18-Jul-2026

ପାପଡାହାଣ୍ଡି  (ପ୍ରିୟଦର୍ଶିନୀ ପାତ୍ର) ନବରଙ୍ଗପୁର ଜିଲ୍ଲା ପାପଡାହାଣ୍ଡି ଥାନା ଅନ୍ତର୍ଗତ ପ୍ରଧାନୀଗୁଡା ପେଟ୍ରୋଲ ପମ୍ପ ନିକଟରେ ଜାତୀୟ ରାଜପଥ 26 ରେ ଆଜି ଦୁର୍ଘଟଣା ରେ କାର୍ଯ୍ୟରତ ଅଙ୍ଗନବାଡି କର୍ମୀ ଙ୍କ ମୃତ୍ୟୁ ହୋଇଯାଇଛି । ସୂଚନା ମୁତାବକ ଦୁଲପୁର ଗ୍ରାମର ଅଙ୍ଗନବାଡି କର୍ମୀ ଦୋମୟନ୍ତି ସୌରା ସ୍କୁଟି ( ଓଡି 24 ଏନ 8081 )  ସାହାର୍ଯ୍ୟରେ ନିଜ କାର୍ଯ୍ୟ ସ୍ଥଳୀ ନୂଆଗୁଡା ( ସି ) କୁ ଯାଉଥିବା ବେଳେ ପଛ ଆଡ଼ୁ ଟିପ୍ପର ( ଓଡି ୩୨ ଏଲ 3553 ) ଧକ୍କା ଦେଇଥିଲା । ଘଟଣା ସ୍ଥଳରେ ଦୋମୟନ୍ତି ଛିଟିକି ପଡି ସେହିଠାରେ ହିଁ ସେ ମୃତ୍ୟୁ ବରଣ କରିଥିଲେ । ଖବର ପାଇ ପାପଡାହାଣ୍ଡି ଏସଡିପିଓ ସତ୍ୟଜିତ କାଣ୍ଡାଂକେଲ, ଥାନା ଅଧିକାରୀ ଉମେଶ ଚନ୍ଦ୍ର ନାୟକ ଅନ୍ୟ କର୍ମଚାରୀ ପହଞ୍ଚି ଶବ ଜବତ କରିବା ସହ ତଦନ୍ତ ଆରମ୍ଭ କରିଛନ୍ତି । ଘଟଣା ସ୍ଥଳରେ ପରିବାର ବର୍ଗ ଓ ଅଙ୍ଗନବାଡି ସଂଘ ଆସି ଦୁର୍ଘଟଣା ଘଟାଇଥିବା ଗାଡିକୁ ଧରି ୨୦ ଲକ୍ଷ  କ୍ଷତିପୂରଣ ଦେବାକୁ ଏକ ଘଣ୍ଟା ଧରି ରାସ୍ତା ରୋକ କରି ଦାବି କରିଥିଲେ  । ଯାହାକି ଜାତୀୟ ରାଜପଥ 26 ଏକ ଘଣ୍ଟା ପାଇଁ ଉଭୟ ପାର୍ଶ୍ୱରେ ଯାନବାହାନ ଅଟକି ରହିଥିଲା ।  ଘଟଣା ସ୍ଥଳରେ ପାପଡାହାଣ୍ଡି ତହସିଲଦାର ତପନ କୁମାର ନାୟକ ଆସି ରେଡ଼କ୍ରସ ପାଣ୍ଠିରୁ ୧୦ ହଜାର ଟଙ୍କା  ଦେବାରୁ ସମସ୍ତେ ରାସ୍ତା ରୁ ଓହରି ଥିଲେ । ପରେ ଗାଡି ଚଳାଚଳ ସ୍ବାଭାବିକ ହୋଇ ପାରିଥିଲା । ସାଥି କର୍ମୀଙ୍କ ମୃତ୍ୟୁ ଖବରରେ ପରିବାର ବର୍ଗ ତଥା  ଅଙ୍ଗନବାଡି ସଂଘରେ  ଶୋକର ଛାୟା ଖେଳିଯାଇଛି । ଶବ ବ୍ୟବଚ୍ଛେଦ ପରେ ପରିବାରକୁ ହସ୍ତାନ୍ତର କରାଯିବ ବୋଲି ପୋଲିସ କହିଛି ।