22-Jun-2021

ଯାଜପୁର (ପ୍ରେରଣା ଖବର) ଯାଜପୁର ଜିଲ୍ଲାର ଧର୍ମଶାଳା ତହସିଲ ଅଧୀନ ବୃନ୍ଦାଦେଈପୁର ବାଲିଘାଟରେ ଦିନକୁ ଦିନ ଲକ୍ଷାଧିକ ଟଙ୍କାର ରାଜସ୍ୱ ହାନି ହେଉଥିବା ଅଭିଯୋଗ ହୋଇଛି ।ରାଜନେତାଙ୍କ ଛତ୍ରଛାୟାତଳେ ରହି ପ୍ରାଶାସନିକ ଅଧିକାରୀଙ୍କ ମଧୁଚନ୍ଦ୍ରିକା ସମ୍ପର୍କ କ୍ରମେ ଏଠାରେ ବାଲିମାଫିଆମାନେ ହୋଇଉଠିଛନ୍ତି ସକ୍ରିୟ । ଲିଜଧାରୀଙ୍କ ଦ୍ୱାରା ଉକ୍ତ ବାଲିଘାଟରୁ  ନିଲାମର ସର୍ତ୍ତାବଳୀ ଅନୁସାରେ ବାଲି ଉଠାଇବାର ନିୟମ ରହିଛି ।କିନ୍ତୁ ସରକାରୀ ନିୟମକୁ ଫୁ କରାଯାଇ ଏଠାରେ ବାଲିମାଫିଆମାନଙ୍କ ଦ୍ୱାରା ନିର୍ଦ୍ଧାରିତ ପରିମାଣଠାରୁ  ୧୦ ଗୁଣ ଅଧିକ ବାଲି ହାଇୱା, ଟ୍ରକ ଆଦି ଭାରିଯାନ ଯୋଗେ ପରିବହନ କରାଯାଉଥିବାର ଦେଖିବାକୁ ମିଳୁଛି ।ପୁଣି ବିନା ୱାଇ ଫର୍ମରେ କରାଯାଉଛି ବାଲି ପରିବହନ।କେବଳ ତଦାରଖର ସୁରାକ ମିଳିଲେ ତରବରିଆଭାବେ ହାତଗଣତି କିଛି ୱାଇ ଫର୍ମ କାଟିଦିଆଯାଇଥାଏ ।ସ୍ପଷ୍ଟ ଦିବାଲୋକରେ ବିଭାଗୀୟ ଅଧିକାରୀ ଓ ତୃଣମୂଳ ସ୍ତରର କର୍ମଚାରୀମାନେ ପ୍ରତିଦିନ ବାଲିଘାଟରେ ହେଉଥିବା ବେଆଇନ କାର୍ଯ୍ୟକୁ ଜଳଜଳ କରି ଦେଖୁଥିଲେ ମଧ୍ୟ ଯଥାସମୟରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରା ନ ଯିବା ୫-ଟି ନୀତିର ସ୍ୱଚ୍ଛତା ପ୍ରତି ଅଙ୍ଗୁଳି ନିର୍ଦ୍ଦେଶ କରୁଛି ।ନିକଟରେ ରାଜସ୍ୱ ନିରୀକ୍ଷକଙ୍କ କାର୍ଯ୍ୟାଳୟ ଥିଲେ ମଧ୍ୟ ରାଜସ୍ୱ ନିରୀକ୍ଷକ ବିରାଡ଼ି ଆଖି ବୁଜି କ୍ଷୀର ପିଇବାର ଅଭିନୟ ଅଞ୍ଚଳବାସୀଙ୍କୁ ସଦା କରିଛି ଚକିତ ।ମାସିକ ମୋଟା ଅଙ୍କର ବକ୍ସିସ କାରବାର ଯୋଗୁଁ ବିଭାଗୀୟ ଅଧିକାରୀ ଓ କର୍ମଚାରୀମାନେ ଆଦୌ ପାଟି ଖୋଲୁ ନ ଥିବା ବିଷୟ ସାଧାରଣରେ ଚର୍ଚ୍ଚା ଜୋର ଧରିଛି ।ବିଭାଗୀୟ ଅଧିକାରୀଙ୍କ ଦୁର୍ନୀତି ଖୋର ଓ ଅପାରଗତା ମନୋଭାବ ପାଇଁ ରାତିପାହିଲେ ଏଠାରେ ଜମୁଛି ବାଲିମାଫିଆମାନଙ୍କ ଜମାଣିଆ ଆସର ।କଳାପଥର ପରେ ବାଲିମାଫିଆମାନଙ୍କର ଦୌରାତ୍ମ୍ୟ ବର୍ତ୍ତମାନ ଅସହ୍ୟ ହେବାକୁ ଲାଗିଲାଣି ।ଏଥିନେଇ ବାରମ୍ବାର ଅଭିଯୋଗ କଲେ ତାହା ଯଥା ପୂର୍ବାଂ ତଥା ପରଂ ବୋଲି ଅନୁଭୂତ ହେଉଛି ।ଭାରିଯାନ ଯାତାୟାତ କରିବା କାରଣରୁ ବ୍ରାହ୍ମଣୀ ନଦୀବନ୍ଧ କ୍ରମଶଃ  ଦୁର୍ବଳ ହେଉଥିବାରୁ ନଦୀକୂଳବର୍ତ୍ତୀ ଅଞ୍ଚଳର ଲୋକମାନଙ୍କ ଜୀବନ ପ୍ରତି ବିପଦ ଆଶଙ୍କା ଦେଖାଦେଇଛି ।ଏ ସମ୍ପର୍କରେ ଧର୍ମଶାଳା ତହସିଲଦାର ଦେବୀ ପ୍ରସାଦ ମହାନ୍ତିଙ୍କ ସହିତ ଯୋଗାଯୋଗ କରାଯାଇଥିଲେ ସୁଦ୍ଧା କୌଣସି ଉତ୍ତର ମିଳିପାରି ନ ଥିଲା ।ତେଣୁ ଜିଲ୍ଲା ପ୍ରଶାସନ ଏଥିପ୍ରତି ସ୍ୱତନ୍ତ୍ର ଦୃଷ୍ଟି ଦେଇ ବିଧିବଦ୍ଧ ସରଜମିନ ତଦନ୍ତ କରିବା ପୂର୍ବକ ବାଲିମାଫିଆମାନଙ୍କ ଉପରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସାଧାରଣରେ ଦୃଢ ଦାବି ହେଉଛି ।