21-Nov-2021

ସୁବର୍ଣ୍ଣପୁର(ମନୋରଞ୍ଜନ ତ୍ରିପାଠୀ) : ପ୍ରଜାପିତା ବ୍ରହ୍ମକୁମାରୀ ଈଶ୍ବରୀୟ ବିଶ୍ବ ବିଦ୍ୟାଳୟ ପକ୍ଷରୁ ଈଶ୍ବରୀୟ ସେବାର ୫୦ ବର୍ଷ ପୂର୍ତ୍ତି ଅବସରରେ ସୁବର୍ଣ୍ଣପୁର ଠାରେ ପଶ୍ଚିମ ଓଡିଶାସ୍ତରୀୟ ସୁବର୍ଣ୍ଣ ଜୟନ୍ତୀ ସମାରୋହ ଅନୁଷ୍ଠିତ ହୋଇଯାଇଛି ।ପ୍ରଜାପିତା ବ୍ରହ୍ମକୁମାରୀ ଈଶ୍ବରୀୟ ବିଶ୍ବ ବିଦ୍ୟାଳୟ,ସୁବର୍ଣ୍ଣପୁର ଶାଖା ପକ୍ଷରୁ ଆୟୋଜିତ ଏହି ସମାବେଶରେ ରାଜଯୋଗିନୀ ବ୍ରହ୍ମାକୁମାରୀ ପାର୍ବତୀ ଜୀ ମୁଖ୍ୟ ଅତିଥି ଭାବେ ଯୋଗଦେଇ ଉତ୍ତମ ସମାଜ ଗଠନରେ ସମର୍ପିତ ଭାବନା ଓ କର୍ତ୍ତବ୍ୟ ଆଜିର ଦିନରେ ଅପରିହାର୍ଯ୍ୟ ବୋଲି ଉଦବୋଧନ ଦେଇଛନ୍ତି । ଅନ୍ୟତମ ଅତିଥି ଭାବେ ଓଡିଶା ଲୋକାୟୁକ୍ତ ସଦସ୍ୟ ଡ.ଦେବବ୍ରତ ସ୍ବାଇଁ ସୁଖ,ଶାନ୍ତି ଓ ପରମାର୍ଥିକ ଦିବ୍ୟାନୁଭବ ପାଇବାକୁ ହେଲେ ଈଶ୍ବରୀୟ ଧୂନ୍ କୁ ମନ୍ତ୍ର ଭାବେ ଜପିବାକୁ ହେବ ବୋଲି ଉପସ୍ଥିତ ଦୀକ୍ଷିତଙ୍କୁ ଆହ୍ବାନ ଦେଇଥିଲେ । ଏହି ଅବସରରେ ରାଜଯୋଗିନୀ ପାର୍ବତୀ ଜୀଙ୍କ ଦ୍ବାରା ସୁବର୍ଣ୍ଣପୁର ଜିଲ୍ଲା ଶାଖାର ସେବା ଓ

ପାଠଶାଳାର ନିଜସ୍ବ କାର୍ଯ୍ୟାଳୟ "ସ୍ବର୍ଣ୍ଣିମ ଭବନ" ଉଦଘାଟିତ ହୋଇଯାଇଛି । ମହାନଦୀ - ତେଲ ନଦୀର ସଂଗମସ୍ଥିତ ପାନ୍ଥଶାଳା ପରିସରରେ ଅନୁଷ୍ଠିତ ସମାବେଶରେ ଏକ ରକ୍ତଦାନ ଶିବିର ଅନୁଷ୍ଠିତ ହୋଇଥିଲା ।  ଏହି ରକ୍ତ ଦାନ ଶିବିର ରେ ରାଜ୍ୟ ରକ୍ତ ଦାତା ସଂଘ  ର ସଦସ୍ୟ ମନୋଜ ପଣ୍ଡା  ତତ୍ୱାବଧାନ କରିଥିବା ବେଳେ  ମେଡିକାଲ ବ୍ଲଡ଼ ବ୍ୟାଙ୍କ ଟେକନିସିଆନ ସୁବାଷ ପଣ୍ଡା, ଜଗତ ଦରୱାନ ପ୍ରମୁଖ ସହଯୋଗ କରିଥିଲେ l ସୁବର୍ଣ୍ଣ ଜୟନ୍ତୀ ସମାରୋହରେ ସୁବର୍ଣ୍ଣପୁର ଜିଲ୍ଲା ସମେତ ସମ୍ବଲପୁର, ବରଗଡ, ଦେବଗଡ, ଝାରସୁଗୁଡା ,ବୌଦ୍ଧ ଓ ବଲାଙ୍ଗିର ଜିଲ୍ଲାର ବ୍ରହ୍ମକୁମାର ଓ ବ୍ରହ୍ମକୁମାରୀ ମାନେ ଅଂଶଗ୍ରହଣ କରିଥିଲେ ।