13-Oct-2020

ବଲାଙ୍ଗୀର,୧୩/୧୦(ନିରୋଜ ମିଶ୍ର) ମାରାତ୍ମକ କରୋନା ସମୟରେ ଲୋକଙ୍କୁ ସ୍ୱାସ୍ଥ୍ୟ ସଚେତନ କରିବା ଏବଂ କରୋନା କବଳରୁ ରୋଗୀଙ୍କୁ ରକ୍ଷା କରିବା ଜଣେ ଡାକ୍ତରଙ୍କ ଧର୍ମ ଅଟେ । କରୋନା କାଳରେ ଡାକ୍ତର ଓ ନର୍ସ ମାନେ ହିଁ ଲୋକଙ୍କ ପାଇଁ ଏହି ଧରାପୃଷ୍ଠକୁ ଦେବଦୂତ ହୋଇ ଆସିଛନ୍ତି । ସରକାର ଏମାନଙ୍କୁ ଆଗଧାଡିର କୋଭିଡ଼ ଯୋଦ୍ଧାର ମାନ୍ୟତା ବି ଦେଇଛନ୍ତି । କିନ୍ତୁ ଆଜି ଆମ ସମାଜରେ ଏପରି କିଛି ଡାକ୍ତର ଅଛନ୍ତି ଯୋଉଁ ମାନେ କେବଳ ରୋଗୀ ସେବାରେ ନିଜକୁ ସୀମିତ ନରଖି ସମାଜର ବିବିଧ ଉନ୍ନତିମୂଳକ କାମ ତଥା ମାଗଣାରେ ଚିକିତ୍ସା ସୁବିଧା ପ୍ରଦାନ କରି ସମସ୍ତଙ୍କ ପ୍ରେରଣାର ଉତ୍ସ ପାଲଟିଛନ୍ତି । ଏପରି ଜଣେ ସରକାରୀ ଡାକ୍ତର ଏବଂ କୋଭିଡ ଯୋଦ୍ଧା ହେଉଛନ୍ତି ବଲାଙ୍ଗୀର କୁସଙ୍ଗ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରରେ କାର୍ଯ୍ୟରତ ଯୁବ ଡାକ୍ତର ସୂର୍ଯ୍ୟକାନ୍ତ ମହାପାତ୍ର । କେବଳ ବ୍ୟବସାୟିକ ମନୋବୃତ୍ତି ନରଖି ବଂର ସୂର୍ଯ୍ୟକାନ୍ତ ରୋଗୀରେ ମୁହଁରେ ଚେନାଏ ହସ ଫୁଟାଇବା ପାଇଁ ସବୁବେଳେ ଆଗଭର ହୋଇଥାନ୍ତି । ନିଜର କର୍ମକ୍ଷେତ୍ର କୁସଙ୍ଗ ଗାଁ କୁ ସଫାସୁତୁରା ରଖିବା ପାଇଁ ସୂର୍ଯ୍ୟକାନ୍ତ ସବୁବେଳେ ଚଳଚଞ୍ଚଳ । ସୂର୍ଯ୍ୟକାନ୍ତ ଅନେକ ସମୟରେ ଗାଁ ଦାଣ୍ଡ, ସ୍କୁଲ ପରିସର ଓ ଅନ୍ୟାନ୍ୟ ଆବର୍ଜନାପୂର୍ଣ୍ଣ ସ୍ଥାନକୁ ନିଜ ହାତରେ ସଫ କରିବା ପାଇଁ ଗାଁ ର କିଛି ଯୁବକଙ୍କୁ ଧରି ନିଜର ଅଭିଯାନରେ ଆଗେଇ ଯାଆନ୍ତି । ଆହୁରି ମଧ୍ୟ ସୌମ୍ୟ ସେବା ଫାଉଣ୍ଡେସନ ମାଧ୍ୟମରେ ଡାକ୍ତର ସୂର୍ଯ୍ୟକାନ୍ତ ମହାପାତ୍ର ବିଭିନ୍ନ ଗାଁଗଣ୍ଡାକୁ ଯାଇ ମାଗଣା ସ୍ୱାସ୍ଥ୍ୟ ଶିବିର କାର୍ଯ୍ୟକ୍ରମ ମାନ ଆୟୋଜନ କରିଛନ୍ତି । ଅଭିନବ ଢ଼ଙ୍ଗର  ଏହି ସମାଜସେବା କାର୍ଯ୍ୟ ପାଇଁ ଡାକ୍ତର ସୂର୍ଯ୍ୟକାନ୍ତ ସମସ୍ତଙ୍କ ପ୍ରଶଂସାଭାଜନ ହୋଇପାରିଛନ୍ତି । ରୋଗୀ ସେବା ଓ ନିଜର କର୍ମବ୍ୟସ୍ତତା ଭିତରେ  ସମୟ ବାହାର କରି ଏପରି ମହନୀୟ କାର୍ଯ୍ୟ ହାତକୁ ନେବାର ମାନସିକତା ପ୍ରକୃତରେ ଆଜିର ଦୁନିଆଁରେ ବିରଳ । ଖୁବ କମ ବୟସରେ ରୋଗୀ ସେବାରେ  ନିଜକୁ ସଂପୂର୍ଣ୍ଣ ଉତ୍ସର୍ଗ କରିଥିବା ଏହି ଡାକ୍ତର ବାବୁ ଜଣକ ପ୍ରକୃତରେ ଅନ୍ୟ ଡାକ୍ତର ମାନଙ୍କ ପାଇଁ ପ୍ରେରଣାର ଉତ୍ସ ।