19-Feb-2022

ବଲାଙ୍ଗୀର: (ମଳୟ ମିଶ୍ରଙ୍କ ରିପୋର୍ଟ ) ଚଳିତ ତ୍ରିସ୍ତରୀୟ ପଞ୍ଚାୟତ ନିର୍ବାଚନର ଗତକାଲି ଦ୍ବିତୀୟପର୍ଯ୍ୟାୟର ଭୋଟଗ୍ରହଣ ସରିଛି । ଆଉ ତିନୋଟି ପର୍ଯ୍ୟାୟ ବାକି ଅଛି । ତେବେ ମୁକ୍ତ ଓ ଅବାଧ ନିର୍ବାଚନ କୁହାଯାଉଥିବା ଏହି ନିର୍ବାଚନରେ ଅବାଧରେ ଭୋଟରଙ୍କୁ ଟଙ୍କାବଣ୍ଟା ଓ ଗାଁ' ଗାଁ'ରେ ଖୋଲାଖୋଲି ମଦମାଂସର ଭୋଜିଭାତ ଚାଲିଛି । ଟଙ୍କାବଣ୍ଟା ଧରା ବି ପଡିଲାଣି ଓ ଶାସକଦଳର ବିଧାୟକଙ୍କ ଲୋକଠାରୁ ସରକାରୀ କର୍ମଚାରୀ ଓ ପୁଲିସ୍ କର୍ମଚାରୀମାନଙ୍କ ପର୍ଯ୍ୟନ୍ତ ଅଭିଯୋଗ ହେଲାଣି । ବଙ୍ଗୋମୁଣ୍ଡା ବ୍ଲକ୍ ର ଢଣେ ସରପଞ୍ଚଙ୍କ ସ୍ବାମୀ , ପୁଇଁତଳା ବ୍ଲକ୍ ର ଜଣେ ଶିକ୍ଷକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିବା ଜଣାପଡିଥିବା ସହ ମୁରିହାହାଲ ବ୍ଲକ୍ ର ଜଣେ ପଞ୍ଚାୟତ ପିଇଓ ଏବଂ ପାଟଣାଗଡ ଅଞ୍ଚଳରେ ବିଧାୟକଙ୍କ ଭାଇ , ନୋମିନୀ ଓ ପିଏସଓଙ୍କ ସମେତ ଧରାପଡିଥିବା ଅଭିଯୋଗ ପ୍ରକାଶ ପାଇଥିଲେ ହେଁ , ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିବା ଜଣାଯାଇନାହିଁ ।

ତେବେ ପ୍ରାୟ ସର୍ବତ୍ର ଭୋଟରଙ୍କୁ ଟଙ୍କା , ଶାଢୀ ଓ ଅନ୍ୟାନ୍ୟ ସାମଗ୍ରୀ ବଣ୍ଟାଯାଉଥିବା ଦେଖାଯାଉଛି । ଦୁଇତିନିଶହରୁ ହଜାରେଟଙ୍କା ପର୍ଯ୍ୟନ୍ତ ସଭ୍ୟ ଓ ସରପଞ୍ଚପ୍ରାର୍ଥୀମାନେ ଭୋଟର ପିଛା ବାଣ୍ଟୁଥିବା ନଗ୍ନସତ୍ୟ । ତଥାପି ନିର୍ବାଚନ କଟକଣା ଦାୟିତ୍ୱରେ ଥିବା ପୁଲିସ୍ ବା ପ୍ରଶାସନ ଏ ଦିଗରେ କୌଣସି ପଦକ୍ଷେପ ନେଉନାହାଁନ୍ତି !  ହୁଏତ ଏହା ସେମାନଙ୍କ ନଜରରେ ପଡିପାରୁନାହିଁ ।ଆଗାମୀକାଲି ହେବାକୁ ଥିବା ତୃତୀୟପର୍ଯ୍ୟାୟର ତୁରେକେଲା ,

ମୁରିହାହାଲ ଓ ବଙ୍ଗୋମୁଣ୍ଡା ଆଦି ତିନୋଟି ବ୍ଲକ୍ ରେ ଭୋଟଗ୍ରହଣ ପୂର୍ବରୁ ଟଙ୍କାବଣ୍ଟା ଚାଲିଛି । ମଦମାଂସର ଆସର ବି ଜମିଛି । ସବୁରାଜନୈତିକଦଳ ଓ ପ୍ରାର୍ଥୀଙ୍କ ପକ୍ଷରୁ ଏଭଳି ଭୋଟରଙ୍କୁ ପ୍ରଭାବିତ କରିବାର ଅପଚେଷ୍ଟା ଜାରୀ ରହିଛି ।  ତେବେ ଏହା ପ୍ରକୃତରେ ଭୋଟରଙ୍କୁ ପ୍ରଭାବିତ କରୁଛି କି ବୋଲି ପଚରାଉଚୁରାରୁ ସେହି ଅଞ୍ଚଳର  ଲୋକେ କହନ୍ତି ଯେ , ' ନା । ଲୋକେ ବହୁତ ଚାଲାକ୍ ହେଲେଣି । ସେମାନେ ବି ସ୍ପଚ୍ଛ ନିର୍ବାଚନ ଓ ଶାସନର ପକ୍ଷପାତୀ । ସେମାନେ ଜାଣନ୍ତି , କେଉଁ ପ୍ରାର୍ଥୀ କିଭଳି ଦୁର୍ନୀତି ଓ ବାଟମାରଣାରେ ଜଡିତ । ତେଣୁ ପଇସା ଖାଇଦେଇ , ସେମାନେ ଠିକ୍ ଲୋକଙ୍କୁ ତାଙ୍କ ଭୋଟ୍ ଟିକୁ ଦେବେ । ଆଜିକାଲି କିଏ କାହାକୁ ଡରନ୍ତି ନାହିଁ । " ଏଣୁ ଯଦି ଲୋକଙ୍କର ଏ ଆକଳନ ସତ୍ୟ ହୁଏ , ତେବେ ଚିନ୍ତା କରିବାର କିଛି ନାହିଁ । ତଥାପି  କେତେକାଂଶରେ ଟଙ୍କା ଓ ମଦମାଂସର କୁପ୍ରଭାବ ପଡିବ ବୋଲି କୁହାଯାଉଛି । କାରଣ ହାରିଗଲେ , କେତେକ ପ୍ରାର୍ଥୀ ବୁଲି ବୁଲି ଡରାଇ ଧମକଚମକ ଦେଇ ବାଣ୍ଟୁଥିବା ପଇସା ଅସୁଲ କରିବାର ପୂର୍ବ ନଜିର୍ ମଧ୍ୟ ରହିଛି ।

ତେବେ ଚଳିତ ପଞ୍ଚାୟତନିର୍ବାଚନରେ ଅବାଧ ଟଙ୍କା ଓ ମଦ ବଣ୍ଟା ସତ୍ତ୍ୱେ , ବାଣ୍ଟୁଥିବା ପ୍ରାର୍ଥୀମାନେ ଭୋଟରଙ୍କଠାରୁ ଅଧିକ ପ୍ରତାରଣାର ଶିକାର ହେବାର ସମ୍ଭାବନା ଉପୁଜୁଛି ।