11-Dec-2021

ସିନ୍ଧେକେଲା (ଅନିଲ ତ୍ରିପାଠୀ ): ଦୁଇମାସ ତଳେ ଠିକ ଅକ୍ଟୋବର ୮ ତାରିଖରୁ ମହାଲିଙ୍ଗ ସନସାଇନ ପବ୍ଲିକ ସ୍କୁଲର ଶିକ୍ଷୟିତ୍ରୀ ମମିତା ମେହେରଙ୍କ ନିଖୋଜ ହୋଇଥିବା ରିପୋର୍ଟ ସିନ୍ଧେକେଲା ଥାନାରେ ପରିବାର ପକ୍ଷରୁ ଅଭିଯୋଗ କରା ଯାଇଥିଲା। ମମିତା ମିଷ୍ଟ୍ରି ରାଜ୍ଯ ତଥା ଦେଶରେ ଏକ ବହୁଚର୍ଚ୍ଚିତ ମାମଲା ପାଳଟି ଯାଇଛି । ବର୍ତ୍ତମାନ ପର୍ଯ୍ୟନ୍ତ ମମିତା ମିଷ୍ଟ୍ରିକୁ ନେଇ ରାଜଧାନୀ ଉଠପଡ ହେଉଥିବା ବେଳେ ଠିକ ଦୁଇମାସ ପରେ ଡିସେମ୍ବର ୯ ତାରିଖ ଭବାନିପାଟଣା - ରାଇପୁର ୧୬ ନମ୍ବର ରାଜ୍ଯ ରାଜପଥ କଡରେ ଥିବା ଶୁଣ୍ଢିମୁଣ୍ଡା ପ୍ରାଥମିକ ବିଦ୍ୟାଳୟ ଭିତରୁ ଏକ ୨୦ ରୁ ୩୦ ବର୍ଷର ଯୁବତୀ ଙ୍କ ଗଳିତ ଶବ ଉଦ୍ଧାର ହେବା ଅଞ୍ଚଳରେ ଆଳୋଡନ ସୃଷ୍ଟି କରିଛି । ତେବେ ଜିଲ୍ଲା ପୋଲିସ ବି ସତର୍କତା ଅବଲମ୍ବନ କରିବା ସହିତ ଟିଟିଲାଗଡ ଏସଡିପିଓ ଙ୍କ ସହ ବିଭିନ୍ନ ଥାନାର ଆଇଆଇସି ,  ଦୁଇ ସେକ୍ସନ ପୋଲିସ ଫୋର୍ସ ମୁତୟନ ରହି ଶବର ପଞ୍ଚନାମା କରୁଥିବା ଦେଖାଯଇଛି। ଏହି ଯୁବତୀ ଜଣକ କିଏ ,କିଭଳି ଭାବରେ ସ୍କୁଲ ଭିତରକୁ ଆସିଲେ ତାଙ୍କୁ କିଏ ମର୍ଡର କରି ଆଣି ଏହି ସ୍କୁଲ ଭିତରେ ପକାଇ ଦେଇଛି ନା ଅନ୍ୟକିଛି ଘଟଣାକ୍ରମ ଏହା ପଛରେ ଲୁଚିଛି ତାହା ଅଞ୍ଚଳରେ ଏବେ ଚର୍ଚ୍ଚାର ବିଷୟ ପାଳଟିଛି ।    

ବଲାଙ୍ଗୀର ଜିଲ୍ଲା ସିନ୍ଧେକେଲା ଥାନା ଅନ୍ତର୍ଗତ ଶୁଣ୍ଢିମୁଣ୍ଡା ପ୍ରାଥମିକ ବିଦ୍ୟାଳୟର ଡିପିଇପି ସ୍କୁଲ ଭିତରୁ ଜଣେ ଅଚିହ୍ନା ଯୁବତୀଙ୍କ ଗଳିତ ଶବ ଗୁରୁବାର ଠାବ ହୋଇଥିବା ବେଳେ ରାତି ହୋଇଯାଇ ଥିବାରୁ ଗତକାଲି ସିନ୍ଧେକେଲା ପୋଲିସ ଶବ ଉଦ୍ଧାର କରିଛି। ତେବେ ଯୁବତୀଙ୍କ ମୃତ ଦେହ ମୁହଁ ମାଡି ପଡିଥିବା ଏବଂ ମୃତ୍ୟୁକୁ ପାଖାପାଖି ଚାରି ପାଞ୍ଚ ଦିନ ହୋଇ ଯାଇଥିବାରୁ ଚେହେରା ଚିହ୍ନିବା ମୁସ୍କିଲ ହୋଇଥିବା ପୋଲିସ ପକ୍ଷରୁ କୁହାଯାଇଛି। ଟିଟିଲାଗଡ ଅତିରିକ୍ତ ତହସିଲଦାର ମାଜିଷ୍ଟ୍ରେଟ ଦାୟୀତ୍ବରେ ପହଞ୍ଚିବା ପରେ ତାଙ୍କ ସମ୍ମୁଖରେ ଗଳିତ ଶବକୁ ସ୍କୁଲ କୋଠରୀ ଭିତରୁ ବାହାରକୁ ଆଣି ମୃତ ଶରୀରର ପଞ୍ଚନାମା କରିଥିଲେ । ଏହି ସମୟରେ ଟିଟିଲାଗଡ ଏସଡିପିଓ ସୁରେନ୍ଦ୍ର ନାଥ ସତପଥି , ସିନ୍ଧେକେଲା ଆଇଆଇସି ପଞ୍ଚାନନ ନାଏକ, ଟିଟିଲାଗଡ ଥାନାଧିକାରୀ ରଞ୍ଜନ ବରିହା, କଣ୍ଟାବାଞ୍ଜୀ ଆଇଆଇସି ସତ୍ୟଜିତ କାଣ୍ଡେଲକର, ବଲାଙ୍ଗୀର ସଦର ଥାନା ଆଇଆଇସି ଶ୍ରୀକାନ୍ତ ସାହୁ , ଜିଲ୍ଲା ଫରେନସିକ ଟିମ ଓ ଦୁଇ ସେକ୍ସନ ପୋଲିସ ପ୍ଲାଟୁନ, ଏଏସଆଇ ସୁମନ ମଲ୍ଲିକ,ଏଏସଆଇ ଅରକ୍ଷିତ ନାଏକ ପ୍ରମୁଖ ଉପସ୍ଥିତ ଥିଲେ। 

