10-Aug-2026

ସୋନପୁର (ମନୋରଞ୍ଜନ ତ୍ରିପାଠୀ )
 ଓଡ଼ିଶାର ଭାତହାଣ୍ଡି ଭାବେ ପରିଚିତ ପଶ୍ଚିମ ଓଡ଼ିଶାର ପ୍ରମୁଖ ଜିଲ୍ଲା ମାନ ଙ୍କ ମଧ୍ୟରେ ସୁବର୍ଣ୍ଣପୁର ଜିଲ୍ଲା ଧାନ ଉତ୍ପାଦନରେ ଏକ ଅଗ୍ରଣୀ ଜିଲ୍ଲା।ଚାଷୀଙ୍କ ଆୟ ବୃଦ୍ଧି ଓ ଧାନର ଉଚିତ ମୂଲ୍ୟ ପାଇଁ ସରକାର ଏମ୍‌ଏସ୍‌ପି ବ୍ୟତୀତ ଅତିରିକ୍ତ ୮୦୦ ଟଙ୍କା ସହାୟତା ଦେବାର ପ୍ରତିଶ୍ରୁତି ଦେଇଥିଲେ। କିନ୍ତୁ ଏବେ ଧାନ ବିକ୍ରି ପାଇଁ ଚାଷୀ ପଞ୍ଜିକରଣ ପ୍ରକ୍ରିୟାରେ ନୂଆ ନୂଆ ଜଟିଳତା ଚାଷୀଙ୍କ ଚିନ୍ତା ବଢ଼ାଇ ଦେଇଛି। ଏଗ୍ରିଷ୍ଟାକ୍ ଫାର୍ମର୍ ଆଇଡି, ଭାଗଚାଷୀଙ୍କ କ୍ଷେତ୍ରରେ ଜମି ମାଲିକଙ୍କ ଉପସ୍ଥିତି ଭଳି ବିଭିନ୍ନ ପ୍ରକ୍ରିୟା ଚାଷୀଙ୍କ ପାଇଁ ସମସ୍ୟା ସୃଷ୍ଟି କରୁଥିବା ଅଭିଯୋଗ ହେଉଛି। ଏହା ଫଳରେ ଧାନ ବିକ୍ରି ପାଇଁ ପଞ୍ଜିକରଣ କରିବାରେ ଚାଷୀଙ୍କୁ ନାନା ହଇରାଣ ହରକତ ହେବାକୁ ପଡ଼ୁଛି।ସେପଟେ ଚଳିତ ବର୍ଷ ଅଗଷ୍ଟ ୬ ତାରିଖରୁ ପଞ୍ଜିକରଣ ଆରମ୍ଭ ହୋଇ ଅଗଷ୍ଟ ୩୧ ଯାଏଁ ଚାଲିବାକୁ ଥିବାରୁ ଏତେ କମ୍ ସମୟ ମଧ୍ୟରେ ସମସ୍ତ ଚାଷୀଙ୍କ ପଞ୍ଜିକରଣ ସମ୍ପୂର୍ଣ୍ଣ ହେବ କି ନାହିଁ, ତାକୁ ନେଇ ଚାଷୀଙ୍କ ମଧ୍ୟରେ ଆଶଙ୍କା ପ୍ରକାଶ ପାଇଛି।ବର୍ତ୍ତମାନ ଚାଷୀଙ୍କ ପାଇଁ ଚାଷ କାର୍ଯ୍ୟ ସହ ପଞ୍ଜିକରଣ ମଧ୍ୟ ଜରୁରୀ। ଏଭଳି ସମୟରେ ପଞ୍ଜିକରଣ ପ୍ରକ୍ରିୟାରେ ଜଟିଳତା ଏବଂ ସମୟର ଅଭାବ ଚାଷୀଙ୍କ ସମସ୍ୟାକୁ ଆହୁରି ବଢ଼ାଇ ଦେଇଛି।ଅନ୍ୟପଟେ ସୁବର୍ଣ୍ଣପୁର ଜିଲ୍ଲାରେ ବର୍ତ୍ତମାନ ହାଇଟେକ୍ ସର୍ଭେ କାର୍ଯ୍ୟ ଚାଲିଥିବାରୁ ଅନେକ ଚାଷୀ ତହସିଲ୍‌ରୁ ନିଜ ନାମରେ ଜମି ପଟ୍ଟା କରିବାରେ ମଧ୍ୟ ସମସ୍ୟାର ସମ୍ମୁଖୀନ ହେଉଥିବା ଅଭିଯୋଗ ହେଉଛି।ତେଣୁ ପୂର୍ବଭଳି ସହଜ ଓ ସରଳ ପ୍ରକ୍ରିୟାରେ ସମସ୍ତ ଯୋଗ୍ୟ ଚାଷୀଙ୍କୁ ଧାନ ବିକ୍ରି ପାଇଁ ପଞ୍ଜିକରଣର ସୁଯୋଗ ଦେବା ସହ ପଞ୍ଜିକରଣ ଅବଧିକୁ ଅତିକମ୍‌ରେ ଆଉ ଏକ ମାସ ବୃଦ୍ଧି କରିବାକୁ ଦାବି ହୋଇଛି।ସମସ୍ୟାର ତୁରନ୍ତ ସମାଧାନ ନହେଲେ ଆଗାମୀ ଦିନରେ ବ୍ୟାପକ ଚାଷୀ ଆନ୍ଦୋଳନ ହୋଇପାରେ। ଏପରିକି ଆଗାମୀ ପଞ୍ଚାୟତ ନିର୍ବାଚନରେ ଏହାର ଜବାବ ଦେବାକୁ ଚାଷୀକୁଳ ବାଧ୍ୟ ହେବେ ବୋଲି ଚେତାବନୀ ଦେଇଛି ସୁବର୍ଣ୍ଣପୁର ଜିଲ୍ଲା ଚାଷୀ ସଂଗଠନ ଏକ ସାମ୍ବାଦିକ ସମ୍ମିଳନୀ ମାଧ୍ୟମରେ।