06-Jul-2026

ବଲାଙ୍ଗିର(ପ୍ରେରଣା ଖବର)- ଗତ ଜୁନ ୩ ତାରିଖରେ ବଲାଙ୍ଗିର ଜିଲ୍ଲା ରେଭେନ୍ୟୁ ବିଭାଗରେ ଯେଉଁମାନେ ତିନି ବର୍ଷରୁ ଉର୍ଦ୍ଧ ଗୋଟିଏ ଜାଗାରେ ଚାକିରୀ କରି ଆସୁଥିଲେ ତାଙ୍କୁ ବଦଳି କରାଯାଇଥିଲା । ଜିଲ୍ଲା ପ୍ରଶାସନର ଏହି ବଦଳି ଆଦେଶରେ ବହୁ ସିନିୟର କ୍ଲାର୍କ, ଜୁନିୟର କ୍ଲାର୍କ, ଆରଆଇ ଏବଂ ଅମିନମାନଙ୍କ ବଦଳି କରାଯାଇଥିଲା । କିନ୍ତୁ ସମସ୍ତଙ୍କ ବଦଳି ହେବା ପରେ ମଧ୍ୟ ତ୍ରିପାଠୀ ବାବୁ ନାମକ ଜଣେ ସିନିୟର କର୍ମଚାରୀ ଦୀର୍ଘ ୯ ବର୍ଷରୁ ଉର୍ଦ୍ଧ ହେବ ଗୋଟିଏ ସ୍ଥାନରେ ଅବସ୍ଥାପିତ ଥିଲେ ମଧ୍ୟ ତାଙ୍କୁ ଅନ୍ୟତ୍ର ବଦଳି କରାଯାଇ ନଥିବା ନେଇ ଜିଲ୍ଲାପାଳଙ୍କ କାର୍ଯ୍ୟାଳୟରେ ଚର୍ଚ୍ଚା ଚାଲିଛି । ବାବୁ ଜଣକ ବହୁ କରିର୍ତକର୍ମା ଏବଂ ଏହି ବଦଳିରେ କିଏ କେଉଁ ସ୍ଥାନକୁ ବଦଳି ହୋଇଯିବେ ସେଥିରେ ବାବୁ ଜଣଙ୍କର ପ୍ରଚ୍ଛଦ ହାତ ଥିବା ବିଭାଗରେ ଚର୍ଚ୍ଚା ଚାଲିଛି । ବାବୁ ଜଣଙ୍କୁ ଅନ୍ୟତ୍ର ବଦଳି କରାଗଲେ ମଧ୍ୟ  ତାଙ୍କୁ ଡେପୁଟେସନ ମାଧ୍ୟମରେ ପୁଣି ସେହି ବିଭାଗକୁ ଅଣାଯାଉଛି ତେବେ ଏହାର ରହସ୍ୟ କଣ । ତ୍ରିପାଠୀ ବାବୁ ନ ହେଲେ ସେହି ବିଭାଗ ଅଚଳ ହୋଇଯିବ ଏବଂ କାମ ଆଗେଇବ ନାହିଁ ବୋଲି ଅଧିକାରୀ ତାଙ୍କୁ ଆଣିବାକୁ ମସୁଧା କରୁଛନ୍ତି ବୋଲି ତ୍ରିପାଠୀ ବାବୁଙ୍କ ପାଖ ଲୋକ କହୁଛନ୍ତି । ଅଭିଯୋଗ ଅନୁସାରେ  ତ୍ରିପାଠୀ ବାବୁ ଜଣକ ଉଚ୍ଚପଦସ୍ଥ ଅଧିକାରୀଙ୍କ ସହ ନିବିଡ ସଂପର୍କ ରଖିଛନ୍ତି । ତା’ସହ ଚଳିତ ବଦଳି ସମୟରେ ତାଙ୍କର ଜଣେ ସହଯୋଗୀଙ୍କ ଜରିଆରେ ବାବୁ ଜଣକ ଅର୍ଥ କାରବାର କରିଥିବା ଜଣାଯାଇଛି । ଏହି ଅଭିଯୋଗ ଗୁଡିକର ସତ୍ୟତା ଥିଲେ ସାଙ୍ଘାତିକ । ତେବେ ଜିଲ୍ଲାପାଳ ଏହି ଅଭିଯୋଗ ଗୁଡିକର ତଦନ୍ତ କରି ଉକ୍ତ କର୍ମଚାରୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ତ୍ରିପାଠୀ ବାବୁଙ୍କୁ ତୁରନ୍ତ ଏହି ବିଭାଗରୁ ଅନ୍ୟତ୍ର ବଦଳି କରିବାକୁ କର୍ମଚାରୀଙ୍କ ମହଲରେ ଦାବି ହେଉଛି ।