24-Jul-2021

ଏସ.ରାମପୁର,(ପ୍ରେରଣା ଖବର)- ମହାମାରୀ କରୋନାକୁ ପ୍ରତିହତ କରିବା ପାଇଁ ସରକାର ମାଗଣାରେ ପ୍ରତିଷେଧକ ଟିକା ଦେଉଥିବା ବେଳେ ଅନେକ ସ୍ଥାନରେ ଲୋକ ଟିକା ନେବାକୁ ମଙ୍ଗୁ ନଥିବା ଦେଖାଯାଇଛି । ଏହାକୁ ଦୃଷ୍ଟିରେ ରଖି ଜିଲ୍ଲା ଜୁନିଅର ରେଡକ୍ରସର କର୍ମି ମାନେ ସଚେତନ କାର୍ଯ୍ୟକ୍ରମ ମାଧ୍ୟମରେ ଡୁଙ୍ଗୁରିପାଲି ବ୍ଲକ ଅନ୍ତର୍ଗତ ଏସ୍ ରାମପୁର ଅଂଚଳରେ ଲୋକମାନଙ୍କୁ ଟିକାକରଣ ସମ୍ବନ୍ଧରେ ସଚେତନ କରିଥିଲେ । ଅଯଥା ଗୁଜବ ନଶୁଣି ସରକାରଙ୍କ ତରଫରୁ ମାଗଣାରେ ଦିଆଯାଉଥିବା ଟିକା ଯଥା ସମୟରେ

ନିଅନ୍ତୁ, ମହାମାରୀ କରୋନା ଠାରୁ ନିଜ ଜୀବନକୁ ସୁରକ୍ଷିତ ରଖିବା ସହିତ ସୁସ୍ଥ ସମାଜ ଗଠନରେ ସମସ୍ତେ ସହାୟକ ହୁଅନ୍ତୁ ବୋଲି ରେଡକ୍ରସ ତରଫରୁ ଆହ୍ୱାନ କରାଯାଇଥିଲା । ଜୁନିଅର ରେଡକ୍ରସ କର୍ମିଙ୍କ ସମେତ ଜିଲ୍ଲା ଜୁନିଅର ରେଡକ୍ରସ ଅଫିସର ରବିଚନ୍ଦ୍ର ପଶାୟତ ନିଜେ ୨ୟ ଡୋଜ ଟିକା ନେବା ସହିତ ରାମପୁର ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରକୁ ଟିକା ନେବା ପାଇଁ ଆସୁଥିବା ଜନସାଧାରଣଙ୍କୁ ଉତ୍ସାହିତ କରିଥିଲେ । କରୋନା ଟିକା ନେଲା ପରେ ମଧ୍ୟ ମାସ୍କ ପିନ୍ଧିବା, ସାମାଜିକ ଦୂରତା ବଜାୟ ରଖିବା, ବାରମ୍ବାର ହାତକୁ ୨୦ ରୁ ୪୦
 

ସେକେଣ୍ଡ ପର୍ଯ୍ୟନ୍ତ ଧୋଇବା,  ଅଯଥାରେ ଜନଗହଳିକୁ  ନ ଯିବାକୁ  ଟିକା ଗ୍ରହିତାଙ୍କୁ ସୂଚନା ଦେଇଥିଲେ । ଟିକା କରଣ କାର୍ଯ୍ୟକ୍ରମକୁ ଡା.ପଦ୍ମନାଭ ପଣ୍ଡା, ଡା.ଆନନ୍ଦ ମେହେର, ସ୍ୱାସ୍ଥ୍ୟକର୍ମି ପ୍ରଭାସିନୀ ଦାଶ, ଆଲୋକ ରଂଜନ ନାଏକ ପରିଚାଳନା କରିଥିଲେ । ଜୁନିଅର  ରେଡକ୍ରସ ସାଧନକର୍ମି ହୃଷିକେଶ ଡାଙ୍ଗ, ପରାମର୍ଶଦାତା ରବିନ୍ଦ୍ର ନାଥ ଦୀପ, ବଲାଙ୍ଗିର ଡେଙ୍ଗ ହାଇସ୍କୁଲର କାଉନସିଲର ରାମନାରାୟଣ ଦାଶ, ରାଜ୍ୟ ସାଧନ କର୍ମି ରବିଚନ୍ଦ୍ର ପଶାୟତ ପ୍ରମୁଖ  ପୋଲିସ କର୍ମୀଙ୍କ ମିଳିତ ଉଦ୍ୟମରେ ଟିକାକରଣ କାର୍ଯ୍ୟକ୍ରମରେ ସହଯୋଗ କରିଥିଲେ ।