08-May-2021

ଭୁବନେଶ୍ୱର, (ଶୁଭାଶିଷ ନାୟକ): ଆପଣଙ୍କ ରୋଗୀର ଅମ୍ଲଜାନ ସାଚୁରେସନ୍ ଲେଭଲ୍ ୯୩ ଅଛି । ସେ ଏବେ ସୁସ୍ଥ ଅଛନ୍ତି । ରୋଗୀଙ୍କ ମୃତ୍ୟୁର ୧୦ଦିନ ପରେ ଅର୍ଥାତ୍ ଗୁରୁବାର ସନ୍ଧ୍ୟାରେ ସମ୍ପର୍କୀୟଙ୍କୁ ଏଭଳି ଫୋନ୍ କଲ୍ ଆସିଛି । ଏହାଶୁଣି ମୃତକଙ୍କ ପରିବାରଲୋକେ ଆଶ୍ଚର୍ଯ୍ୟ ହେବା ସହ ହସ୍ପିଟାଲ ଅବହେଳା ଯୋଗୁ ତାଙ୍କ ରୋଗୀ ୧୦ଦିନ ହେବ ମରିସାରିଥିବା କହିଥିଲେ । ଏମିତିକି ଏବେ ଏବେ ଦଶତୁଠରୁ କ୍ରିୟାକର୍ମ ସାରି ଫେରୁଛୁ । ଆଉ ଆମ ଅଜା କେମିତି ବଞ୍ଚିଲେ ବୋଲି ନାତି ପ୍ରଶ୍ନ କରିଥିଲେ । ଏହାପରେ ହସ୍ପିଟାଲ କର୍ମଚାରୀ ଜଣକ ଭୁଲ୍ରେ ଫୋନ୍ ଲାଗିଯାଇଥିବା କହି କଲ୍ କାଟିଦେଇଥିଲେ । ପରେ ହସ୍ପିଟାଲକୁ ବାରମ୍ବାର ଫୋନ୍ କରିଥିଲେ ବି କେହି ଉଠାଇନଥିଲେ ।
ସୂଚନା ଅନୁଯାୟୀ, ତାଳଚେର ହାଟତୋଟା ଅଞ୍ଚଳରେ କର୍ଣ୍ଣବୀର ରାୟ(୮୫) ନାମକ ଜଣେ ବରିଷ୍ଠ ନାଗରିକ ରହୁଥିଲେ । ଗତ ଅପ୍ରେଲ୍ ୨୪ ତାରିଖରେ ଶ୍ୱାସକ୍ରିୟାରେ ଅସୁବିଧା ହେବାରୁ ତାଙ୍କୁ ତାଳଚେରର ଏକ ହସ୍ପିଟାଲ୍କୁ ନିଆଯାଇଥିଲା । ପରେ ପରିବାର ଲୋକେ ସେଠାରୁ ତାଙ୍କୁ ଅନୁଗୁଳ ନେଇଆସିଥିଲେ । ଅନୁଗୁଳରେ ତାଙ୍କର ଆର୍ଟିପିସିଆର ଟେଷ୍ଟ କରାଯିବାରୁ ସେ କୋଭିଡ଼ ପଜିଟିଭ୍ ଥିବା ଜଣାପଡ଼ିଥିଲା । ଫଳରେ ଅନୁଗୁଳ ଡାକ୍ତରଖାନା ପକ୍ଷରୁ ତାଙ୍କୁ କଟକ ବଡ଼ମେଡିକାଲ୍କୁ ସ୍ଥାନାନ୍ତର କରାଯାଇଥିଲା । ତେବେ ପରିବାର ଲୋକେ ତାଙ୍କୁ ବଡ଼ମେଡିକାଲ ନନେଇ କଟକସ୍ଥିତ ଏକ ଘରୋଇ ମେଡିକାଲ୍କୁ ନେଇଯାଇଥିଲେ । ହେଲେ ସେଠାରେ ମେଡିକାଲ କର୍ତ୍ତୁପକ୍ଷ ତାଙ୍କୁ ସରକାରୀ କୋଭିଡ ମେଡିକାଲକୁ ନେଇଯିବାକୁ ପରାମର୍ଶ ଦେଇଥିଲେ । ଏହାପରେ ସେମାନେ ବିଏମ୍ସିର ସହାୟତା ନେଇ ୨୫ ତାରିଖରେ ଭୁବନେଶ୍ୱରରେ ଥିବା ଏକ ଘରୋଇ ମେଡିକାଲର କୋଭିଡ ୱାର୍ଡରେ ଭର୍ତ୍ତି କରିଥିଲେ ।