05-Jul-2026

ବଲାଙ୍ଗିର(ପ୍ରେରଣା ଖବର): ବଲାଙ୍ଗୀର ରାଜେନ୍ଦ୍ର ବିଶ୍ୱବିଦ୍ୟାଳୟରେ ଆଜି ଆଉଟସୋର୍ସିଂକର୍ମଚାରୀମାନଙ୍କର ଆନ୍ଦୋଳନ ଆରମ୍ଭ ହୋଇଛି । ବିଶ୍ୱବିଦ୍ୟାଳୟ ପକ୍ଷରୁ ପୂର୍ବରୁ ନିଯୁକ୍ତ ଆଉଟସୋର୍ସିଂ ଏଜେନ୍ସି ବଦଳିବା ପରେ ପୂର୍ବରୁ ନିୟୋଜିତ କର୍ମଚାରୀଙ୍କୁ ବଦଳାଇବାର ଉଦ୍ୟମ ଚାଲିଛି । ପରଫର୍ମମାନ୍ସ ରିପୋର୍ଟ ଆଳ କରି ପୂର୍ବରୁ ନିୟୋଜିତ କର୍ମଚାରୀଙ୍କୁ ଛଟେଇ କରି ନୂଆ କର୍ମଚାରୀ ନିଯୁକ୍ତିର ମସୁଧା ଚାଲିଥିବା ଅଭିଯୋଗ କରି ଆଜି ବିଶ୍ୱବିଦ୍ୟାଳୟ କୁଳପତିଙ୍କ କାର୍ଯ୍ୟାଳୟ ସମ୍ମୁଖରେ ଆଉଟସୋର୍ସିଂ କର୍ମଚାରୀମାନେ ଧାରଣା ଦେଇଥିଲେ । ତେବେ ବିଶ୍ୱବିଦ୍ୟାଳୟ ତାଙ୍କୁ ଛଟେଇ କରିନାହାଁନ୍ତି । ପୂର୍ବରୁ ଥିବା ଏଜେନ୍ସୀର ଚୁକ୍ତି ସମୟ ଅବଧି ସରିଯାଇଥିବାରୁ ନୂଆ ଏଜେନ୍ସୀକୁ ଦାୟିତ୍ୱ ଦିଆଯାଇଛି । କର୍ମଚାରୀମାନେ ସେହି ଏଜେନ୍ସୀ ପାଖରେ ନିଜ ନିଜ ଡକ୍ୟୁମେଣ୍ଟ ଦାଖଲ କରନ୍ତୁ ବୋଲି ବିଶ୍ୱବିଦ୍ୟାଳୟର କୁଳପତି ପ୍ରଫେସର ବିଭୁତିଭୁଷଣ ମଲ୍ଲିକ କହିଛନ୍ତି । ତେବେ ଆଲୋଚନା କରି ସମସ୍ତ କର୍ମଚାରୀଙ୍କୁ ନୂଆ ଏଜେନ୍ସୀ ନିଯୁକ୍ତି ନଦେବା ପର୍ଯ୍ୟନ୍ତ ଆନ୍ଦୋଳନ ଚାଲିବ ବୋଲି ଆଉଟସୋର୍ସିଂ କର୍ମଚାରୀ ସଂଘର ସଭାପତି ରାଜେଶ ଝାଙ୍କର ସୂଚନା ଦେଇଛନ୍ତି ।
ସୂଚନା ଯୋଗ୍ୟ ଯେ,ବଲାଙ୍ଗୀର ରାଜେନ୍ଦ୍ର ବିଶ୍ୱବିଦ୍ୟାଳୟ ପକ୍ଷରୁ କେୟାର ସଂସ୍ଥା ଜରିଆରେ ୬୧ଜଣ ଆଉଟସୋର୍ସିଂ କର୍ମଚାରୀଙ୍କୁ ନିଯୁକ୍ତି ଦିଆଯାଇଥିଲା । ଏହାବାଦ ସିଧାସଳଖ ୨୨ଜଣ ହଷ୍ଟେଲଷ୍ଟାଫ ନିଯୁକ୍ତି ଦିଆଯାଇଥିଲା । ଏମାନଙ୍କୁ ହଠାତ ୩ ତାରିଖ ରାତିରେ କାର୍ଯ୍ୟରୁ ଅନ୍ତର କରାଗଲା ବୋଲି କୁହାଗଲା । ଏପରିକି ଗତ ଦୁଇମାସ ହେଲା ଏମାନଙ୍କୁ ଦରମା ମଧ୍ୟ ଦିଆଯାଇ ନାହିଁ । ତେଣୁ ଆଜି ଆଉଟସୋର୍ସି କର୍ମଚାରୀମାନେ ମିଳିତ ଭାବରେ ୮୩ ଜଣ ବିଶ୍ୱବିଦ୍ୟାଳୟର କୁଳପତିଙ୍କ କାର୍ଯ୍ୟାଳୟ ସମ୍ମୁଖରେ ଆସି ଧାରଣା ଦେଇଥିଲେ । ବିଶ୍ୱବିଦ୍ୟାଳୟର ରେଜିଷ୍ଟାର ଡ.ହରପ୍ରସାଦ ଭୋଇ ପୋଲିସ ଉପସ୍ଥିତିରେ ଆଲୋଚନା କରି କର୍ମଚାରୀମାନେ ନୁଆ ଏଜେନ୍ସୀ ସହିତ ଯୋଗା ଯୋଗ କରିବାକୁ କହିଥିଲେ । କିନ୍ତୁ କର୍ମଚାରୀ ମାନେ ପରଫର୍ମମାନ୍ସ ଆଳରେ ଛଟେଇ କରିବାକୁ ଚାଲିଥିବା ଚକ୍ରାନ୍ତକୁ ବରଦାସ୍ତ କରାଯିବ ନାହିଁ ବୋଲି ସିଧାସଳଖ କହିଛନ୍ତି । କର୍ମଚାରୀମାନେ କହିଛନ୍ତି ରାଜେନ୍ଦ୍ର ବିଶ୍ୱବିଦ୍ୟାଳୟ ରେ ସେମାନେ ପ୍ରଥମେ ଏସଆଇଏସ ସଂସ୍ଥା ଓ ପରେ କେୟାର ସଂସ୍ଥାରେ କାମ କରି ଆସୁଥିଲେ । ଏଜେନ୍ସୀ ବଦଳିଲେ ମଧ୍ୟ କର୍ମଚାରୀଙ୍କୁ ଛଟେଇ କରୁନଥିଲେ । କିନ୍ତୁ ଏବେ ଯେଉଁ ଏଜେନ୍ସୀ ନେଇଛି ସେ କିଛି ଚକ୍ରାନ୍ତକାରୀ ମଧ୍ୟସ୍ଥିଙ୍କ ଜରିଆରେ ନୂଆ ନିଯୁକ୍ତି କରିବାକୁ ଅପଚେଷ୍ଟା କରୁଛି । ଏହାକୁ ଆମେ ତୀବ୍ର ପ୍ରତିବାଦ କରୁଛୁ ବୋଲି ଆଉଟସୋର୍ସିଂ ସଂଘ କହିଛି । ସେପଟେ ଯେଉଁ ଏଜେନ୍ସୀକୁ ନିଯୁକ୍ତି ଦିଆ ଯାଇଛି ସେହି ଏଜେନ୍ସୀର ପରଫର୍ମମାନ୍ସକୁ ଓ ନିଯୁକ୍ତି ପ୍ରକ୍ରିୟାକୁ ନେଇ ମଧ୍ୟ ସନ୍ଦେହ ବ୍ୟକ୍ତ କରାଯାଇଛି । ବଲାଙ୍ଗୀର ଆରଏନସି ଏଜେନ୍ସୀ ନାମକ ଏକ ସଂସ୍ଥାକୁ ବିଶ୍ୱବିଦ୍ୟାଳୟ କତ୍ତୃପକ୍ଷ ଆଉଟସୋର୍ସିଂ ପରିଚାଳନା ଦାୟିତ୍ୱ ଦେଇଛନ୍ତି । ବିନା ଟେଣ୍ଡରରେ ଏହି ସଂସ୍ଥାକୁ ଦିଆଯାଇଛି । ଏହି ଏଜେନ୍ସୀର ବିଶ୍ୱସନୀୟତା ନେଇ ମଧ୍ୟ ପ୍ରଶ୍ନବାଚୀ ସୃଷ୍ଟି ହୋଇଛି । ଆରଏନସି ଏଜେନ୍ସୀର ପୂର୍ବ ପରଫର୍ମମାନ୍ସର ଯାଞ୍ଚ କରାଯିବାକୁ ମଧ୍ୟ ଦାବି ହୋଇଛି ।