24-Jun-2021

 ସମ୍ବଲପୁର, (ସଂଜୀବ ପାଣିଗ୍ରାହୀଙ୍କ ରିପୋର୍ଟ): ସଦର ଥାନା ଅଞ୍ଚଳରେ ଜଣେ ଯୁବକ ପ୍ରଥମ ସ୍ତ୍ରୀ ଥାଇ ମଧ୍ୟ ଦ୍ବିତୀୟ ବିବାହ କରିବାକୁ ଉଦ୍ୟମ କରୁଥିବା ନେଇ ମଙ୍ଗଳବାର ଅଭିଯୋଗ ହୋଇଛି I ଏସଂକ୍ରାନ୍ତରେ ଜମନକିରା ଥାନା ସାନକୁଣ୍ଡେସରା ର ମହିଳାଜଣଙ୍କ ସଦର ଥାନାରେ ଲିଖିତ ଅଭିଯୋଗ କରିବା ସହ ମାମଲାର ସମାଧାନ ପାଇଁ ଦାବି କରିଛନ୍ତି।  ପ୍ରଥମ ପତ୍ନୀଙ୍କ ଅଭିଯୋଗ କ୍ରମେ ପୋଲିସ ଦ୍ଵିତୀୟ ବିବାହକୁ ଅଟକାଇଛି। ମିଳିଥିବା ସୂଚନା ଅନୁଯାୟୀ ଜମନକିରା ଥାନା ସାନକୁଣ୍ଡେସରା ଗାଁର ବିଜୟିନୀ ସେଟ୍ ସମ୍ବଲପୁର ସଦରଥାନା ଅନ୍ତର୍ଗତ କୁଦୋପାଲି ଗାଁର ବିଜୟ ସେଟ୍‌ଙ୍କୁ ୨୦୧୨ ମସିହା ଜୁନ୍ ୮ ତାରିଖରେ ପ୍ରେମ ବିବାହ କରିଥିଲେ I କିନ୍ତୁ, ଉଭୟଙ୍କ ମଧ୍ୟରେ ମନୋମାଳିନ୍ୟ କାରଣରୁ ମାମଲା କୋର୍ଟକୁ ଯାଇଥିଲା। ବର୍ତ୍ତମାନ ବି ପରିବାର ଅଦାଲତରେ ଏହି ମାମଲା (୩୪/୨୦୧୬) ଚାଲୁଛି । ହେଲେ ଇତି ମଧ୍ୟରେ ବିଜୟ ଦ୍ବିତୀୟ ବିବାହ କରିବାକୁ ସଜବାଜ କରିଥିଲେ। ନିଜ ଗାଁର ଜଣେ ଯୁବତୀଙ୍କ ସହ ଆସନ୍ତା ଜୁଲାଇ ୭ ତାରିଖ ଦିନ ତାଙ୍କର ଦ୍ଵିତୀୟ ବିବାହ ଧାର୍ଯ୍ୟ ହୋଇଥିଲା। କାର୍ଡ ବଣ୍ଟା ବି ସରିଥିଲା I  ଏ ସଂପର୍କରେ ଖବର ପାଇ ପ୍ରଥମ ପତ୍ନୀ ବିଜୟିନୀ ସଦର ଥାନାରେ ଲିଖିତ ଅଭିଯୋଗ କରିଛନ୍ତି I ସଦର ଥାନା ଅଧିକାରୀ ଜ୍ୟୋତ୍ସ୍ନାରାଣୀ ବେହେରା ଉଭୟ ପରିବାରବର୍ଗଙ୍କୁ ଥାନାକୁ ଡକାଇ ବେଆଇନ୍‌ ଦ୍ଵିତୀୟ ବିବାହକୁ ବନ୍ଦ କରାଇଛନ୍ତି I