20-Sep-2021

ନିକଟରେ ଶେଷ ହୋଇଥିବା ଟୋକିଓ ପାରାଲିମ୍ପିକ୍ସରେ ସ୍ବର୍ଣ୍ଣ ପଦକ ଜିତି ଇତିହାସ ରଚିଥିଲେ ଓଡ଼ିଆ ପୁଅ ପ୍ରମୋଦ ଭଗତ। ପରେ ନିଜର ବଡ଼ ପ୍ରଶଂସକ କ୍ରିକେଟ କିମ୍ବଦନ୍ତୀ ମାଷ୍ଟର ବ୍ଲାଷ୍ଟର ସଚିନ ତେନ୍ଦୁଲକରଙ୍କୁ ଭେଟିଥିଲେ ସୁନା ପୁଅ ପ୍ରମୋଦ। ଏବେ ସୁନା ପୁଅ ପ୍ରମୋଦ ଭଗତଙ୍କୁ ଖାସ୍‌ ଉପହାର ଦେଲେ ମାଷ୍ଟର ବ୍ଲାଷ୍ଟର ସଚିନ ତେନ୍ଦୁଲକର।

ଟୋକିଓ ପାରାଲିମ୍ପିକ୍‌ସରେ ସ୍ବର୍ଣ୍ଣ ପଦକ ଜିତିଲା ପରେ ପ୍ରମୋଦଙ୍କୁ ସଚିନ ଶୁଭେଚ୍ଛା ଜଣାଇଥିଲେ। ତୁମ ସଫଳତା ସମଗ୍ର ଯୁବ ପିଢିଙ୍କୁ ଆକର୍ଷିତ କରିବ; ବିଶେଷକରି ଦିବ୍ୟାଙ୍ଗମାନଙ୍କ ପାଇଁ ପ୍ରେରଣା ପାଲଟିଛ ବୋଲି କହିଥିଲେ। କେବଳ ସେତିକି ନୁହେଁ ପାରାଲିମ୍ପିକ୍‌ସରେ ହାସଲ କରିଥିବା ସ୍ବର୍ଣ୍ଣ ପଦକକୁ ସଚିନ ଦେଖିବା ସହତି ସେଲ୍‌ଫି ମଧ୍ୟ ନେଇଥିଲେ। ସେହି ସମୟରେ ପ୍ରମୋଦ କହିଛନ୍ତି, ସଚିନ ମୋ ଆଦର୍ଶ। ସଚିନଙ୍କୁ ଭେଟିବା ନେଇ ପିଲାଦିନରୁ ସ୍ବପ୍ନ ରହିଥିଲା। ଯାହା ପୂରଣ ହୋଇଛି। ପ୍ରମୋଦ ଓ ସଚିନ ୩ ଘଣ୍ଟା ବିତାଇବା ସହ ଏକାଠି ମଧ୍ୟାହ୍ନ ଭୋଜନ ମଧ୍ୟ କରିଥିଲେ।

ଏବେ ଖୋଦ୍‌ ସଚିନ ତେନ୍ଦୁଲକର ୨୦୦ ତମ ଟେଷ୍ଟ ମ୍ୟାଚରେ ପିନ୍ଧିଥିବା ଜର୍ସିକୁ ପ୍ରମୋଦ ଭଗତଙ୍କୁ ଉପହାର ଦେଇଛନ୍ତି। ଜର୍ସିରେ ସଚିନଙ୍କ ଅଟୋଗ୍ରାଫ୍‌ ମଧ୍ୟ ରହିଛି। ରବିବାର ଦିନ କୋରିୟର ମାଧ୍ୟମରେ ଆସି ପହଁଞ୍ଚିଥିଲା ଉପହାର। ପ୍ରମୋଦ ତାଙ୍କ ଗୁରୁଙ୍କ ସାମ୍ନାରେ ଏହି ଜର୍ସି ଖୋଲିଥିଲେ।