15-Jun-2026

ବରପାଲି  (ସୁଦାମ ଦୀପ )
ବରଗଡ଼ ଜିଲ୍ଲା ବିଜେପୁର ବ୍ଲକ ଅନ୍ତର୍ଗତ ତାଳପଦର ଗ୍ରାମରେ ଲଗାତାର ଚୋରି ଘଟଣା ଘଟୁଥିବାରୁ ଗ୍ରାମବାସୀଙ୍କ ମଧ୍ୟରେ ଭୟ ଓ ଅସନ୍ତୋଷ ବଢ଼ିବାରେ ଲାଗିଛି। ଗତ କିଛି ମାସରେ ଗ୍ରାମର ବିଭିନ୍ନ ସ୍ଥାନରେ ଚୋରି ଘଟଣା ଘଟୁଥିବା ସତ୍ତ୍ୱେ ଏପର୍ଯ୍ୟନ୍ତ ଚୋରଙ୍କ ସନ୍ଧାନ ମିଳିନଥିବାରୁ ପୋଲିସର କାର୍ଯ୍ୟଦକ୍ଷତାକୁ ନେଇ ପ୍ରଶ୍ନ ଉଠିଛି।ଶନିବାର ବିଳମ୍ବିତ ରାତ୍ରିରେ ଗ୍ରାମର ଧରଣୀଧର ପଧାନ, ଉମାକାନ୍ତ ମିଶ୍ର, ସୌକିଲାଲ ସାହୁ ଓ କଲ୍ୟାଣ ମିଶ୍ରଙ୍କ ଚାଷ ଜମିରେ ଲାଗିଥିବା ପ୍ରାୟ ୧୦ଟି ପୋଲର ବିଦ୍ୟୁତ ତାର ଚୋରି ହୋଇଥିବା ଅଭିଯୋଗ ହୋଇଛି। ଏଥିସହ ପରମେଶ ପଧାନଙ୍କ କ୍ଲଷ୍ଟର ମଧ୍ୟ ଚୋରମାନେ ନେଇଯାଇଥିବା ଜଣାପଡ଼ିଛି। କ୍ଷତିଗ୍ରସ୍ତ ଚାଷୀମାନେ ବିଜେପୁର ଥାନାରେ ଏନେଇ ଲିଖିତ ଅଭିଯୋଗ କରିଛନ୍ତି।ଏହା ପୂର୍ବରୁ ମଧ୍ୟ ତାଳପଦର ଆର୍‌ଆଇ କାର୍ଯ୍ୟାଳୟରୁ ସାମଗ୍ରୀ ଚୋରି ହୋଇଥିବା ବେଳେ କ୍ଷୀରୋଦ ସାହୁଙ୍କ ବୋରୱେଲ ପମ୍ପ, ଗୋଲାପ ଗଡ଼ତିଆଙ୍କ ବୋରୱେଲ ପମ୍ପ, ଶାନ୍ତି ସାହୁ ଙ୍କ କ୍ଲଷ୍ଟର କୁ ଯିବାକୁ ଥିବା ୧୧୦୦୦ ଲାଇନ ତାର ଏବଂ ଗ୍ରାମ କଲ୍ୟାଣ ମଣ୍ଡପରେ ଲାଗିଥିବା ପମ୍ପ ମଧ୍ୟ ଚୋରି ହୋଇଥିଲା। ବାରମ୍ବାର ଚୋରି ଘଟଣା ଘଟୁଥିଲେ ମଧ୍ୟ ଚୋରମାନେ ଧରାନପଡ଼ିବାରୁ ଗ୍ରାମବାସୀଙ୍କ ମଧ୍ୟରେ କ୍ଷୋଭ ପ୍ରକାଶ ପାଉଛି।ସ୍ଥାନୀୟ ଲୋକଙ୍କ ଅଭିଯୋଗ ଅନୁସାରେ, ରାତ୍ରିକାଳୀନ ପୋଲିସ ପେଟ୍ରୋଲିଂ ବ୍ୟବସ୍ଥା ଦୁର୍ବଳ ଥିବାରୁ ଦୁର୍ବୃତ୍ତମାନେ ନିର୍ଭୟରେ ଚୋରି କରୁଛନ୍ତି। ଲଗାତାର ଘଟଣା ସତ୍ତ୍ୱେ ଚୋରଙ୍କୁ ଧରିବାରେ ବିଜେପୁର ପୋଲିସ ବିଫଳ ହେଉଥିବା ନେଇ ଲୋକମାନେ ଅସନ୍ତୋଷ ପ୍ରକାଶ କରିଛନ୍ତି।ଗ୍ରାମବାସୀମାନେ ତୁରନ୍ତ ତଦନ୍ତକୁ ତ୍ୱରାନ୍ୱିତ କରି ଚୋର ଗ୍ୟାଙ୍ଗକୁ ଠାବ କରିବା ସହ ଅଞ୍ଚଳରେ କଡ଼ା ସୁରକ୍ଷା ବ୍ୟବସ୍ଥା ଓ ନିୟମିତ ପେଟ୍ରୋଲିଂ ବ୍ୟବସ୍ଥା କରିବାକୁ ଦାବି କରିଛନ୍ତି। ଏବେ ଏହି ଘଟଣାରେ ପୋଲିସ କେତେ ଶୀଘ୍ର ପଦକ୍ଷେପ ନେଉଛି, ତାହା ଉପରେ ସମସ୍ତଙ୍କ ନଜର ରହିଛି।