11-Jun-2021

ସୁବର୍ଣ୍ଣପୁର (ମନୋରଞ୍ଜନ ତ୍ରିପାଠୀ) :  ଗତ ମଙ୍ଗଳବାର ଦିନ କୋଭିଡ କଟକଣା ଓ ଯଥା ରୀତିନୀତି  ସହିତ  ସ୍ଥାନୀୟ ଚନ୍ଦ୍ରଶେଖର ମନ୍ଦିରରେ ଥାଳ ଉଠା କାର୍ଯ୍ୟକ୍ରମ ଓ  ପୂଜା ଅର୍ଚନା କରାଯାଇ ସୁବର୍ଣ୍ଣପୁର ସହରର ପ୍ରସିଦ୍ଧ ଶୀତଳ ଷଷ୍ଠୀ ଯାତ୍ରା ଆରମ୍ଭ ହୋଇଛି l ଏବର୍ଷ ମା ପାର୍ବତୀଙ୍କ ମାତା ପିତା ପ୍ରତିନିଧି  ଭାବେ ଥନାପତି ପଡା ର  ପି. ରାଜେଶ୍ୱରୀ ରାଓ  ଓ  ପି. ସିମାଞ୍ଚଳ ଙ୍କୁ ପୂଜା କମିଟି ଚୟନ କରିଥିବା ବେଳେ ବର ଶିବ ପିତା ମାତାଙ୍କ ପ୍ରତିନିଧି ଭାବେ ଶାନ୍ତି ନଗର ପଡାର ଅର୍ଜୁନ ରଥ ଓ ରାଲି ରଥଙ୍କୁ  ଏବର୍ଷ ପୁଣିଥରେ ମହାପ୍ରଭୁଙ୍କ ସେବାରେ ସମର୍ପଣ ହେବାକୁ ଅପୂର୍ଵ ସୁଯୋଗ ମିଳିଛି l ଆଜି ଜ଼ିଲ୍ଲା କୋଷାଗାରରୁ ସୁବର୍ଣ୍ଣପୁର ଏସ. ପି ଶ୍ରୀ ସୀତାରାମ ଶତପଥିଙ୍କ ଉପସ୍ଥିତିରେ ଶ୍ରୀ ଚନ୍ଦ୍ରଶେଖର ମହାପ୍ରଭୁ (108 ତୋଳା ର ନାଗମୂର୍ତ୍ତି) ଙ୍କୁ ମନ୍ଦିର ଅଭିମୁଖେ ବିଜେ କରାଯାଇଛି  l ସୁବର୍ଣ୍ଣପୁରର ଅଧିଷ୍ଠାତା  ଶ୍ରୀ ସୁବର୍ଣ୍ଣମେରୁ ବାବା ଙ୍କ  ନିମନ୍ତ୍ରଣ ଓ ଆଗମନ  ପାଇଁ ମହଣ ମହଣ ରୁପାରେ ନିର୍ମିତ ପାଲିଙ୍କି ବିଜେ ହୋଇଛି l ଯାତ୍ରାରେ ଖୁବ ସାଜସଜ୍ଜା ହୋଇଥିବା  ବର ପିତା କନ୍ୟା ପିତାଙ୍କ ବାସଭବନ ମହାପ୍ରଭୁ ଙ୍କୁ ଦର୍ଶନ  ସମେତ  ଶୀତଳ ଷଷ୍ଠୀ  ଯାତ୍ରାର  ଶିବ ବିବାହ ଓ

ମହାପ୍ରଭୁଙ୍କ ମନ୍ଦିର  ପ୍ରତ୍ୟାବର୍ତନ ବେଳେ ଆଶୀର୍ବାଦ ଭିକ୍ଷା ପାଇଁ  କାହିଁ କେଉଁ ରାଜା ରାଜୁଡା ଅମଳରୁ ଲକ୍ଷ ଲକ୍ଷ ଭକ୍ତ ଶ୍ରଦ୍ଧାଳୁଙ୍କ ଭିଡ଼ ଲାଗି ଲାଗେ  l  ଏହା ସୁବର୍ଣ୍ଣପୁର ଶୀତଳ ଷଷ୍ଠୀ ଯାତ୍ରାର ମୁଖ୍ୟ ଆକର୍ଷଣ ଅଟେ l

   ଭିଡ଼କୁ ନିୟନ୍ତ୍ରଣ କରିବାକୁ ଓ ଶାନ୍ତି ଶୃଙ୍ଖଳା ରକ୍ଷା କରିବାକୁ ବିଭିନ୍ନ ସାମାଜିକ ଅନୁଷ୍ଠାନ ଓ  ପୋଲିସ ପ୍ରଶାସନ ପୂର୍ବ ରୁ ପ୍ରସ୍ତୁତ ଓ  ସଜାଗ ହୋଇଥାନ୍ତି l ଗତ ବର୍ଷ  ରୁ କିନ୍ତୁ   କରୋନା ସଂକ୍ରମଣର ଭାୟାବହତାକୁ ନଜର ରେ  ରଖି  ଖୁବ 

ନିରାଡ଼ମ୍ବର ଭାବେ ପୋଲିସ ପ୍ରଶାସନର ସହାୟତାରେ ଏ ଯାତ୍ରା କୁ ପାଳନ କରାଯାଉଛି  l ଆସନ୍ତା 16 ତାରିଖ ଦିନ  ଏବର୍ଷର ଶୀତଳ ଷଷ୍ଠୀ ଯାତ୍ରା ଶିବ ବିବାହ ଓ 17 ତାରିଖ ଦିନ ମହାପ୍ରଭୁଙ୍କ  ନଗର ପରିକ୍ରମା  ଓ  ମନ୍ଦିର ପ୍ରତ୍ୟାବର୍ତନ କାର୍ଯ୍ୟକ୍ରମ ଅନୁଷ୍ଠିତ ହେବାକୁ ସ୍ଥିର ହୋଇଛି l ଆଜିଠୁ ସହର ଚଳ ଚଞ୍ଚଳ ଓ ଉତ୍ସବ ମୁଖର ଜଣାପଡିଛି l