17-Feb-2022

ବଲାଙ୍ଗୀର (ମଳୟ ମିଶ୍ରଙ୍କ ରିପୋର୍ଟ ) ଗତକାଲି ସରିଛି ଚଳିତ ତ୍ରିସ୍ତରୀୟ ପଞ୍ଚାୟତ ନିର୍ବାଚନର ଗୋଟିଏ ଦିନର ଭୋଟଗ୍ରହଣ । ବଲାଙ୍ଗୀର ଜିଲ୍ଲାର ପାଟଣାଗଡ , ବେଲପଡା ଓ ଖପ୍ରାଖୋଲ ତିନୋଟି ବ୍ଲକ୍ ର ପ୍ରଥମ ପର୍ଯ୍ୟାୟ ଭୋଟଗ୍ରହଣର ପର୍ସେଣ୍ଟେଜ୍ କୁ ଦେଖିଲେ , ଚଳିତବର୍ଷ ଏସବୁ ଅଞ୍ଚଳରୁ ଗାଁ'ଗଣ୍ଡା ଶୂନ୍ୟକରି ବାହାରକୁ ପଳାଇଥିବା ଦାଦନଶ୍ରମିକ ପରିବାରର ଭୋଟରଙ୍କ ଅନୁପସ୍ଥିତି ସତ୍ତ୍ୱେ ଭୋଟ୍ ପର୍ସେଣ୍ଟେଜ୍ ଆଶ୍ଚର୍ଯ୍ୟଜନକ !  

ପାଟଣାଗଡ ବ୍ଲକ୍ ରେ ୯୮୯୬୩ ଭୋଟରଙ୍କ ମଧ୍ୟରୁ ୪୦୪୭୭ ପୁରୁଷ ଓ ୩୯୦୧୭ ମହିଳାଙ୍କ ମତଦାନ ୮୦ .୩୩ , ବେଲପଡା ବ୍ଲକ୍ ରେ ୯୩୮୧୫ ମୋଟ ଭୋଟରଙ୍କ ମଧ୍ୟରୁ ୬୦୬୭୫ ମତଦାନ ୬୪. ୬୬ ଏବଂ ଖପ୍ରାଖୋଲ ବ୍ଲକ୍ ରେ ୭୯୫୪୦ ବା ୭୧ . ୧୫ ପ୍ରତିଶତ ମତଦାନ ହୋଇଥିବା ପ୍ରକାଶ । 

ତେବେ ଏଠି ପ୍ରଶ୍ନ ଉଠିବା ସ୍ବାଭାବିକ ଯେ ଏତେ ଭୋଟର ଆସିଲେ କେଉଁଠୁ  ? ଅବଶ୍ୟ ରାଜ୍ୟ ଭିତରେ ଅନ୍ୟତ୍ର ଯାଇଥିବା ଦାଦନଶ୍ରମିକ ଭୋଟରମାନେ ଭୋଟଦେବାକୁ ଆସିଥିବା ବା ସେମାନଙ୍କୁ ଅଣାଯାଇଥିବା ଦେଖାଯାଇଥିଲା । 

ଭାତହାଣ୍ଡିରୁ ଗୋଟିଏ ଭାତ ଚିପି ଅନୁମାନ କଲେ ଜଣାପଡିବା ପରି ଆଗାମୀକାଲିଠାରୁ ବାକିଥିବା ଆଉ ଚରୋଟି ପର୍ଯ୍ୟାୟର ଫଳାଫଳ ଆପାତତଃ ଏହିପରି ହେବାର ସମ୍ଭାବନା ରହିଛି ।  ଦାଦନଶ୍ରମିକଭୋଟରମାନେ ନିଜ  ସାମ୍ବିଧାନିକ ଅଧିକାର ସାବ୍ୟସ୍ତ କରିବାକୁ ଭୋଟଦେବାକୁ ଆସୁଥିବା ଗଣତନ୍ତ୍ର ପାଇଁ ଏକ ଶୁଭଲକ୍ଷଣ ହୋଇଥିବାବେଳେ , ଭୋଟଗ୍ରହଣରେ କୌଣସି ଅବାଞ୍ଛିତ ଆଶଙ୍କାକୁ ଜଗିବା ଏକ ବଡ ସମସ୍ୟା ।