09-Aug-2026

​ବଲାଙ୍ଗିର: ଜନ୍ମରୁ ସେମାନେ କଥା କହିପାରନ୍ତି ନାହିଁ। ନିଜର ଦୁଃଖ-ସୁଖ, ଭଲପାଇବାକୁ ଅଭିବ୍ୟକ୍ତ କରିବା ପାଇଁ ସେମାନଙ୍କ ପାଖରେ ଶବ୍ଦ ବି ନଥିଲା, ବାସ୍ ଥିଲା ଦୁଇଟି ମନର ଅନାବିଳ ଭଲପାଇବା। ହେଲେ ସମାଜର ନିଷ୍ଠୁର ଜାତିପ୍ରଥା ଓ ପରିବାରର ସଂକୀର୍ଣ୍ଣତା ଆଗରେ ସେମାନଙ୍କ ଶାନ୍ତ ବିଶ୍ୱ ଆଜି ପୁଣି ଥରେ ହାର୍ ମାନିଛି। ଜୀବିତ ଅବସ୍ଥାରେ ଯେଉଁ ପରିବାର ତେଜ୍ୟ କରିଦେଇଥିଲା, ମୃତ୍ୟୁ ପରେ ବି ସେହି ନିଜ ଲୋକମାନେ ଟିକିଏ ଦୟା ଦେଖାଇଲେ ନାହିଁ। ଶେଷରେ

“​ଆନ୍ତଃଜାତି ବିବାହ ପାଇଁ ଜୀବନସାରା ପର ହୋଇ ରହିଗଲେ ପୁଅ-ବୋହୂ

ଅସହାୟ ସ୍ତ୍ରୀ ଓ ଶାଶୂଙ୍କ ଆଖିର ଲୁହ ପୋଛି ମାନବିକତାର ପରିଚୟ ଦେଇଥିଲା ବଲାଙ୍ଗିର ସ୍ୱେଚ୍ଛାସେବୀ ସଂଗଠନ।ବଲାଙ୍ଗିର ସ୍ଥିତ ସାଲେପାଲିର ୪୧ ବର୍ଷୀୟ ମନୋଜ ବଗର୍ତ୍ତୀ ଜନ୍ମରୁ ମୂକ ଥିଲେ। ଆଜିକୁ ୮ ବର୍ଷ ତଳେ ସେ ବଲାଙ୍ଗିର ସହର ଟିକ୍ରାପଡାର ମଧୁମିତା ସାହୁଙ୍କୁ ପ୍ରେମ ବିବାହ କରିଥିଲେ। ମଧୁମିତା ମଧ୍ୟ ଜନ୍ମରୁ କଥା କହିପାରନ୍ତି ନାହିଁ। ଦୁଇ ଅସହାୟ ହୃଦୟ ଏକାଠି ହୋଇ ସଂସାର ଗଢ଼ିବାକୁ ସ୍ୱପ୍ନ ଦେଖିଥିଲେ ସତ, ହେଲେ ସେମାନଙ୍କର ଆନ୍ତଃଜାତି ବିବାହକୁ ମନୋଜଙ୍କ ପରିବାର ଗ୍ରହଣ କରିନଥିଲେ। ସମ୍ପର୍କର ଏହି କଠୋରତା ଯୋଗୁଁ ବିବାହ ପରଠାରୁ ମନୋଜ ନିଜ ଘର ଛାଡ଼ି ଟିକ୍ରାପଡା ସ୍ଥିତ ଶ୍ୱଶୁର ଘରେ ରହିଆସୁଥିଲେ।

