13-Feb-2021

ଚଣ୍ଡିଖୋଲ(ପ୍ରେରଣା ଖବର ବ୍ୟୁରୋ): ପେଟ୍ରୋଲ ପମ୍ପରେ ଦୁର୍ବୃତ୍ତଙ୍କ ବୋମା ମାଡ଼ । ଯାଜପୁର ଜିଲ୍ଲା ବୈରୀଠାରେ ଶୁକ୍ରବାର ରାତି ୧୦ଟା ବେଳେ ଦୁଇ ଜଣ ବ୍ୟକ୍ତି ପେଟ୍ରୋଲ ପମ୍ପକୁ ତେଲ ପକାଇବାକୁ ଆସିଥିଲେ । ଏହି ସମୟରେ ପେଟ୍ରୋଲ ପମ୍ପ ବନ୍ଦ ହେଲାଣି ବୋଲି ପେଟ୍ରୋଲ ପମ୍ପ କର୍ମଚାରୀ କହିଥିଲେ । ଫଳରେ ଦୁଇ ଜଣ ଦୁର୍ବୃତ୍ତ ପେଟ୍ରୋଲ ପମ୍ପ କର୍ମଚାରୀଙ୍କୁ ଆକ୍ରମଣ କରିବା ସହ ପେଟ୍ରୋଲ ପମ୍ପ ସମ୍ମୁଖରେ ବୋମା ପକାଇଥିଲେ ।

ଘଟଣା ସଂପର୍କରେ ଖବର ପାଇ ବୈରୀ ପୋଲିସ ପହଞ୍ଚି ଦୁଇ ଜଣଙ୍କୁ କାବୁ କରିବା ସହ ସେମାନଙ୍କୁ ଥାନାରେ ଅଟକ ରଖିଛି । ବାଇକକୁ ଜବତ କରିବା ସହ ଅଫୁଟା ବୋମା ମଧ୍ୟ ଜବତ କରିଛି ପୋଲିସ । ଆହତ କର୍ମଚାରୀ ମେଡିକାଲରେ ଚିକିତ୍ସା କରାଇ ଘରକୁ ଫେରିଛନ୍ତି । ପେଟ୍ରୋଲ ପମ୍ପ ମ୍ୟାନେଜର ଏ ନେଇ ବୈରୀ ଥାନାରେ ଲିଖିତ ଅଭିଯୋଗ କରିଛନ୍ତି । ତେବେ ଦୁର୍ବୃତ୍ତମାନେ ପେଟ୍ରୋଲ ନଦେବାରୁ ବୋମା ପକାଇଲେ ନା ଅନ୍ୟ କେଉଁ କାରଣରୁ ବୋମା ପକାଇଲେ ସେ ନେଇ ବୈରୀ ପୋଲିସ ଅଧିକ ତଦନ୍ତ ଚଳାଇଛି ।