14-Jun-2021

ବିନିକା (ହିମାଂଶୁ ଶେଖର ପୁଟେଲ) :ଯେତେ ହାରି ଗୁହାରି କଲେ ମଧ୍ୟ ଚାଷୀଙ୍କ ଦୁଃଖ କେହି ବୁଝୁ ନାହାନ୍ତି l ଫଳରେ ଧାନବିକ୍ରି କରି ନ ପାରି ଚାଷୀ ତଳିତଳାନ୍ତ ହେଉଛି l କେବଳ ପ୍ରଶାସନ ତରଫରୁ ପ୍ରତିଶ୍ରୁତି ଛଡ଼ା ଆଉ କିଛି ମିଳୁନାହିଁ l ପ୍ରାକ ମୌସୁମୀ ଆଗମନ କରିଥିବାରୁ ଚାଷୀଙ୍କ ପାଇଁ ଧାନବିକ୍ରି ସମସ୍ୟା ଆହୁରି ଚିନ୍ତାଜନକ ପରିସ୍ଥିତିରେ ପକାଇ ଦେଇଛି l ଦେଖିବାକୁ ମିଳିଛି ବିନିକା ବ୍ଲକ ଅନ୍ତର୍ଗତ ମେଘଲା ମଣ୍ଡିରେ l କିଛି ଦିନତଳେ ଏହି ମଣ୍ଡିରେ ଧାନବିକ୍ରି ସମସ୍ୟା ଯୋଗୁଁ ଚାଷୀ ତାଲା ମାରିଥିଲେ l ପ୍ରଶାସନର ହସ୍ତକ୍ଷେପ ପରେ ସମାଧାନ ହୋଇଥିଲା l ସୁରୁଖୁରରେ ଧାନକିଣା ଚାଲିଲା l କିନ୍ତୁ ଏହି ମଣ୍ଡିରେ କିଣୁଥିବା ଶିବାନୀ ସ୍ଵୟଂ ସହାୟକ ଗୋଷ୍ଠୀ ବିରୋଧରେ ଆଜି ଚାଷୀମାନେ ଅଭିଯୋଗ ଆଣି ପୁଣି ଧାନକ୍ରୟ ସେଣ୍ଟରକୁ ତାଲା ପକାଇ ଦେଇଛନ୍ତି l ସୂଚନା ଯୋଗ୍ୟ ଯେ କାହାର ଟୋକନ ଲେପସ୍ ହୋଇଥିବା ବେଳେ ଆଉ କାହାର ଟୋକନ ଅବଧି ସରିବାକୁ ବସିଲାଣି l ଠିକ ଭାବରେ ଗାଡ଼ି ନ ଆସିବା ଏବଂ ମିଲର ଯା ମନମୁଖୀ ଯୋଗୁଁ ଧାନ ଉଠି ପାରୁନଥିବା ଚାଷୀ ଅଭିଯୋଗ କରିଛନ୍ତି l ଫଳରେ ଚାଷୀଙ୍କ ସହସହ ବସ୍ତା ଧାନ ପଡ଼ିରହିଛି l ଧାନ ନ ଉଠିଲେ ତାଲା ପଡ଼ିବ ବୋଲି ଚାଷୀ ଅଡି ରହିଥିବା ବେଳେ ପୋଲିସ ଘଟଣାସ୍ଥଳ କୁ ପହଞ୍ଚି ତାଲା ଖୋଲିଥିଲା l କାଳେ କୋନୋଷି ଅପ୍ରତିକର ପରିସ୍ଥିତି ଉପୁଜିବାର ସମ୍ଭାବନା ଥିବାରୁ ମଣ୍ଡିରେ ପୋଲିସ ମୁତୟନ ଥିବା ଦେଖାଯାଇଛି l