10-Jul-2026

ବଲାଙ୍ଗୀର(ପ୍ରେରଣା ଖବର): ଆଜି ବଲାଙ୍ଗୀର ଜିଲ୍ଲା ଦେଓଗାଁ ବ୍ଲକ କୁତୁର୍ଲାର ଧୃବଆନନ୍ଦ ମାଧ୍ୟମିକ ବିଦ୍ୟାଳୟରେ ପରିବେଶ ସଚେତନତା ତଥା ବୃକ୍ଷରୋପଣ କାର୍ଯ୍ୟକ୍ରମ ଅନୁଷ୍ଠିତ ହୋଇ ଯାଇଛି । ବିଦ୍ୟାଳୟର ଅଧ୍ୟକ୍ଷ ପ୍ରମୋଦକୁମାର ବଡପଣ୍ଡାଙ୍କ ସଭାପତିତ୍ୱରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ମୁଖ୍ୟଅତିଥି ଭାବରେ ଦେଓଗାଁ ବ୍ଲକର ପୂର୍ବତନ ଅଧ୍ୟକ୍ଷ ଲକ୍ଷ୍ମଣ କୁମାର ମେହେର, ସମ୍ମାନୀତ ଅତିଥି ଭାବରେ ସାମ୍ବାଦିକ ପୂର୍ଣ୍ଣଚନ୍ଦ୍ର ପଣ୍ଡା, କନ୍ଧକେଲଗାଁ ସେକସନ ଫରେଷ୍ଟର ଆଦିତ୍ୟ ନନ୍ଦ, କୁତୁର୍ଲା ସରପଞ୍ଚଙ୍କ ପ୍ରତିନିଧି ଡମ୍ବରୁ ହରିପାଳ,ବନରକ୍ଷୀ

ପ୍ରଦୀପ ମାଝି ଯୋଗଦେଇଥିଲେ । ସଂପ୍ରତି ବିଶ୍ୱତାପାୟନ ସହିତ ପରିବେଶ ଅସନ୍ତୁଳନକୁ ନେଇ ବିଶ୍ୱବାସୀ ଅତିଷ୍ଠ ହେଲେଣି । ଇୟୁରୋପ ଭଳି ଦେଶରେ ତାପମାତ୍ରା ୪୫ ଡିଗ୍ରୀ ଡେଇଁଲାଣି ଓ ଏହାର ପ୍ରଭାବରେ ହଜାର ହଜାର ଲୋକ ମୃତ୍ୟୁବରଣ କଲେଣି ତାହା ଉଦବେଗର ବିଷୟ । ଆମ ବଲାଙ୍ଗୀର ଜିଲ୍ଲାରେ ପ୍ରତିବର୍ଷ ତାପମାତ୍ରା ୪୬ଡିଗ୍ରୀ ଉପରକୁ ଯାଉଛି । ଜଙ୍ଗଲପରିମାଣ ୩୭% ରୁ ଖସି ୧୭% ରେ ପହଞ୍ଚିଲାଣି । ତେଣୁ ସମସ୍ତେ ସଚେତନ ହୋଇ ବ୍ୟାପକ ମାତ୍ରାରେ ବୃକ୍ଷରୋପଣ କରିବାକୁ ଆହ୍ୱାନ ଦିଆଯାଇଥିଲା । ସଂପ୍ରତି ପ୍ରଧାନମନ୍ତ୍ରୀ ମାଁଙ୍କ ପାଇଁ ଗଛଟିଏ କାର୍ଯ୍ୟକ୍ରମ କରିବାକୁ ଆହ୍ୱାନ ଦେଇଛନ୍ତି । କିନ୍ତୁ ଆମେ ସଂକଲ୍ପ ନେବା ଉଭୟ ମାଁବାପାଙ୍କୁ ଭଲ ପାଇ ଅନ୍ତତଃ ଦୁଇଟି ଗଛ ରୋପଣ କରିବା

ବୋଲି ସାମ୍ବାଦିକ ପୂର୍ଣ୍ଣଚନ୍ଦ୍ର ପଣ୍ଡା ଛାତ୍ରଛାତ୍ରୀଙ୍କୁ ଆହ୍ୱାନ ଦେଇ ଥିଲେ । ଫରେଷ୍ଟର ଆଦିତ୍ୟ ନନ୍ଦ ତାଙ୍କ ବକ୍ତବ୍ୟରେ ବନୀକରଣର ଆବଶ୍ୟକତା ତଥା ସରକାରୀ ବ୍ୟବସ୍ଥା ବିଷୟରେ ସୂଚନା ଦେଇଥିଲେ । ଛାତ୍ରଛାତ୍ରୀ ନିଜସ୍ୱ ଉଦ୍ୟମରେ ନିଜ ନିଜ ଘରବାଡି ତଥା ସ୍କୁଲ ଓ କଲେଜ ମାନଙ୍କରେ ବୃକ୍ଷରୋପଣ କରି ପରିବେଶ ସୁରକ୍ଷାରେ ସହାୟକ ହେବାକୁ ମତପ୍ରକାଶ ପାଇଥିଲା । ଏହି ଅବସରରେ ବିଦ୍ୟାଳୟ କ୍ୟାମ୍ପସରେ ଅତିଥିଗଣ ବୃକ୍ଷରୋପଣ କରିଥିଲେ । ଏହି କାର୍ଯ୍ୟକ୍ରମରେ ବିଦ୍ୟାଳୟର ଅଧ୍ୟାପକ ବିଜୟକୁମାର ଜାଲ, ବଳରାମ ପଧାନ,ହେମନ୍ତକୁମାର ସାହୁ, ନବକିଶୋର ବାରିକ, ସମାଜସେବୀ ସଂଜୀବ ପଧାନଙ୍କ ସହ ସମସ୍ତ ଛାତ୍ରଛାତ୍ରୀ, ଅଧ୍ୟାପକ ଓ କର୍ମଚାରୀଗଣ ସହଯୋଗ କରିଥିଲେ ।