05-Jul-2026

ଭୁବନେଶ୍ବର(ପ୍ରେରଣା ଖବର): କଳିଙ୍ଗ ଭାଷା ମୁକ୍ତମଞ୍ଚ ପକ୍ଷରୁ ଲୋକପ୍ରିୟ କାର୍ଯ୍ୟକ୍ରମ 'କଫି ବ୍ରେକ୍'ର ତୃତୀୟ ସଂସ୍କରଣ ସ୍ଥାନୀୟ ଷ୍ଟୁଡିଓ ଏନ୍ ଆର୍ ଠାରେ ଅନୁଷ୍ଠିତ ହୋଇଯାଇଛି l କାର୍ଯ୍ୟକ୍ରମରେ ପ୍ରାୟ ଶହେରୁ ଉର୍ଦ୍ଧ୍ଵ ସାହିତ୍ୟପ୍ରେମୀ ଯୋଗ ଦେଇ ଓଡିଆ କବିତା, ଗପ, ଗୀତକୁ ଉପଭୋଗ କରିଥିଲେ l ଏହି ଅବସରରେ ସୁଖ୍ୟାତ ଲେଖକ ଦେବବ୍ରତ ଦାସଙ୍କ ଉପନ୍ୟାସ 'ତୁଷ' ଏବଂ ନିହାର ରଞ୍ଜନ ପରିଡ଼ାଙ୍କ ଉପନ୍ୟାସ 'ରେନକୋଟ୍'ର ତୃତୀୟ ସଂସ୍କରଣ ଲୋକାର୍ପଣ ହୋଇଥିଲା l ପ୍ରାୟ ପଚିଶରୁ ଉର୍ଦ୍ଧ୍ଵ ଯୁବପିଢ଼ି ନିଜର କବିତା, ଗଳ୍ପ ଏବଂ ସଙ୍ଗୀତ ନିଆରା ଶୈଳୀରେ ପରିବେଷଣ କରିଥିଲେ l ଦର୍ଶକମାନେ ଟିକେଟ୍ କାଟି ଓଡ଼ିଆ କବିତା ଶୁଣିବାକୁ ଆସିବା ସମସ୍ତଙ୍କୁ ଉତ୍ସାହିତ କରିଥିଲା l ଯୁବ କବି ଏବଂ ଗାଳ୍ପିକଙ୍କ ନୂଆ ବହି ସବୁକୁ ବଡ଼ ଆଗ୍ରହରେ ସମସ୍ତେ କିଣିବା ସହ ସେମାନଙ୍କର ଦସ୍ତଖତ ନେଇଥିଲେ l ଯୁବପିଢ଼ିକୁ ଓଡ଼ିଆ ଭାଷାସାହିତ୍ୟ ଏବଂ ସଙ୍ଗୀତ ସହ ଯୋଡ଼ି ରଖିବାରେ କଳିଙ୍ଗ ଭାଷା ମୁକ୍ତମଞ୍ଚର ଏପରି ପ୍ରୟାସର ସମସ୍ତେ ଭୂୟସୀ ପ୍ରଶଂସା କରିଥିଲେ l 
    
                    ସୂଚନଯୋଗ୍ୟ ଯେ, କଳିଙ୍ଗ ଭାଷା ମୁକ୍ତମଞ୍ଚ ବିଗତ ଛ ବର୍ଷ ଧରି ଓଡ଼ିଆ ଭାଷାରେ ଏପରି ମୁକ୍ତମଞ୍ଚ (ଓପନ୍ ମାଇକ୍) କାର୍ଯ୍ୟକ୍ରମ ଆୟୋଜନ କରି ଆସୁଛି l ଓଡ଼ିଶାର ବିଭିନ୍ନ ଅଞ୍ଚଳର ପ୍ରତିଭାବାନ୍ ଯୁବକଯୁବତୀ ଏହା ମାଧ୍ୟମରେ ନିଜର ପ୍ରତିଭା ପ୍ରଦର୍ଶନ କରି ପରିଚୟ ସୃଷ୍ଟି କରିପାରିଛନ୍ତି l ସାମାଜିକ ଗଣମାଧ୍ୟମରେ ଏହି ସବୁ କବିତା, ସଙ୍ଗୀତ ଖୁବ୍ ଲୋକପ୍ରିୟ ମଧ୍ଯ ହୋଇଛି l କାର୍ଯ୍ୟକ୍ରମରେ ତରୁଣ ପିଢ଼ିର ପ୍ରତିଭାବାନ୍ କବି ଶ୍ରୀସିକ୍ତା ଶୁଭଦର୍ଶିନୀ ନାୟକ ଉପସ୍ଥାପନ କରିଥିଲା ବେଳେ କଳିଙ୍ଗ ଭାଷା ମୁକ୍ତମଞ୍ଚର ଆବାହକ ସତ୍ୟ ଶିବ ସୁନ୍ଦର ଦାସ ଧନ୍ୟବାଦ ଅର୍ପଣ କରିଥିଲେ l କାର୍ଯ୍ୟକ୍ରମ ଆୟୋଜନରେ ଅଂଶୁମାନ ସାହୁ, ଜ୍ୟୋତି ରଞ୍ଜନ ବାରିକ, ସୁମିତ୍ ପଣ୍ଡା, ବିଶ୍ଵକସେନ୍ ଦାଶ ପ୍ରମୁଖ ସହଯୋଗ କରିଥିଲେ l