ମଙ୍ଗ ଧରିଥିବା ବେଳେ ଟିଟିଲାଗଡ଼ ବିଧାୟିକା ତଥା ରାଝ୍ୟ ମହିଳା ଓ ଶିଶୁ ବିକାଶ ଏବଂ ମିଶନ ଶକ୍ତି ମନ୍ତ୍ରୀ ଟୁକୁନୀ ସାହୁ ଏହି ନିର୍ବାଚନରରେ ଦଳର ମଙ୍ଗ ଧରିଥିବା ସହ ନିର୍ବାଚନ ପ୍ରଚାରରେ ସର୍ବାଗ୍ରେ ରହିଛନ୍ତି । ବିଜେଡ଼ି ପୁଣି ଏହି ଜୋନକୁ ନିଜ ଅକ୍ତିଆର କରିବାକୁ ପ୍ରାଣମୁର୍ଚ୍ଚା ଉଦ୍ୟମ ଚଲେଇଥିବା ବେଳେ କଂଗ୍ରେସ ନିଜ ଗଡ଼ ପୁଣି ଥରେ ଫେରି ପାଇବା ପାଇଁ ରଣନୀତି ପ୍ରସ୍ତୁତ କରୁଥିବା  ଜଣାପଡ଼ିଛି । ଅନ୍ୟ ପକ୍ଷରେ ପୁଣି ଥରେ ଏହି ଜୋନକୁ ନିଜ ଅକ୍ତିଆରରେ ରଖିବା ପାଇଁ ଭାଜପା ପକ୍ଷରୁ ଜୋରଦାର ପ୍ରଚାର ଚାଳିଛି ।