22-Aug-2021

ସଇଁତଳା (ପ୍ରେରଣା ଖବର)- ସଇଁନ୍ତଲା ବ୍ଲକ ଅନ୍ତର୍ଗତ ଡେଙ୍ଗ ସ୍ଥିତ ସରକାରୀ ଉନ୍ନୀତ ଉଚ୍ଚ ବିଦ୍ୟାଳୟର ପରିସରରେ ଥିବା ଅମରାବତୀ ଉଦ୍ୟାନ ଠାରେ ଶ୍ରାବଣ ପୂର୍ଣ୍ଣିମା ଅବସରରେ ସ୍ୱଭାବ କବି ଗଙ୍ଗାଧର ମେହର ଜୟନ୍ତୀ ଓ ନିଆରା ଢଙ୍ଗରେ ରକ୍ଷା ବନ୍ଧନ ଦିବସ  ପାଳନ କରାଯାଇଛି । ପ୍ରଧାନଶିକ୍ଷକ ଚାଣ୍ଡାଳ ମିଶ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିବା କାର୍ଯ୍ୟକ୍ରମରେ ପ୍ରଥମେ ସ୍ୱଭାବ କବି ଗଙ୍ଗାଧର ମେହେରଙ୍କର ଫଟୋଚିତ୍ରରେ ପୁଷ୍ପମାଲ୍ୟ ଅର୍ପଣ କରାଯାଇଥିଲା । ଶିକ୍ଷକ ସୁଦର୍ଶନ ଦାଶ, ବ୍ରଜମୋହନ ମାଝି, ଶିକ୍ଷୟତ୍ରୀ ରେଣୁକା ସାହୁ, କାନ୍ତି ଭୋଇ ଗଙ୍ଗାଧର ମେହେରଙ୍କର ସାହିତ୍ୟ କ୍ଷେତ୍ରରେ ଅବଦାନ ବିଷୟରେ ଆଲୋକପାତ କରିଥିଲେ । ଏହି ଅବସରରେ ବିଦ୍ୟାଳୟ ଛାତ୍ରଛାତ୍ରୀମାନଙ୍କ ମଧ୍ୟରେ ଅନ୍ ଲାଇନ୍ ମାଧ୍ୟମରେ କୁଇଜ୍ ପ୍ରତିଯୋଗୀତା ଅନୁଷ୍ଠିତ ହୋଇଥିଲା । ପ୍ରତିଯୋଗୀତାରେ ସୃତି ସାହୁ ପ୍ରଥମ, ଆଲୋକ ବାଗ ଦ୍ୱିତୀୟ ଓ ଯୁଗ୍ମ ଭାବରେ ନିରୁପମା କୁମ୍ଭାର ଓ କେ କେ ଯଶପାଲ ସିଂ ରାଣା ତୃତୀୟ ସ୍ଥାନ ଅଧିକାର କରିଥିଲେ । ତତ୍‌ପରେ ଇକୋ କ୍ଲବ ଓ ଜୁନିୟର ରେଡକ୍ରସ ୟୁନିଟ୍ ତରଫରୁ  ପ୍ରକୃତି ପୂଜା କରିବା ସହିତ ଶିକ୍ଷକ ଶିକ୍ଷୟତ୍ରୀମାନେ ଗଛମାନଙ୍କୁ  ରାକ୍ଷୀ ବାନ୍ଧି ରକ୍ଷା ବନ୍ଧନ ଦିବସ ପାଳନ କରିଥିଲେ । ବୃକ୍ଷ ବିନା ମଣିଷ ଜୀବନ ତଥା ଜୀବଜଗତ ସମ୍ଭବ ନୁହଁ । ବୃକ୍ଷ ମନୁଷ୍ୟକୁ ମୌଳିିକ ଆବଶ୍ୟକତା  ଖାଦ୍ୟ, ବସ୍ତ୍ର,

ବାସଗୃହ  ଦେବା ସହ ସର୍ବୋପରି ଶୁଦ୍ଧ ଅମ୍ଲଜାନ ଯୋଗାଇ  ଥାଏ । ଗଛ ଆମର ଭାଇ ପରି, ତେଣୁ  ସବୁ ବିପତ୍ତିରୁ ବୃକ୍ଷଗୁଡିକୁ ରକ୍ଷା କରିବାକୁ ସ୍କୁଲର ଶିକ୍ଷକ ଶିକ୍ଷୟତ୍ରୀ ସଙ୍କଳ୍ପ ନେଇଥିଲେ ।  ଏହି ଭାଇଚାରା ଭାବ ନେଇ କୋଭିଡ-୧୯ ନିୟମ ପାଳନ କରି ହୋଇଥିବା କାର୍ଯ୍ୟକ୍ରମରେ ଛାତ୍ରଛାତ୍ରୀମାନେ ନିଜେ ଘରେ ରହି ବୃକ୍ଷ ଗୁଡିକୁ ରାକ୍ଷୀ ବାନ୍ଧି ରକ୍ଷାବନ୍ଧନ ଉତ୍ସବ ପାଳନ କରିଥିଲେ ।  କାର୍ଯ୍ୟକ୍ରମରେ ଶିକ୍ଷକ ବିଶ୍ୱନାଥ ମେହେର, ହିମାଂଶୁ ଶେଖର ବିଶ୍ୱାଳ, ଲିଂଗରାଜ ନନ୍ଦ, ଶିକ୍ଷୟତ୍ରୀ ଗାୟତ୍ରୀ ବାରିକ, ଭାରତୀ ପଧାନ, ଦ୍ରୋପଦୀ ଭୋଇ, ଯଶୋବନ୍ତୀ ସୁନା ପ୍ରମୁଖ ଉପସ୍ଥିତ ଥିଲେ ।  ପ୍ରକୃତିବନ୍ଧୁ ଶିକ୍ଷକ ତଥା ଜୁନିୟର ରେଡକ୍ରସ କାଉନ୍ସେଲର ରାମ ନାରାୟଣ ଦାଶ କାର୍ଯ୍ୟକ୍ରମକୁ ପରିଚାଳନା କରିଥିବା ବେଳେ ଶିକ୍ଷକ ଆଦିତ୍ୟ ରଣା ଧନ୍ୟବାଦ ଅର୍ପଣ କରିଥିଲେ ।