26-Aug-2026

ସିନ୍ଧେକେଲା(ଅନୀଲ ତ୍ରିପାଠୀ) ବଲାଙ୍ଗୀର ଜିଲ୍ଲା ବଙ୍ଗୋମୁଣ୍ଡା ବ୍ଲକ ଅନ୍ତର୍ଗତ ସିନ୍ଧେକେଲା ଥାନା ଅଞ୍ଚଳର ଅଧିଷ୍ଠାତ୍ରୀ ଦେବୀ ମାଁ ଦ୍ୱାରସେହ୍ନୀ ଙ୍କ ମନ୍ଦିର ଚୋରୀକୁ ଅସନ୍ତୋଷ ତୀବ୍ର ରୂପ ନେଇଛି। 
ପୂର୍ବରୁ ଜିଲ୍ଲା ଆଦିବାସୀ କଲ୍ୟାଣ ସଂଘ ବଙ୍ଗୋମୁଣ୍ଡା ଶାଖା ତରଫରୁ ପୋଲିସ କୁ ଶିଘ୍ର ଦୁର୍ବୃତ୍ତ ମାନଙ୍କୁ ଧରିବା ପାଇଁ ଦାବି କରାଯାଇଥିଲା। ଯଦି ଦୁର୍ବୃତ୍ତ ମାନଙ୍କୁ ଧରିବାରେ ପୋଲିସ ବିଫଳ ହୁଏ ତେବେ ୨୫ ତାରିଖ ମଙ୍ଗଳବାର ଦିନ ସିନ୍ଧେକେଲା ଥାନା ଘେରାଉ କରାଯିବ ବୋଲି ଆଦିବାସୀ ସଂଘ ଲିଖିତ ଜଣାଇଥିଲେ। ତେବେ ପୋଲିସ ଦୁର୍ବୃତ୍ତ ମାନଙ୍କୁ ଠିକଣା ସମୟରେ ଧରି ନ ପାରିବାରୁ ମଙ୍ଗଳବାର ଆଦିବାସୀ କଲ୍ୟାଣ ସଂଘ ର ଘେରାଉ ଡାକରାରେ ମାଁ ଦ୍ୱାରସେହ୍ନୀ ଙ୍କ ସେବାୟତ କମିଟି, ସିନ୍ଧେକେଲା ନାଗରିକ ମଞ୍ଚ , ବଣିକ ସଂଘ, ଗରିବ ସେନା , ମାଁ ଦ୍ୱାରସେହ୍ନୀ କୋଶଲ୍ ସେନା ଭଲି ଅନେକ ସଂଗଠନ ସାମିଲ ହୋଇ ମାଁ ଦ୍ୱାରସେହ୍ନୀ ଙ୍କ ମନ୍ଦିରରୁ ଏକ ବିରାଟ ପଟୁଆରରେ ଏକ ରାଲି ବାହାରି ସିନ୍ଧେକେଲା ଥାନା କୁ ପହଞ୍ଚିଥିଲେ। ଏଥିରେ ବିଭିନ୍ନ ଗାଁ ରୁ ଆସିଥିବା ଆଦିବାସୀ ସଂଘର କର୍ମକର୍ତ୍ତା ନିଜ ପାରମ୍ପରିକ ଅସ୍ତ୍ରଶସ୍ତ୍ର ଓ ବାଦ୍ୟ ଯନ୍ତ୍ର ଧରି ବିକ୍ଷୋଭ ପ୍ରଦର୍ଶନ କରିଥିଲେ। ଏଥିରେ ସିନ୍ଧେକେଲା ତଥା ଅଞ୍ଚଳର ବହୁ ସଂଖ୍ୟାରେ ପୁରୁଷ, ମହିଳା ଏବଂ ଯୁବଗୋଷ୍ଠୀ ସାମିଲ ହୋଇଥିଲେ। ରାଲି ଥାନାକୁ ପହଞ୍ଚିବା