19-Jul-2026

ବରପାଲି(ସୁଦାମ ଦୀପ):  ଅମୃତ ଭାରତ ଷ୍ଟେସନ ଯୋଜନା ଅଧୀନରେ ପ୍ରାୟ ୨୨.୨୮ କୋଟି ଟଙ୍କା ବ୍ୟୟରେ ପୁନଃନିର୍ମିତ ବରପାଲି ରେଳ ଷ୍ଟେସନର ଲୋକାର୍ପଣ ଉତ୍ସବ  ଆଡମ୍ବରପୂର୍ଣ୍ଣ ଭାବେ ପାଳିତ ହୋଇଥିଲା। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଭର୍ଚୁଆଲ୍ ମାଧ୍ୟମରେ ଷ୍ଟେସନର ଲୋକାର୍ପଣ କରିଥିବା ବେଳେ ବରପାଲିରେ ଆୟୋଜିତ କାର୍ଯ୍ୟକ୍ରମରେ ବରଗଡ଼ ସାଂସଦ ପ୍ରଦୀପ ପୁରୋହିତ, ଜିଲ୍ଲାପାଳ ଆଦିତ୍ୟ ଗୋଏଲ, ଡିଆରଏମ୍ ସୁବାସ ଚନ୍ଦ୍ର ଚୌଧୁରୀ, ଏସ୍‌ପି ରବୀନ୍ଦ୍ରନାଥ ଶତପଥୀ, ପଦ୍ମଶ୍ରୀ ଭାଗବତ ପ୍ରଧାନଙ୍କ ସମେତ ବହୁ ବିଶିଷ୍ଟ ବ୍ୟକ୍ତି ଉପସ୍ଥିତ ଥିଲେ।ତେବେ ସମଗ୍ର କାର୍ଯ୍ୟକ୍ରମରେ ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲେ ବରଗଡ଼ର କୁନି ପ୍ରତିଭା ନିଖିଳ ଶର୍ମା। ମାତ୍ର ୭ ବର୍ଷ ବୟସରେ ଏକ ମିନିଟ୍‌ରେ ସର୍ବାଧିକ ଫରୱାର୍ଡ ଓ ବ୍ୟାକୱାର୍ଡ କାର୍ଟହ୍ୱିଲ୍ କରି ଇଣ୍ଡିଆ ବୁକ୍ ଅଫ୍ ରେକର୍ଡସ୍ରେ ସ୍ଥାନ ପାଇ ସମଗ୍ର ବରଗଡ଼ ଜିଲ୍ଲା ପାଇଁ ଗୌରବ ଆଣିଥିବାରୁ ତାଙ୍କୁ ମଞ୍ଚ ଉପରେ ସ୍ୱତନ୍ତ୍ର ଭାବେ ସମ୍ବର୍ଦ୍ଧିତ କରାଯାଇଥିଲା। ସାଂସଦ ପ୍ରଦୀପ ପୁରୋହିତ ଓ ଅନ୍ୟାନ୍ୟ ଅତିଥିମାନେ ନିଖିଳଙ୍କ ଅସାଧାରଣ ସଫଳତାର ଉଚ୍ଚ ପ୍ରଶଂସା କରି କହିଥିଲେ, ଏତେ କମ୍ ବୟସରେ ଜାତୀୟ ସ୍ତରରେ ରେକର୍ଡ ସ୍ଥାପନ କରିବା କେବଳ ତାଙ୍କ ପରିବାର ପାଇଁ ନୁହେଁ, ସମଗ୍ର ବରଗଡ଼ ପାଇଁ ଗର୍ବର ବିଷୟ। ତାଙ୍କ ସଫଳତା ଆଗାମୀ ପିଢ଼ିର ଶିଶୁମାନଙ୍କ ପାଇଁ ପ୍ରେରଣାର ଉତ୍ସ ବୋଲି ମତ ପ୍ରକାଶ ପାଇଥିଲା।ନିଖିଳଙ୍କ ସମ୍ବର୍ଦ୍ଧନା ବେଳେ କରତାଳିରେ ପ୍ରକମ୍ପିତ ହୋଇଥିଲା ସମଗ୍ର ମଞ୍ଚ। ଅମୃତ ଭାରତ ଷ୍ଟେସନ ଉଦ୍‌ଘାଟନୀ ଉତ୍ସବରେ ଏହି କୁନି ପ୍ରତିଭାର ସମ୍ମାନନା ସମଗ୍ର କାର୍ଯ୍ୟକ୍ରମର ସବୁଠାରୁ ସ୍ମରଣୀୟ ଓ ଗୌରବମୟ ମୁହୂର୍ତ୍ତ ପାଲଟିଥିଲା।