21-Jun-2021

 ସମ୍ବଲପୁର,ସଂଜୀବପାଣିଗ୍ରାହୀଙ୍କରିପୋର୍ଟ): ସମ୍ବଲପୁର ଜ଼ିଲ୍ଲା ବାମରା ବ୍ଲକର ବରିଷ୍ଠ  ସାମ୍ବାଦିକ ଜ୍ୟୋତି କୁମାର ଲାଠ ଙ୍କ ନାମରେ ଝାରସୁଗୁଡ଼ା ଆର୍‌ପିଏଫ ପକ୍ଷରୁ ସମନ ଜାରି କରାଯିବା ଘଟଣା କୁ ସାମ୍ବାଦିକ ସଂଘ ଗୁଡ଼ିକ ପକ୍ଷରୁ ଦୃଢ ନିନ୍ଦା କରାଯାଇଛି । ଓଡିଶା ସାମ୍ବାଦିକ ସଂଘ (ଓଜେୟୁ) ସମ୍ବଲପୁର ଜ଼ିଲ୍ଲା ଶାଖା ପକ୍ଷରୁ ସାମ୍ବାଦିକ ଶ୍ରୀ ଲାଠ ଙ୍କ ନାମରେ ଆର୍‌ପିଏଫ ପକ୍ଷରୁ ସମନ ଜାରି ଘଟଣା କୁ ଦୃଢ ନିନ୍ଦା କରାଯିବା ସହିତ ତୁରନ୍ତ କେସ୍ ପ୍ରତ୍ୟାହାର ପାଇଁ ଦାବି ହୋଇଛି I ଏଠାରେ ସୂଚନା ଯୋଗ୍ୟ ଯେ ସମ୍ବଲପୁର ଜ଼ିଲ୍ଲା ବାମରା କ୍ରିୟାନୁଷ୍ଠାନ କମିଟିର ଆହ୍ୱାନ କ୍ରମେ ଗତ ଡିସେମ୍ବର ୧୫ ତାରିଖ ରେ ବାମରା ରେଳ ଷ୍ଟେସନ ଠାରେ ରେଳରୋକୋ କରାଯାଇଥିଲା I ଏଥିରେ କମିଟିର ସଦସ୍ୟଙ୍କ ସମେତ ଶତାଧିକ ଗ୍ରାମବାସୀ ଅଂଶଗ୍ରହଣ କରିଥିଲେ I ଏହି ପରିପ୍ରେକ୍ଷୀରେ ବିଭିନ୍ନ ଗଣମାଧ୍ୟମର ପ୍ରତିନିଧି ଓ ସାମ୍ବାଦିକ ଖବର ସଂଗ୍ରହ କରିଥିଲେ I ସେମାନଙ୍କ ମଧରେ ବାମରା ବ୍ଲକର ବରିଷ୍ଠ ସାମ୍ବାଦିକ ଜ୍ୟୋତି କୁମାର ଲାଠ ମଧ୍ୟ ଉପସ୍ଥିତ ଥିଲେ I ଆନ୍ଦୋଳନ ରତ ସଂଗ୍ରାମୀଙ୍କ ସହ ରେଲୱେର ଉଚ୍ଚ ଅଧିକାରୀ, ଆର୍‌ପିଏଫ, ଜିଆର୍‌ପି, ସ୍ଥାନୀୟ ପୋଲିସ, ପ୍ରଶାସନିକ ଅଧିକାରୀ ଉପସ୍ଥିତ ରହି ଲିଖିତ ପ୍ରତିଶ୍ରୁତି ଦେବା ପରେ ଆନ୍ଦୋଳନକୁ ସ୍ଥଗିତ ରଖାଯାଇଥିଲା। ଏଥିରେ କାହାରି ନାମରେ କୌଣସି ମାମଲା ରୁଜ୍ଜୁ କରାଯିବ ନାହିଁ ବୋଲି ପ୍ରତିଶ୍ରୁତି ଦିଆଯାଇଥିଲା। ମାତ୍ର ପରବର୍ତ୍ତୀ ସମୟରେ ଆନ୍ଦୋଳନକାରୀ ଙ୍କ ନାମରେ ଆର୍‌ପିଏଫ୍ ପକ୍ଷରୁ ଗୋଟେ ପରେ ଗୋଟିଏ ସମନ ଜାରି କରାଯାଇଥିଲା। ଏହା ସହିତ ସାମ୍ବାଦିକ ଶ୍ରୀ ଲାଠ ଙ୍କ ନାମ ରେ ମଧ୍ୟ ସମନ ଜାରି କରାଯାଇଥିବା ଜଣାପଡ଼ିଛି। ଆଗାମୀ ୨୩ ତାରିଖରେ ଝାରସୁଗୁଡ଼ା ଆର୍‌ପିଏଫ୍ ଥାନାରେ ଉପସ୍ଥିତ ରହି ପକ୍ଷ ରଖିବାକୁ ସମନ ରେ ଉଲ୍ଲେଖ ରହିଛି I
        ଘଟଣାସ୍ଥଳକୁ ଖବର ସଂଗ୍ରହ ପାଇଁ ଯାଇଥିବା ଜଣେ କର୍ତ୍ତବ୍ୟରତ ବରିଷ୍ଠ ସାମ୍ବାଦିକ ଙ୍କ ପ୍ରତି ଆର୍‌ପିଏଫ୍ ର ଏଭଲି ଆଚରଣ କୁ ଓଡିଶା ସାମ୍ବାଦିକ ସଂଘ (ଓଜେୟୁ) ସମ୍ବଲପୁର ଜ଼ିଲ୍ଲା ଶାଖା ଜ଼ିଲ୍ଲା ସଭାପତି ହିମାଂଶୁ ଶେଖର ମିଶ୍ର ଏବଂ ଜ଼ିଲ୍ଲା ସମ୍ପାଦକ ସରୋଜ ସାହୁ ଦୃଢ ନିନ୍ଦା କରିବା ସହିତ ସାମ୍ବାଦିକ ଶ୍ରୀ ଲାଠ ଙ୍କ ନାମରେ ରୁଜ୍ଜୁ ମାମଲା ତୁରନ୍ତ ପ୍ରତ୍ୟାହାର କରିବା ପାଇଁ ଦାବି କରିଛନ୍ତି I