13-Feb-2021

ପୁରୀ,(ପ୍ରେରଣା ଖବର ବ୍ୟୁରୋ) : ଚାଲିଛି ପ୍ରେମ ସପ୍ତାହ । ପ୍ରେମୀ ଯୁଗଳ ନିଜ ନିଜ ଅନ୍ଦାଜରେ ନିଜ ବନ୍ଧୁ ଓ ବାନ୍ଧବୀଙ୍କୁ ପ୍ରେମ ନିବେଦନ କରୁଛନ୍ତି । ମନର କଥା କହୁଛନ୍ତି । ଶୁକ୍ରବାର ଥିଲା ପ୍ରୋମିସ୍ ଡେ । ଏହି ଦିନରେ ପ୍ରେମକୁ ସବୁଦିନ ଅମର ରଖିବା ପାଇଁ ଓ ସାଥୀର ହାତ ନଛାଡିବା ପାଇଁ ଶପଥ କରିଥିଲେ ପ୍ରେମିକ-ପ୍ରେମିକା । ଏହି ସପ୍ତାହ ଆରମ୍ଭ ହେବା ସମୟରୁ ପୁରୀ ସହରରେ ଅନେକ ପ୍ରେମୀ ଯୁଗଳଙ୍କ ଫଟୋ ଓ ଭିଡିଓ ଭାଇରାଲ ହେବାରେ ଲାଗିଛି । ଶୁକ୍ରବାର ଏପରି ଆଉ ଏକ ଭିଡିଓ ଭାଇରାଲ ହୋଇଛି ଯାହାକୁ ନେଇ ପୁରୀ ସହରରେ ଚର୍ଚ୍ଚା ଜୋର୍ ଧରିଛି । ଏହି ଭିଡିଓରେ ପ୍ରେମିକ ରାଜରାସ୍ତାରେ ପ୍ରେମିକାର ମୁଣ୍ଡରେ ସିନ୍ଦୂର ଲଗାଇବା ସହ ମୁଣ୍ଡିଆ ମାରିଛି ।

ଏଭଳି ଏକ ୭ ସେକେଣ୍ଡର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହୋଇଛି । ମଙ୍ଗଳାପାଟ-ଷ୍ଟଲିଂ ବାଇପାସ୍ ରାସ୍ତାରେ ଏହି ଘଟଣା ଘଟିଛି । ପ୍ରେମୀ ଯୁଗଳଙ୍କ ୟୁନିଫର୍ମରୁ ସେମାନେ ଏକ ନିର୍ଦ୍ଦିଷ୍ଟ କଲେଜରେ ପଢୁଥିବା ସ୍ପଷ୍ଟ ହୋଇଛି । ସେମାନେ ରାସ୍ତାରେ ଗାଡି ପାର୍କିଂ କରି ନିର୍ଭୟରେ ପ୍ରେମାଳାପ କରୁଛନ୍ତି ।

ଏହି ଭିଡିଓରେ ପ୍ରେମପୂର୍ଣ୍ଣ କୋଟେସନ୍ ଦେଇ ଏହାକୁ ଭାଇରାଲ କରାଯାଉଛି । ଉଭୟ ପ୍ରେମୀଯୁଗଳଙ୍କ ଜ୍ଞାତସାରରେ ଏହି ଭିଡିଓ ସୁଟ୍ ହୋଇଥିବା ଦେଖିବାକୁ ମିଳିଛି । ତେବେ ନିଜେ ପ୍ରେମୀ ଯୁଗଳ ନା ସେମାନଙ୍କ ସାଙ୍ଗ ଏହାକୁ ଭାଇରାଲ କରିଛି ତାହା ସ୍ପଷ୍ଟ ହୋଇନାହିଁ । ତେବେ ଏହି ଘଟଣା ପୁରୀରେ ଚର୍ଚ୍ଚାର ବିଷୟବସ୍ତୁ ପାଲଟିଛି ।