10-Aug-2026

ସିନାପାଲି (ଡୋଲେଶ୍ୱର  ବାଗ )
ନୂଆପଡ଼ା ଜିଲ୍ଲା ଜିଲ୍ଲା ସିନାପାଲି ଥାନା ଅଧୀନ ପଦରଭଟା ସ୍ଥିତ ବିଜୁ ଏକ୍ସପ୍ରେସ୍ ୱେରେ ରବିବାର ଭୋର ସମୟରେ ଘଟିଛି ଏକ ମର୍ମଦନ୍ତ ସଡ଼କ ଦୁର୍ଘଟଣା। ହଳ ଚାଷ କରିବା ପାଇଁ ବଳଦ ନେଇ ଯାଉଥିବା ବେଳେ ଜଣେ ଚାଷୀଙ୍କୁ ପଛପଟୁ ଆସୁଥିବା ୧୦୮ ଆମ୍ବୁଲାନ୍ସ ଧକ୍କା ଦେଇ ଥିବାରୁ ତାଙ୍କର ଅକାଳ ମୃତ୍ୟୁ ଘଟିଛି। ମୃତକ ହେଲେ ସିନାପାଲି ବ୍ଲକ ଗୋଡାଲ ଗ୍ରାମ ପଞ୍ଚାୟତ ଅନ୍ତର୍ଗତ ଡଙ୍ଗରଗାଁର ଭାରତ ପାତ୍ର (୬୮)। ସ୍ଥାନୀୟ ଲୋକଙ୍କ କହିବା ଅନୁସାରେ, ଭାରତ ପାତ୍ର ଭୋର ସକାଳୁ ହଳ ଚାଷ କରିବା ପାଇଁ ବଳଦ ନେଇ କାପସି ସ୍ଥିତ ପଦରଭଟା ଅଭିମୁଖେ ଯାଇଥିଲେ। ଏହି ସମୟରେ ବିଜୁ ଏକ୍ସପ୍ରେସ୍ ୱେରେ ପଛପଟୁ ଆସୁଥିବା ୧୦୮ ଆମ୍ବୁଲାନ୍ସ (ନଂ. OD 02 CQ 8211) ତାଙ୍କୁ ଧକ୍କା ଦେଇଥିଲା। ଧକ୍କାରେ ଭାରତ ଗୁରୁତର ଆହତ ହୋଇଥିଲେ। ଘଟଣାର ଖବର ପାଇ 
ସିନାପାଲି ପୁଲିସ ଘଟଣାସ୍ଥଳରେ ପହଞ୍ଚିଥିଲା। ପୁଲିସ ତୁରନ୍ତ ଭାରତ ପାତ୍ରଙ୍କୁ ଉଦ୍ଧାର କରି  ସିନାପାଲି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ନେଇଥିଲା। ଡାକ୍ତର ସେଠାରେ ଭାରତ ପାତ୍ରଙ୍କୁ ମୃତ ଘୋଷଣା କରିଥିଲେ ।
ଘଟଣା ପରେ ମୃତକଙ୍କ ପରିବାର ପକ୍ଷରୁ କ୍ଷତିପୂରଣ ଦାବି କରାଯାଇଥିଲା। ସୂଚନା ପାଇ ସିନାପାଲି ତହସିଲଦାର ଘଟଣାସ୍ଥଳରେ ପହଞ୍ଚି ରେଡକ୍ରସ୍ ପାଣ୍ଠିରୁ ୧୦ ହଜାର ଟଙ୍କା ସହାୟତା ପ୍ରଦାନ କରିଥିଲେ। ଏଥିସହ ପରିବାରକୁ ଆବଶ୍ୟକ ସହାୟତା ଯୋଗାଇଦେବାକୁ ପ୍ରତିଶ୍ରୁତି ଦେଇଥିଲେ। ପରେ ସିନାପାଲି ପୁଲିସ ଶବ ବ୍ୟବଚ୍ଛେଦ କରାଇ ମୃତଦେହକୁ ପରିବାର ବର୍ଗଙ୍କୁ ହସ୍ତାନ୍ତର କରିଛି। ଏନେଇ ସିନାପାଲି ପୁଲିସ ମାମଲା ରୁଜୁ କରି ଦୁର୍ଘଟଣାର ପ୍ରକୃତ କାରଣ ସମ୍ପର୍କରେ ଅଧିକ ଦଦନ୍ତ ଜାରି ରଖୁଛି। ଭୋର ସକାଳୁ ହଳ ଚାଷ ପାଇଁ ବଳଦ ନେଇ ଘରୁ ବାହାରିଥିବା ଭାରତ ପାତ୍ରଙ୍କ ଏଭଳି ଅକାଳ ମୃତ୍ୟୁରେ ଡ଼ଙ୍ଗରଗାଁ ସମେତ ଅଞ୍ଚଳରେ ଶୋକର ଛାୟା ଖେଳିଯାଇଛି।