ଯୁବତୀ ଜଣକଙ୍କ ଶରୀର ଫୁଳି ଯାଇଥିବା ପୁରା ଶରୀର ଗଳିତ ଅବସ୍ଥାରେ ଥିବାରୁ ମୁହଁ ମଧ୍ଯ ପଚିଯାଇଛି ତେଣୁ ପରିଚୟ ପାଇବା କଷ୍ଟକର କିନ୍ତୁ ଯୁବତୀ ଜଣକ ଏକ ଧଳାଜିନ୍ସ ପେଣ୍ଟ , ଲାଲ ଫ୍ରକ, ଗୋଡରେ ପାଉଞ୍ଜି ଯୋଉଥିରେ ଗୋଲ୍ଡେନ କଲର ର ଷ୍ଟୋନ ଲାଗିଛି , ଗୋଟିଏ ହାତରେ ଗୋଲ୍ଡେନ ଚେନ ଲଗା ହାତ ଘଡି , ଗୋଟିଏ ହାତରେ ଲାଲ ଚୁଡି , ବେକରେ ଗୋଲ୍ଡେନ କଲରର ଏକ ସରୁ ଚେନ ଯାହାର ମଝି ଫୁଳରେ ଇଂରାଜୀ ଅକ୍ଷରରେ ସୋନୁ ଲେଖାଯାଇଛି ଏବଂ ପାଦରେ ଧୁସର କଳରର ହାଫ ସୁଜ ପିନ୍ଧିଥିବା ଦେଖା ଯାଇଥିଲା । ତେଣୁ ଟିଟିଲାଗଡ ଏସଡିପିଓ ଶ୍ରୀ ସତପଥୀ ଗଣମାଧ୍ୟମ ଜରିଆରେ କେହି ଯଦି ଯୁବତୀ ଜଣକଙ୍କ ପରିଚୟ ଜାଣିଥାନ୍ତି ତା ହେଲେ ୯୪୩୭୧ ୨୬୬୪୬ କୁ ଫୋନ କରି ଜଣାଇବାକୁ ଅନୁରୋଧ କରିଛନ୍ତି। 

କରୋନା ସମୟରୁ ପ୍ରାଥମିକ ସ୍କୁଲ ସବୁ ବନ୍ଦ ଅଛି । କିନ୍ତୁ ଶିକ୍ଷକ ଶିକ୍ଷୟିତ୍ରୀ ମାନେ ଅଫିସ କାମ ପାଇଁ ସ୍କୁଲକୁ ଆସୁଛନ୍ତି ହେଲେ ପାର୍ଶ୍ବରେ ଥିବା ଏକ ସ୍କୁଲ କୋଠରୀ ଭିତରେ ଜଣେ ଯୁବତୀଙ୍କ ମର ଶରୀର ପଡିଥିଲେ ହେଁ ଶିକ୍ଷକ ଶିକ୍ଷୟିତ୍ରୀଙ୍କ  ନଜର ପଡି ପାରିଲା ନାହିଁ କାହିଁକି। ସେମାନେ ଜାଣି ପାରିଲେନି କେମିତି ବୋଳି ଶୁଣ୍ଢିମୁଣ୍ଡା ପ୍ରାଥମିକ ବିଦ୍ୟାଳୟର ସହକାରୀ ଶିକ୍ଷକ ପ୍ରେମ ଚନ୍ଦ୍ର ତାଣ୍ଡି ଙ୍କୁ ଆମ ପ୍ରତିନିଧି ପଚାରିବାରୁ ସେ ଯୁବତୀଙ୍କ ଗଳିତ ଶବ ଉଦ୍ଧାର ହୋଇଥିବା ଡିପିଇପି ସ୍କୁଲ ଡେମେଜ ହୋଇ ଯାଇଥିବାରୁ ସେଥିରେ ଆଉ ପାଠ ପଢା ହେଉନଥିଲା। ଏବଂ ଆମେ ସେ ପଟକୁ ଆଉ ଯା ଆସ ବି ବେଶୀ କରୁନଥିଲୁ ତେଣୁ ପରିତ୍ୟକ୍ତ କୋଠରୀରୁ ଦୁର୍ଗନ୍ଧ ବାହାରିବା ପରେ ସ୍ଥାନୀୟ ଲୋକେ ପୋଲିସ କୁ ଖବର କରିଥିଲେ ବୋଳି କହିଥିଲେ । ଯଦି ସ୍କୁଲ କୁ ଛାତ୍ରଛାତ୍ରୀ ଆସୁ ଥାଆନ୍ତେ ତା ହେଲେ ଘଟଣା ହୁଏତ ଶିଘ୍ର ଜଣା ପଡିଥାନ୍ତା ବୋଳି କହିଥିଲେ।