20-Mar-2021

ନୂଆଦିଲ୍ଲୀ (ପ୍ରେରଣା ଖବର ବ୍ୟୁରୋ) ଆସୋସିଏସନ ଫର ଡେମୋକ୍ରାଟିକ ରିଫର୍ମ ଦ୍ୱାରା ପ୍ରକାଶ ପାଇଛି ରାଜନୈତିକ ଦଳ ମାନଙ୍କର ସମ୍ପତ୍ତି ତାଲିକା । ଏଡିଆର ରିପୋର୍ଟ ମୁତାବିକ,ଦେଶର ସମସ୍ତ ଜାତୀୟ ଓ ଆଞ୍ଚଳିକ ଦଳମାନଙ୍କର ମୋଟ ସମ୍ପତ୍ତି ହେଉଛି ପ୍ରାୟ ୭୩୭୨ କୋଟି । ଏହି ସମ୍ପତ୍ତିର ସବୁଠାରୁ ବଡ଼ ଅଂଶ ରହିଛି ଭାରତୀୟ ଜନତା ପାର୍ଟି ପାଖରେ । ଅର୍ଥାତ ବିଜେପି ହେଉଛି ସବୁଠାରୁ ଧନୀ ରାଜନୈତିକ ଦଳ । ଏହାର ମୋଟ ସମ୍ପତ୍ତିର ପରିମାଣ ପ୍ରାୟ ୨୯୦୪ କୋଟି ଟଙ୍କା । ସଂପତ୍ତି ଦୃଷ୍ଟିରୁ କଂଗ୍ରେସକୁ ଏହି ତାଲିକାରେ ୨ୟ ସ୍ଥାନ ମିଳିଛି । ଏହାର ମୋଟ ସଂପତ୍ତିର ପରିମାଣ ପ୍ରାୟ ୯୨୮ କୋଟି ଟଙ୍କା ହେବ ବୋଲି ଆକଳନ କରାଯାଇଛି । ଏହି ତାଲିକାର ତୃତୀୟ ସ୍ଥାନରେ ରହିଛି ବିଏସପି । ମାୟାବତୀଙ୍କ ବହୁଜନ ସମାଜବାଦୀ ପାର୍ଟି ନିକଟରେ ରହିଛି ପ୍ରାୟ ୭୩୮ କୋଟି ଟଙ୍କା ।

ସେହିଭଳି ଅନ୍ୟ ରାଜନୈତିକ ଦଳ ଗୁଡିକ ମଧ୍ୟରେ ସମାଜବାଦୀ ପାଖରେ ୫୭୨.୨୧ କୋଟି,ଏଆଇଏଡିଏମକେ ପାଖରେ ୨୦୨.୬ କୋଟି ଟଙ୍କା ରହିଛି । ଓଡ଼ିଶାରେ ଶାସନ କରୁଥିବା ବିଜୁ ଜନତା ଦଳର ମୋଟ ସଂପତ୍ତି ପରିମାଣ ହେଉଛି ପ୍ରାୟ ୨୩୨.୨୭ କୋଟି ଟଙ୍କା । ଦେଶର ପ୍ରମୁଖ ରାଜନୈତିକ ଦଳଗୁଡ଼ିକ ମୋଟ ସମ୍ପତ୍ତି ହେଉଛି ୭୩୭୨ କୋଟି ଟଙ୍କା  । ଏହାର ଏକ ବଡ଼ ଅଂଶ ଜାତୀୟ ଦଳ ମାନଙ୍କ ପାଖରେ ରହିଛି । ଜାତୀୟ ଦଳଗୁଡ଼ିକର ସଂପତ୍ତି ପରିମାଣ ପ୍ରାୟ ୫୩୪୯ କୋଟି ଟଙ୍କା ଓ ଆଞ୍ଚଳିକ ଦଳଗୁଡ଼ିକର ମୋଟ ସମ୍ପତ୍ତି ପରିମାଣ ପ୍ରାୟ ୨୦୨୩ କୋଟି ଟଙ୍କା ହେବ ବୋଲି ଆକଳନ କରାଯାଇଛି । ୨୦୧୮-୧୯ ମସିହା ସମ୍ପତ୍ତି ଅନୁଯାଇ ଏହି ରିପୋର୍ଟ ପ୍ରକାଶ କରାଯାଇଥିବା କଥା ଏଡିଆର ରିପୋର୍ଟରେ ସ୍ପଷ୍ଟ କରାଯାଇଛି ।