20-Nov-2021

ନୟାଗଡ଼, (ପ୍ରଦୀପ କୁମାର ପଣ୍ଡା) ନୟାଗଡ଼ ସଦର ଥାନା ଅନ୍ତର୍ଗତ ଦୁରୁଦୁରା ଗ୍ରାମ ପଞ୍ଚାୟତ ଉଦୟପୁରୁ ଗାଁରେ ଘଟିଛି ଅଘଟଣ । ଗୋଟି ପରିବାରକୁ ଏକ ଚୋରି ମାମଲାରେ ୫ ଲକ୍ଷ ଦିଅ ନଚେତ ଗାଁରୁ ଯାଅ ବୋଲି ଗ୍ରାମ ସଭାପତି ନିଷ୍ପତ୍ତି ଶୁଣାଇଛନ୍ତି । ଉକ୍ତ ଘଟଣାକୁ ନେଇ ସଦର ଥାନାରେ ଏତଲା ଦିଆଯାଇଛି । ସୂଚନାନୁସାରେ ଉଦୟପୁରୁ ଗ୍ରାମର ଗୁଣନିଧି ଜେନାଙ୍କର କିଛି ସୁନା ଜିନିଷ ଚୋରି ହୋଇଥିଲା । ଚୋର ଧରିବା ପାଇଁ ଗୁଣନିଧି ଅନ୍ଧ ବିଶ୍ୱାସର ବଶବର୍ତି ହୋଇ ୧୮ ତାରିଖରେ ଗ୍ରାମରେ ଖଟ ବୁଲାଇଥିଲେ । ଉକ୍ତ ଦିନ ଗୁଣିଆ ଜଣଙ୍କ କାହାକୁ ଧରିବାରେ ସଫଳ ହୋଇ ନଥିଲେ । ଗୁଣିଆ ଜଣଙ୍କ ରାତ୍ରିରେ ଗୁଣନିଧିଙ୍କ ଘରେ ରହିଥିଲା । ୧୯ ତାରିଖ ଦିନ ପୁଣି ଖଟ ବୁଲାଯାଇଥିଲା । ୧୯ ତାରିଖ ଦିନ ଉକ୍ତ ଗ୍ରାମର ଲୋକ ନାଥ ଯେନାଙ୍କ ଘରେ ଖଟ ଲାଗି ଥିଲା । ଗ୍ରାମ ସଭାପତିଙ୍କ ସମେତ ଗ୍ରାମର ମୁଖିଆ ମାନେ ଲୋକନାଥଙ୍କୁ ଗ୍ରାମ କୋଠ ଘରେ ରଖି ଚାବି ପକାଇ ଦେଇଥିଲେ । ତୁମେ

ଚୋରି କରିଛ ୫ ଲକ୍ଷ ଦିଅ ନଚେତ ଗାଁରୁ ଯାଅ ବୋଲି ନିଷ୍ପତ୍ତି ଶୁଣାଇଥିଲେ । ଯାହାକୁ ନେଇ ଲୋକନାଥ ଆଜି ସଦର ଥାନାରେ ଅଭିଯୋଗ କରିଛନ୍ତି । ପୂର୍ବ ଶତ୍ରୁତାକୁ କେନ୍ଦ୍ର କରି ଏଭଳି କରାଯାଇଛି ବୋଲି ଲୋକନାଥ କହିଛନ୍ତି । ଗୁଣି ଗାରେଡ଼ି ଖଟବୁଲାକୁ ନେଇ ଏବେବି ଅନ୍ଧ ବିଶ୍ୱାସ ଲୋକଙ୍କ ମନରେ ଅଛି । ଯାହା ଦ୍ୱାରାକି ଅନେକ ପରିବାର ନଷ୍ଟ ହେବାକୁ ବଶିଛି । ସେଥିପାଇଁ ସଚେତନତା ଆବଶ୍ୟକତା ରହିଛି ବୋଲି ସାଧାରଣରେ ଚର୍ଚ୍ଚା ଚାଲିଛି । ସୂଚନାନୁଯାୟୀ ଏବିଷୟରେ ସ୍ୱତନ୍ତ୍ର ତଦନ୍ତ ଜାରିରହିଛି ଏବଂ ଅନ୍ଧ ବିଶ୍ୱାସ ବିରୁଦ୍ଧରେ ସ୍ୱତନ୍ତ୍ର ସଚେତନତା କାର୍ଯ୍ୟକ୍ରମ କରାଯିବା ଆବଶ୍ୟକ ବୋଲି ସଦରଥାନା ଅଧିକାରୀ ଶ୍ରୀଯୁକ୍ତ ଦୀପକ ଖଣ୍ଡାୟତରାୟ ମତବ୍ୟକ୍ତ କରିଛନ୍ତି |