ମୃତ୍ୟୁ ପରେ ବି ତରଳିଲାନି ଆପଣା ଲୋକଙ୍କ ମନ

ଗତ କିଛିଦିନ ହେବ ଶାରୀରିକ ଅସୁସ୍ଥତା ଯୋଗୁଁ ମନୋଜଙ୍କୁ ଭୀମ ଭୋଇ ମେଡିକାଲ କଲେଜ ହସ୍ପିଟାଲରେ ଭର୍ତ୍ତି କରାଯାଇଥିଲା। ଚିକିତ୍ସାଧୀନ ଅବସ୍ଥାରେ ଆଜି ଭୋର୍‌ ୫ଟାରେ ତାଙ୍କର ମୃତ୍ୟୁ ଘଟିଥିଲା। ସ୍ୱାମୀଙ୍କ ଆକସ୍ମିକ ମୃତ୍ୟୁ ପରେ ଦୁଃଖରେ ଭାଙ୍ଗିପଡ଼ିଥିବା ମଧୁମିତା ତୁରନ୍ତ ମନୋଜଙ୍କ ପରିବାରକୁ ଖବର ଦେଇଥିଲେ। ଆଶା ଥିଲା ମୃତ୍ୟୁ ହୁଏତ ଆପଣା ଲୋକଙ୍କ ହୃଦୟକୁ ତରଳାଇ ଦେବ। କିନ୍ତୁ ସମାଜର ନିଷ୍ଠୁରତା ସୀମା ପାର୍ କରିଥିଲା। ପରିବାର ଲୋକ ସ୍ପଷ୍ଟ ଭାବେ ମନା କରିଦେଇଥିଲେ ଯେ, ସେମାନେ ନା ମରଶରୀର ଦେଖିବେ, ନା ଅନ୍ତିମ ସଂସ୍କାର କରିବେ।

ଏହିଭଳି ମାନସିକ ଯନ୍ତ୍ରଣା ଓ ପରିବାରର ଅସହଯୋଗ ଭିତରେ ମଧୁମିତା ଓ ତାଙ୍କ ମାଁ ମନୋଜଙ୍କ ଶବକୁ ଟିକ୍ରାପଡାସ୍ଥିତ ଘରକୁ ଆଣିଥିଲେ। ଘର ଭିତରେ ମୃତଶରୀର ପଡ଼ିରହିଥିବା ବେଳେ ଦୁଇ ଅସହାୟ ମହିଳା ଶବ ପାଖରେ ବସି କାନ୍ଦି କାନ୍ଦି ନିଜର ଦୁଃଖ ନିଜେ ପିଉଥିଲେ। ସେମାନଙ୍କ ପାଖରେ ନା ଥିଲା କୋକେଇ ବୋହିବାକୁ କାନ୍ଧ, ନା ଥିଲା ଅନ୍ତିମ ସଂସ୍କାର ପାଇଁ ଲୋକବଳ।
​
ଏହି ଦୁଃଖଦ ଖବର ପାଇବା କ୍ଷଣି ବଲାଙ୍ଗିର ସ୍ୱେଚ୍ଛାସେବୀ ସଂଗଠନର ସଦସ୍ୟମାନେ ତୁରନ୍ତ ଟିକ୍ରାପଡା ବାସଭବନରେ ପହଞ୍ଚିଥିଲେ। ଅସହାୟ ପରିବାରକୁ ସାନ୍ତ୍ୱନା ଦେବା ସହ ସମସ୍ତ ପରିସ୍ଥିତି ସମ୍ପର୍କରେ ପଚାରି ବୁଝିଥିଲେ। ଏହାପରେ ସଂଗଠନ ପକ୍ଷରୁ ସ୍ୱର୍ଗ ରଥରେ ମନୋଜଙ୍କ ମରଶରୀରକୁ ବିଭୂତିପଡା ସ୍ଥିତ ଶ୍ମଶାନଘାଟକୁ ନିଆଯାଇଥିଲା। ସେଠାରେ ସମ୍ମାନର ସହ ତାଙ୍କର ଶେଷକୃତ୍ୟ ସମ୍ପାଦନ କରାଯାଇଥିଲା। ​ଏହି ମାନବୀୟ କାର୍ଯ୍ୟରେ ବଲାଙ୍ଗିର ସ୍ୱେଚ୍ଛାସେବୀ ସଂଗଠନର ଗୋବିନ୍ଦ ଚନ୍ଦ୍ର ଶତପଥୀ, ଉତ୍ତମ ନନ୍ଦ, ବବିତା ପୁଟେଲ୍, ପ୍ରକାଶ ସାହୁ, ସାଗର ଚନ୍ଦନ ଓ ସରୋଜ ଜାଲ ପ୍ରମୁଖ ଉପସ୍ଥିତ ରହି ଶେଷକୃତ୍ୟର ସମସ୍ତ ଦାୟିତ୍ୱ ତୁଲାଇଥିଲେ।