10-Jul-2026

ଶିକ୍ଷା ସମସ୍ୟା ସହ ପଂଚାୟତ ନିର୍ବାଚନ ନେଇ ହେଲା ଆଲୋଚନା

ବଲାଙ୍ଗିର(ପ୍ରେରଣା ଖବର)- ପୂର୍ବତନ ଆଇନମନ୍ତ୍ରୀ ନରସିଂହ ମିଶ୍ର ବଲାଙ୍ଗିର ବ୍ଲକ ଅନ୍ତର୍ଗତ ଚନ୍ଦନଭାଟି ଠାରେ ଥିବା ମେହେରପଡା କଲ୍ୟାଣ ମଣ୍ଡପ ଠାରେ ସାଧାରଣ ଜନତାଙ୍କୁ ନେଇ ଏକ ସାଧାରଣ ସଭାରେ ଲୋକଙ୍କ ଅଭିଯୋଗକୁ ନେଇ ଆଲୋଚନା କରିଛନ୍ତି । ଚନ୍ଦନଭାଟିରେ ଥିବା ସରକାରୀ ହାଇସ୍କୁଲ ରେ ଅନେକ ବର୍ଷ ହେଲା ଭାରପ୍ରାପ୍ତ ପ୍ରଧାନ ଶିକ୍ଷକଙ୍କ ଦ୍ୱାରା ସ୍କୁଲ ଚାଲୁଛି । ଏହାକୁ ନେଇ ଧିରେ ଧିରେ ଏହି ଅଂଚଳର ନାଗରିକମାନଙ୍କ ମଧ୍ୟରେ ଅସନ୍ତୋଷ ଦେଖାଦେଉଛି । ନିୟମିତ ପ୍ରଧାନ ଶିକ୍ଷକ ପଦ ଖାଲି ରହୁଥିବା ଏବଂ ଏହି ହାଇସ୍କୁଲ ପିଏମ୍‌ଶ୍ରୀ ଉଚ୍ଚ ବିଦ୍ୟାଳୟ କୁ ଉନ୍ନତି ହୋଇଥିବା

ଦ୍ୱାରା ଏଠାରେ ଶିକ୍ଷାକୁ ନେଇ ସରକାରଙ୍କ ଅନେକ ସବୁ ଯୋଜନା ଲାଗୁ ହୋଇଛି କିନ୍ତୁ ନିୟମିତ ପ୍ରଧାନ ଶିକ୍ଷକ ବିନା ଏହି ସବୁ କାର୍ଯ୍ୟ ସହ ଶିକ୍ଷାଦାନ କୁ ନେଇ ଚାଲିଥିବା କାର୍ଯ୍ୟକ୍ରମ ମଧ୍ୟ ଅନେକାଂଶରେ ବ୍ୟାଘାତ ହେବା ଦେଖାଦେଇଥାଏ ତେଣୁ ଏଠାରେ ଏକ ନିୟମିତ ପ୍ରଧାନ ଶିକ୍ଷକ ପ୍ରଦାନ କରିବାର ବ୍ୟବସ୍ଥା କରେଇବାକୁ ଶ୍ରୀ ମିଶ୍ରଙ୍କ ଆଗରେ ଚନ୍ଦନଭାଟିର ବୁଦ୍ଧିଜିବିମାନେ ଅନୁରୋଧ କରିଥିଲେ । ତା ସହ ଚନ୍ଦନଭାଟି ବାଦିଘୋର ଏବଂ ଆଖପାଖ ଅଂଚଳର ଗ୍ରାମ୍ୟ ରାସ୍ତା ଗୁଡିକର ରକ୍ଷଣାବେକ୍ଷଣରେ ଧ୍ୟାନ ଦେବାକୁ , କେନ୍ଦ୍ର ସରକାରଙ୍କ ଦ୍ୱାରା ପ୍ରଦତ୍ତ ଭତ୍ତାଗୁଡିକର ଅନିୟମିତତା, ଗ୍ରାମାଞ୍ଚଳରେ ରହୁଥିବା ଆବାସ ଗୃହରେ ରହୁଥିବା ଯୋଗ୍ୟ ହିତାଧିକାରୀଙ୍କ ନାଁ କଟିଯିବାକୁ ନେଇ ଗାଁ ଲୋକଙ୍କ ଭିତରେ ଧିରେ ଧିରେ ଅସନ୍ତୋଷ ତେଜୁଛି । ଏ ସବୁ ସମାଧାନ ଦିଗରେ ବିଭାଗୀୟ କର୍ତ୍ତୃପକ୍ଷଙ୍କ ସହ ଶ୍ରୀ ମିଶ୍ର ଆଲୋଚନା କରି ଏ ସବୁ ସମାଧାନର ବାଟ ଫିଟାଇବେ ବୋଲି ପ୍ରତିଶୃତି ଦେଇଥିଲେ ।

ଆଗାମୀ ବର୍ଷ ପଂଚାୟତ ସ୍ତରୀୟ ନିର୍ବାଚନ ହେବାକୁ ଥିବା ବେଳେ ପଂଚାୟତ ସ୍ତରୀୟ ପ୍ରତିନିଧି ବାଛିବା ବେଳକୁ ବିକାଶର ମନୋବୃତ୍ତି ଥିବା ସ୍ଥାନୀୟ ଲୋକଙ୍କୁ ବାଛିବାକୁ ଶ୍ରୀ ମିଶ୍ର ଅନୁରୋଧ କରିଥିଲେ । ଯେଉଁ ସ୍ଥାନୀୟ ନେତା ଲୋକଙ୍କର ଛୋଟ ଛୋଟ ସମସ୍ୟା ସହିତ ଜଡିତ ହୋଇ ସମ୍ବେଦନ ଶିଳତା ସହ ଲୋକଙ୍କ ସହ ଅଛି ସେଭଳିଆ ଲୋକଙ୍କୁ ଗୁରୁତ୍ୱ ଦିଅନ୍ତୁ ବୋଲି ଶ୍ରୀ ମିଶ୍ର ଅନୁରୋଧ କରିଥିଲେ । ଆଜିର ଏହି ଆଲୋଚନା ସମୟରେ ଲିଙ୍ଗରାଜ ମେହେର, କପିଳେଶ୍ୱର ମେହେର, ଶିବ ମେହେର, ନରେନ୍ଦ୍ର ମେହେର, ଶ୍ୟାମ ମେହେର, ରାମ ପ୍ରସାଦ ମିଶ୍ର, ପ୍ରକାଶ ବରେଇ, ସଂକିର୍ତ୍ତନ ମେହେର ଙ୍କ ସମେତ ଅନେକ ଗ୍ରାମବାସୀ ଉପସ୍ଥିତ ଥିଲେ ।