13-Feb-2021

କୋରାପୁଟ(ପ୍ରେରଣା ଖବର ବ୍ୟୁରୋ) : କୋରାପୁଟ ସ୍ଥିତ ଶହୀଦ ଲକ୍ଷ୍ମଣ ନାୟକ ମେଡିକାଲ କଲେଜ ହସ୍ପିଟାଲରୁ ଏକ ନବଜାତ ଶିଶୁ ନିଖୋଜ । ଏନେଇ ଅଭିଯୋଗ କରିଛନ୍ତି ନିଖୋଜ ଶିଶୁର ପରିବାର । ନବରଙ୍ଗପୁର ପାପଡ଼ାହାଣ୍ଡି ବ୍ଲକ ସିଲକଗୁଡ଼ା ଗାଁର ତୁଳସୀନା ଗୌଡ଼ ନିଜ ଘରେ ଏକ କନ୍ୟା ସନ୍ତାନକୁ ଜନ୍ମ ଦେଇଥିଲେ । ପରେ ତୁଳସୀନାଙ୍କ ସ୍ବାସ୍ଥ୍ୟାବସ୍ଥା ବିଗିଡ଼ି ଯିବାରୁ ପରିବାର ଲୋକେ କୋରାପୁଟ ମେଡିକାଲ କଲେଜ ହସ୍ପିଟାଲକୁ ସ୍ଥାନାନ୍ତର କରିଥିଲେ ।

କିନ୍ତୁ ଡାକ୍ତରଖାନାରେ ପହଞ୍ଚିଲା ବେଳକୁ ତାଙ୍କର ମୃତ୍ୟୁ ଘଟିଥିବା ଡାକ୍ତର ସୂଚନା ଦେଇଥିଲେ । ପରିବାରବର୍ଗ ମୃତ ମହିଳା ତୁଳସୀନାଙ୍କ ମରଶରୀରକୁ ଗାଁକୁ ଫେରାଇ ନେଇଥିବା ବେଳେ, ଶିଶୁ କନ୍ୟାକୁ ଡାକ୍ତରଖାନାର ଏସଏନସିୟୁରେ ଭର୍ତ୍ତି କରାଯାଇଥିଲା । ପରିବାର ଲୋକେ ମୃତ ମହିଳା ତୁଳସୀନାଙ୍କ ଶେଷକୃତ୍ୟ ସାରି କୋରାପୁଟ ଆସି ଡାକ୍ତରଖାନାରେ ନବଜାତ ଶିଶୁ କନ୍ୟା ସମ୍ପର୍କରେ କର୍ତ୍ତୃପକ୍ଷଙ୍କଠାରୁ ଜାଣିବାକୁ ଚାହିଁବାରୁ, ତୁଳସୀନାଙ୍କ ସମ୍ପର୍କୀୟ କେହି ତାକୁ ନେଇଯାଇଥିବା କର୍ତ୍ତୃପକ୍ଷ ସଫେଇ ଦେଇଥିବା ଶିଶୁଟିର ମାଉସୀ କହିଛନ୍ତି । ପୋଲିସ ସିସିଟିଭି ଫୁଟେଜ୍ ଆଧାରରେ ତଦନ୍ତ ଆରମ୍ଭ କରିଛି ।