25-Jun-2026

ଡୁଙ୍ଗୁରିପାଲି(ଆରବିନ୍ଦ ମିଶ୍ର):  -ଏହି ବ୍ଲକର ଗଧାପାଲି ଶ୍ରୀଜଗନ୍ନାଥ ଉଚ୍ଚ ବିଦ୍ୟାଳୟରେ ୨ଗୋଟି ପାଚିକା ପଦବୀ ପାଇଁ ବିଜ୍ଞାପନ ପ୍ରକାଶ ପାଇଥିଲା। ଏଥିରେ ଜଣେ ଲେଖାଏ ତଫସିଲଭୁକ୍ତ ଜାତି ଓ ଜନଜାତିର ମହିଳାଙ୍କ ପାଇଁ ଉଦ୍ଦିଷ୍ଟ ଥିବା ବେଳେ ଉକ୍ତ ବିଦ୍ୟାଳୟର ପଛୁଆବର୍ଗର ପିଅନଙ୍କ ମାଁ ଏବଂ ସ୍ତ୍ରୀଙ୍କୁ ନିଯୁକ୍ତି ପ୍ରଦାନକୁ ବିରୋଧ କରି ଦୁଇ ଦିନ ହେବ ଡୁଙ୍ଗୁରିପାଲି ବିଇଓଙ୍କ କାର୍ଯ୍ୟଳୟ ସମ୍ମୁଖରେ ଧାରଣା ଦିଆଯାଇଛି। ପ୍ରାପ୍ତ ସୂଚନା ଅନୁସାରେ ଉକ୍ତ ଗ୍ରାମର ସରୋଜିନୀ ମିର୍ଦ୍ଧା, ଶାନ୍ତିଲତା ଦଲେଇ ଓ ମିଥୁଲା ସେଠ ପାଚିକା ପାଇଁ ଦରଖାସ୍ତ ଆବେଦନ କରିଥିଲେ । ସରୋଜିନୀ ଏବଂ ଶାନ୍ତିଲତା ଏସଟି ଏବଂ ମିଥୁଲା ସେଠ ଏସସି ବର୍ଗର । ଏମାନଙ୍କୁ ନିଯୁକ୍ତି ନ ଦେଇ ଉକ୍ତ ବିଦ୍ୟାଳୟର ପିଅନ ଭାବେ କାର୍ଯ୍ୟରତ ତାଙ୍କ ମାଁ ଏବଂ ସ୍ତ୍ରୀଙ୍କୁ ନିଯୁକ୍ତି ଦିଆଯାଇଛି । ଏହାକୁ ପ୍ରତିବାଦ କରି ଆବେଦନକାରୀମାନେ ସ୍କୁଲ କର୍ତ୍ତୃପକ୍ଷ ଏବଂ ବିଦ୍ୟାଳୟ ପରିଚାଳନା କମିଟି ଏଥୁରେ ଚଞ୍ଚକତା କରିଥିବା ନେଇ ଗତ ୧୧/୪/ ୨୦୨୫ରେ ଡୁଙ୍ଗୁରିପାଲି ବିଇଓ ଏବଂ ପରବର୍ତି ସମୟରେ ଜିଲ୍ଲାପାଳଙ୍କ ଅଭିଯୋଗ ଜନଶୁଣାଣିରେ ୨୧/ ୭/ ୨୦୨୫ ଏବଂ / ୨୫/୫/୨୦୨୬ରେ ଜଣାଇଥିଲେ । ଏଥିରେ କୌଣସି ପଦକ୍ଷେପ ନ ହେବାରୁ ଗତକାଲି ଏବଂ ଆଜି ଡୁଙ୍ଗୁରିପାଲି ବିଇଓଙ୍କ କାର୍ଯ୍ୟାଳୟ ସମ୍ମୁଖରେ ଉକ୍ତ ତିନି ଜଣ ମହିଳା ଅନଶନରେ ବସିଛନ୍ତି । ଏଥିରେ କୌଣସି ପଦକ୍ଷେପ ନ ହେବାରୁ ସେମାନେ ଏ ବିଷୟରେ ଆଜି ରାଷ୍ଟ୍ରପତି, ପ୍ରଧାନମନ୍ତ୍ରୀ, ମୁଖ୍ୟମନ୍ତ୍ରୀ, ଆଦିବାସୀ କଲ୍ୟାଣ ବିଭାଗ, ଗଣ ଶିକ୍ଷା ବିଭାଗକୁ ଜଣାଇଛନ୍ତି । ଏ ସଂପର୍କରେ ବିଇଓ ଗଣେଶ କିସାନଙ୍କୁ ପଚାରିବାରୁ ନିଯୁକ୍ତି ବିଦ୍ୟାଳୟ ପରିଚାଳନା କମିଟି ଚୟନ କରିଥାଏ। ଏହା ପରେ ସେ ଆମକୁ ଜଣାଇବା ପରେ ଜିଲ୍ଲା ଅଧିକାରୀଙ୍କୁ ଅନୁମୋଦନ ପାଇଁ ପଠାଇବା ପରେ ସେଠାରୁ ସ୍ଵିକୃତୀ ପାଇଥାଏ । ଏଥିରେ ଆମର କୌଣସି ଦାୟିତ୍ବ ନଥୁବା ଜଣାଇଥିଲେ ।