06-Aug-2021

ଭୁବନେଶ୍ବର (ଶୁଭାଶିଷ ନାୟକ):  ଭାଇରସ କେତେ ସଂକ୍ରମଣ କ୍ଷମ ତାହା ଆର ଭାଲ୍ୟୁ ଦେଖାଏ । ଆର ଭାଲ୍ୟୁ 1 ଉପରେ ରହିଲେ କେସ ସଂଖ୍ୟା ବଢ଼ି ବଢ଼ି ଚାଲିବ ବୋଲି ଥିଓରି କହୁଛି । କିନ୍ତୁ ଗଲା ସପ୍ତାହରେ କଟକ, ପୁରୀ ଓ ଖୋର୍ଦ୍ଧାରେ ଯାହା ସଂକ୍ରମଣ ସଂଖ୍ୟା ଥିଲା, ଏବେ ତାହା କମିଛି । ତା'ମାନେ ଆର ଭାଲ୍ୟୁ 1ରୁ କମ ଅଛି ବୋଲି ଡିଏମ୍ ଇ ଟି ସି ବି କେ ମହାନ୍ତି ନିଜ ପ୍ରତିକ୍ରିୟାରେ କହିଛନ୍ତି 

  ଯେକୌଣସି ମହାମରୀରେ କେସ ବଢିବା, କମିବା ଏକ ନିୟମିତ ଧାରା । କିଛି ରାଜ୍ୟରେ ସଂକ୍ରମଣ ବଢ଼ିଛି, କିଛି ରାଜ୍ୟରେ କମୁଛି । ସାମଗ୍ରିକ ଭାବେ ଭାରତରେ ଗତ 15 ଦିନ ହେଲା ସଂକ୍ରମଣ ସ୍ଥିର ରହିଛି ବୋଲି ଶ୍ରୀ ମହାନ୍ତି ସ୍ପଷ୍ଟ କରିଛନ୍ତି । କୌଣସି ମହାମାରୀ ବେଳେ ଲଗାତାର ବା ସ୍ଥାୟୀ ଭାବେ ଲକଡାଉନ, ସଟଡାଉନ ବା କଟକଣା ରହେନି । ଲୋକଙ୍କ ଜୀବନ ଜୀବିକାକୁ ଦେଖି କିଛି ପରିମାଣରେ କୋହଳତା ଦରକାର । ଏହା ଭିତରେ ଟୀକାକରଣ ଚାଲୁଛି । ଲୋକଙ୍କୁ ସଚେତନ କରାଯାଉଛି । ଯାହା ବି କୋହଳ ହେଉଛି, ତା ଉପରେ ବି ନଜର ଅଛି ବୋଲି ଶ୍ରୀ ମହାନ୍ତି କହିଛନ୍ତି । 

ଟୀକାକରଣ ପରେ କିଛି ଲୋକ ସଂକ୍ରମିତ ହେଉଛନ୍ତି । ଏହା କେବଳ କୋଭିଡ ଟୀକାରେ ନୁହଁ, ସବୁ ଟୀକାରେ ଏହା ଦେଖିବାକୁ ମିଳେ ।  ମିଳିମିଳା, ପୋଲିଓ ଭଳି ସର୍ବବୃହତ ଟୀକାକରଣ ଅଭିଯାନରେ ମଧ୍ୟ ବିଫଳତା ଦେଖିବାକୁ ମିଳିଛି । ଏହାସତ୍ତ୍ୱେ ଏଥିରୁ ରକ୍ଷା ପାଇବାକୁ ହେଲେ ଆମକୁ ସଚେତନ ହେବାକୁ ପଡ଼ିବ । ସ୍ୱାସ୍ଥ୍ୟ ବିଭାଗ ଟୀକା ଦେଇଦେଲା, ଆମେ ସଚେତନ ରହିବା । 

ଅଭିଭାବକ ଓ ସ୍କୁଲ କର୍ମଚାରୀ ଟୀକା ନେଲେ, ଛାତ୍ରଛାତ୍ରୀଙ୍କ ପାଖକୁ ସଂକ୍ରମଣ ହେବନି । ପିଲା ସଂକ୍ରମିତ ହେଲେ ବି ସେତେ ଗୁରୁତର ହୁଅନ୍ତି ନାହିଁ । ଏହାର ଅର୍ଥ ନୁହେଁ ଯେ ସେମାନଙ୍କୁ ସଂକ୍ରମଣ ପାଇଁ ଛାଡ଼ି ଦେବା । ସେରୋ ସର୍ଭେ ଦର୍ଶାଇଛି, ବହୁତ ପିଲା ସଂକ୍ରମିତ ହୋଇଛନ୍ତି । ଏହା ଅର୍ଥ ଅନେକ ପିଲା ଲକ୍ଷଣହୀନ ସଂକ୍ରମଣର ଶିକାର ହୋଇଛନ୍ତି । ତେଣୁ ଅନ୍ୟମାନେ ପ୍ରିକସନ ନେଲେ ପିଲା ସଂକ୍ରମିତ ହେବେନି । କଟକଣା ଅଧିକ କୋହଳ ହୋଇଥିବାରୁ ମୁଖ୍ୟମନ୍ତ୍ରୀ ଲୋକଙ୍କୁ ଚେତାଇଛନ୍ତି । ଲୋକମାନେ ନ ମାନିଲେ, ସଂକ୍ରମଣ ବଢ଼ିବ, ତାହେଲେ ଲକଡାଉନ ନିଶ୍ଚିତ ହେବ । ଏହା ମୁଖ୍ୟମନ୍ତ୍ରୀ ଚେତାଇ ଦେଇଛନ୍ତି ଡି ଏମ୍ ଇ ଟି ସିବିକେ ମହାନ୍ତି ।