15-Apr-2021

ଭୁବନେଶ୍ୱର, (ଶୁଭାଶିଷ ନାୟକ)ଚିକିତ୍ସାଧୀନ ଅବସ୍ଥାରେ ଫେରାର ହୋଇଥିବା ଗ୍ୟାଙ୍ଗଷ୍ଟର ‌ସେକ୍‌ ହାଇଦରକୁ ତେଲେଙ୍ଗାନାରୁ ଗିରଫ କରାଯାଇଛି । ତେଲେଙ୍ଗାନା ପୁଲିସର ସହାୟତାରେ ହାଇଦରକୁ ଗିରଫ କରିଛି ଓଡିଶା ପୋଲିସ । ଏପ୍ରିଲ ୧୬ ତାରିଖ ଅର୍ଥାତ ଆସନ୍ତାକାଲି ହାଇଦରକୁ ଭୁବନେଶ୍ବର ଅଣାଯିବ । ଏନେଇ ସାମ୍ବାଦିକ ସମ୍ମିଳନୀରେ ସୂଚନା ପ୍ରଦାନ କରିଛନ୍ତି ପୁଲିସ କମିସନର ସୌମେନ୍ଦ୍ର ପ୍ରିୟଦର୍ଶୀ ।

ପୁଲିସ କମିସନର କହିଛନ୍ତି ଯେ,ହାଇଦର ଫେରାର ହୋଇ ତେଲେଙ୍ଗାନାରେ ରହିଥିବାର ସୂଚନା ମିଳିଥିଲା । ଏହାପରେ ଓଡ଼ିଶା ପୁଲିସ ତେଲେଙ୍ଗାନା ର ସଙ୍ଗାରେଡ୍ଡୀ ପୁଲିସ ଓ ହାଇଦ୍ରାବାଦ୍‌ ପୁଲିସ ସହିତ ମିଶି ତାକୁ ଧରିବାକୁ ଅପରେସନ୍ ଆରମ୍ଭ କରିଥିଲା। କଟକରୁ ଯାଇଥିବା ୨ଟି ପୁଲିସ ଟିମ୍‌ ତେଲେଙ୍ଗାନା ପୁଲିସ ସହ ଯୋଗାଯୋଗ ରେ ରହିଥିଲେ । ଆଜି ହାଇଦର ଏକ ବାଇକ୍‌ରେ ଯାଉଥିବା ବେଳେ ମିଳିତ ପୁଲିସର ମିଳିତ ଟିମ୍ ଅତର୍କିତ ଭାବେ ଚଢ଼ାଉ କରି ତାକୁ ଗିରଫ କରିଛି ।

ସୂଚନାଯୋଗ୍ୟ, ପ୍ରଥମେ ହାଇଦରକୁ  ବୁର୍ଲା ହସ୍‌ପିଟାଲରେ ଚିକିତ୍ସା ଲାଗି ଭର୍ତ୍ତି କରାଯାଇଥିଲା । କିନ୍ତୁ ସେଠାରେ ଶରୀର ଭଲ ‌ନହେବାରୁ କଟକ ଏସ୍‌ସିବିକୁ ହାଇଦର ସ୍ଥାନାନ୍ତର କରାଯାଇଥିଲା । କଟକସ୍ଥିତ ଏସ୍‌ସିବି‌ ମେଡିକାଲରେ ଚିକିତ୍ସାଧୀନ ଅବସ୍ଥାରେ ଥିବା ବେଳେ ‌ପୁଲିସକୁ ଚକମା ଦେଖାଇ ଗତ ୧୦ ତାରିଖ‌ରେ ସେ ଫେରାର ହୋଇଯାଇଥିଲା । ହାଇଦରକୁ ଜଗିବା ଦାୟିତ୍ବରେ ଥିବା ସୁରକ୍ଷା କର୍ମୀଙ୍କୁ ନିଶା ଦେଇ ସେ ଫେରାର୍ ହୋଇଯାଇଥିଲା । ବିଭିନ୍ନ ସଙ୍ଗୀନ ଅପରାଧ ମାମଲାରେ ଦୋଷୀସାବ୍ୟସ୍ତ ହୋଇ ହାଇଦର ଆଜୀବନ ଜେଲଦଣ୍ଡ ଭୋଗୁଛି ।