ପରେ ବିଭିନ୍ନ ସ୍ଲୋଗାନ ଦେଇଥିଲେ ଏବଂ ଜିଲ୍ଲା ଏସପି ନ ଆସିବା ପର୍ଯ୍ୟନ୍ତ ଘେରାଉ ଜାରି ରହିବ ବୋଲି ଜିଦରେ ଅଟଳ ରହିଥିଲେ। ତେବେ ଟିଟିଲାଗଡ଼ ଏସଡିପିଓ ଯଶୋବନ୍ତ ପ୍ରଧାନୀ ବହୁ ବୁଝାସୁଝା କରିବା ପରେ ମୁଖ୍ୟମନ୍ତ୍ରୀ ଙ୍କ ଉଦ୍ଦେଶ୍ୟରେ 
ଅତିରିକ୍ତ ଏସପି ଗୁଣନିଧି ମଲ୍ଲିକ ଙ୍କୁ ୬ ଦଫା ସମ୍ବଳିତ ଦାବିପତ୍ର ପ୍ରଦାନ କରିଥିଲେ। ଏଥିରେ ମନ୍ଦିର ଚୋରୀ ର ସନ୍ଧାନ କରିବା ପାଇଁ ସିବିଆଇ କୁ ଦିଆଯାଉ , ଚୋରୀ ଘଟଣାରେ ସମ୍ପୃକ୍ତ ସମସ୍ତ ଅଭିଯୁକ୍ତ ଓ ଏହା ପଛରେ ଥିବା ଅନ୍ୟ କୌଣସି ବ୍ୟକ୍ତି/ ଗୋଷ୍ଠୀ କୁ ଚିହ୍ନଟ କରି ଆଇନ ଅନୁଯାୟୀ କଠୋର ଦଣ୍ଡ ଦିଆଯାଉ , ମନ୍ଦିର ରୁ ଚୋରୀ

ହୋଇଥିବା ସମସ୍ତ ଅଳଙ୍କାର ଶିଘ୍ର ଉଦ୍ଧାର କରାଯାଉ, ମନ୍ଦିର ଚୋରୀ ରେ ପୋଲିସ ପ୍ରଶାସନ ର କୌଣସି ଅବହେଳା ଥିଲେ ତାହାକୁ ମଧ୍ୟ ତଦନ୍ତ ପରିସରଭୁକ୍ତ କରାଯାଉ, ସିନ୍ଧେକେଲା ମନ୍ଦିର ଗୁଡ଼ିକରେ ସିସିଟିଭି ଏବଂ ଆଲୋକିକରଣ ଏବଂ ଆବଶ୍ୟକ ସୁରକ୍ଷା ବ୍ୟବସ୍ଥା ସୁଦୃଢ଼ କରାଯାଉ, ଭବିଷ୍ୟତରେ ଏପରି ଚୋରୀ ଘଟଣା ରୋକିବା ପାଇଁ ପ୍ରଶାସନ ପକ୍ଷରୁ ସ୍ଥାୟୀ ସୁରକ୍ଷା ବ୍ୟବସ୍ଥା କରାଯାଉ ବୋଲି ଦାବି କରିଥିଲେ। ଏବଂ ଦୁର୍ବୃତ୍ତ ମାନଙ୍କୁ କେତେ ଦିନ ମଧ୍ୟରେ ଧରାହେବ ତାହା କହିବା ପରେ ଯାଇଁ ଘେରାଉ ବନ୍ଦ ହେବ ବୋଲି ଅଡ଼ି ବସିଥିଲେ। ତେବେ ଅତିରିକ୍ତ ଏସପି ଶ୍ରୀ ମଲ୍ଲିକ ୭ ଦିନ ମଧ୍ୟରେ ଧରାହେବ ବୋଲି ନିର୍ଭର ପ୍ରତିଶ୍ରୁତି ଦେବାପରେ ଘେରାଉ ଶେଷ କରାଯାଇଥିଲା।