18-Oct-2021

ପାଟଣାଗଡ଼(, ପ୍ରେରଣା ଖବର): ବଲାଙ୍ଗିର ଜିଲ୍ଲା ହେଉଛି ଏକ ଦାଦନ ପ୍ରବଣ ଜିଲ୍ଲା। ଏହି ଜିଲ୍ଲାର ଅଧିକାଂଶ ଲୋକ ପ୍ରତି ବର୍ଷ ଦାଦନ ଖଟିବାକୁ ବାହାର ରାଜ୍ୟକୁ ଚାଲି ଯାଇଥାନ୍ତି।ଛଅ ମାସ ଘରେ ଓ ଛଅ ମାସ ବାହାର ରାଜ୍ୟରେ ରୁହନ୍ତି। ବର୍ତ୍ତମାନ ସେହି ଦାଦନ ଋତୁ ଆରମ୍ଭ ହୋଇଯାଇଥିବା ବେଳେ ଏବେ ଦଲାଲ୍ ମାନେ ଗାଁ ଗାଁ ଯାଇ ଡେରା କଲେଣି ଓ ଟଙ୍କା ବଇନା ଦେଇ ବସିଲେଣି । ପଞ୍ଚାୟତ ନିର୍ବାଚନ ପାଖେଇ ଆସୁଥିବା ବେଳେ ରାଜ୍ୟ ସରକାର ଦାଦନ ଶ୍ରମିକ ଯିବା ପାଇଁ ପ୍ରତିବନ୍ଧକ ଲଗାଉଛନ୍ତି। ସୂଚନାଯୋଗ୍ୟ ଯେ ପାଟଣାଗଡ଼ ଉପଖଣ୍ଡ ଖପ୍ରାଖୋଲ ଥାନା ଗମ୍ଭାରୀ ଛକ ନିକଟରେ ୨୫ ଜଣ ଦାଦନ ଶ୍ରମିକ ଉଦ୍ଧାର ଓ ଦୁଇ ଜଣ ଗିରଫ ସହିତ ଦୁଇ ଗାଡ଼ି ଜବତ କରିଥିବା ଜଣାପଡିଛି। ଖପ୍ରାଖୋଲ ଥାନା କନ୍ଧେନଝୁଲା ଗାଁ ର ଦାଦନ ଦଲାଲ୍ ଗୋପ ରାଏ ର ୧୬ ଗୋଟି ଶ୍ରମିକ ଓ ବେଲପଡା ଥାନା ସିହିନୀ ଗାଁ ର ନରେନ୍ଦ୍ର କୁମ୍ଭାର ର ୧୧ ଗୋଟି ଦାଦନ ଶ୍ରମିକ ଆଣୁଥିବା ସମୟରେ ଖପ୍ରାଖୋଲ ପୋଲିସ କୌଣସି ସୂତ୍ରରୁ ଖବର ପାଇ ଗମ୍ଭାରୀ ଛକ ଠାରେ ଚଢ଼ାଉ କରିଥିଲେ।OR 02 BB 0565 ଏକ ବୋଲେରୋ ଗାଡ଼ି ଓ OD 17 D 9594 ଏକ କମାଣ୍ଡର ଗାଡ଼ି ଜବତ କରିବା ସହ ଫାରସ ମାଝୀ ଓ ଚାବ୍ରିପାଲି ଗାଁ ର ରାଜିନ୍ଦ୍ର କଠାର ନାମକ ଦୁଇ ଜଣ ବ୍ୟକ୍ତି କୁ ଗିରଫ କରାଯାଇଛି। ୨୫ ଜଣ ଦାଦନ ଶ୍ରମିକ ମଧ୍ୟରେ ୧୧ ଜଣ ମହିଳା ଓ ୧୬ ଜଣ ପୁରୁଷ ଥିବା ସୂଚନା ମିଳିଛି।କେଶ ନମ୍ବର ୧୬୧ ମାମଲା ରୁଜୁ କରି ଆସାମୀ ମାନଙ୍କୁ ଆସନ୍ତା କାଲି କୋର୍ଟ ଚାଲାଣ କରାଯିବ ବୋଲି ଥାନା ଅଧିକାରୀ ରମାକାନ୍ତ ସାହୁ ସୂଚନା ଦେଇଛନ୍ତି। ବର୍ତ୍ତମାନ ସୁଦ୍ଧା ମୁଖ୍ୟ ଦୁଇ ଜଣ ଗୋପ ରାଏ ଓ ନରେନ୍ଦ୍ର କୁମ୍ଭାର ଫେରାର ଥିବା ଜଣାପଡିଛି।