15-Jun-2026

ବଲାଙ୍ଗୀର(ପ୍ରେରଣା ଖବର)-ବଲାଙ୍ଗୀର ସହରରେ ଚଳିତବର୍ଷ ୧୧ଟି ବନ୍ଧକଟାର ସଫଳତାର ପୁନଃରୁଦ୍ଧାର ହୋଇଛି । ଏହାକୁନେଇ ଜନସାଧାରଣ ଖୁସିବ୍ୟକ୍ତ କରୁଛନ୍ତି । ତେବେ ଆସନ୍ତାବର୍ଷକୁ ବଲାଙ୍ଗୀର ସହରଦେଇ ବହିଯାଇଥିବା ଲକ୍ଷ୍ମୀଯୋର ଉପରେ ନିର୍ମାଣ ହୋଇଥିବା ରାଜେନ୍ଦ୍ରଡ୍ୟାମର ବିକାଶ ପାଇଁ ୫ଟିପଡାର ଲୋକ ଦାବିକରିଛନ୍ତି । ଶନିବାର ଦିନ ଏକ ପ୍ରତିନିଧିଦଳ ବିଧାୟକ କଳିକେଶ ନାରାୟଣ ସିଂଦେଓଙ୍କୁ ଭେଟି ଏକ ଦାବିପତ୍ର ପ୍ରଦାନ କରିବା ସହିତ ଏହି ପ୍ରକଲ୍ପର ବିକାଶନେଇ ଆଲୋଚନା କରିଛନ୍ତି । ରାଜେନ୍ଦ୍ରପଡାର ପ୍ରଦୀପ ମହାନ୍ତି, ସୁବ୍ରତ ମହାପାତ୍ର, ଶିବ ଗୌଡ, କୃଷ୍ଣଚନ୍ଦ୍ର ଦାନୀ,ଟଙ୍କଧର ସୁନାଙ୍କ ସହିତ ବହୁସଂଖ୍ୟା ରେ ଲୋକମାନେ ଯାଇ ବିଧାୟକ କଳିକେଶ ନାରାୟଣ ସିଂଦେଓଙ୍କୁ ଭେଟି ଆଲୋଚନାକରି ଦାବିପତ୍ର ପ୍ରଧାନ କରିଛନ୍ତି । ଲୋକଙ୍କ ଦାବିକୁ ନେଇ ବିଧାୟକ କ୍ଷୁଦ୍ରଜଳସେଚନ ବିଭାଗ ର ସର୍ବୋଚ୍ଚଯନ୍ତ୍ରୀଙ୍କୁ ଚିଠିଲେଖି ଅନୁଦାନ ମଗାଯିବ ବୋଲି ପ୍ରତିନିଧିଦଳଙ୍କୁ ପ୍ରତିଶୃତି ଦେଇଛନ୍ତି ।
     ସହର ଭିତରେ ଥିବା ୧୦୦ଏକର ପରିମିତ ରାଜେନ୍ଦ୍ରଡ୍ୟାମ ୭୦ ଦଶକରେ ନିର୍ମାଣ ହୋଇଥିଲା । ରାଜେନ୍ଦ୍ରପଡାଠାରୁ ଆରମ୍ଭ କରି ରାଜେନ୍ଦ୍ର ବିଶ୍ୱବିଦ୍ୟାଳୟ ପର୍ଯ୍ୟନ୍ତ ଏହି ପ୍ରକଲ୍ପ ଲମ୍ବି ରହିଛି । ଏଠାରୁ ଚାଷିଙ୍କ ଜମିକୁ ଜଳସେଚନ ସହିତ ଲୋକଙ୍କ ବ୍ୟବହାର ହେଉଥିଲା । କିନ୍ତୁ ଦୀର୍ଘବର୍ଷ ହେଲା ପୁନଃରୁଦ୍ଧାର ନହେବାରୁ ଏହାର ଜଳଧାରଣ କ୍ଷମତା କମି ଯାଇଛି । ଫଳରେ  ଫେବୃୟାରୀ ମାସ ସୁଦ୍ଧା ଏହି ପ୍ରକଲ୍ପର

ପାଣି ସୁଖିଯାଉଛି । ଏହି ଡେମଉପରେ ଡେମପଡା, ରାଜେନ୍ଦ୍ରପଡା, ଆନନ୍ଦନଗର,ସୂର୍ଯ୍ୟନଗର,ଚମାରପଡା ଇତ୍ୟାଦି ଅଞ୍ଚଳର ଲୋକ ନିର୍ଭର କରିଥାନ୍ତି । ଗରୀବ ଲୋକମାନେ ଗାଧୁଆପାଧୁଆଠାରୁ ତାଙ୍କ ନିତ୍ୟବ୍ୟବହାର୍ଯ୍ୟ ପାଣି ବ୍ୟବହାର ଏଠାରୁ କରିଥାନ୍ତି । ଏହି ପ୍ରକଲ୍ପହେଲେ ବଲାଙ୍ଗୀର ସହରର ଭୂତଳ-ଜଳସ୍ତର ମଧ୍ୟ ବଢିବ । ତେଣୁ ଏହି ପ୍ରକଲ୍ପର ଉନ୍ନତିକରଣର ଆବଶ୍ୟକତା ରହିଛି ବୋଲି ସ୍ଥାନୀୟଲୋକ ଦାବି କରୁଛନ୍ତି । ଏବେ ପ୍ରକଲ୍ପରୁ ମାଟିପୁନଃରୁଦ୍ଧାର କରାଯାଇ କଳେବର ବଢାଯାଇପାରିବ । ଏହାକଲେ ପ୍ରକଲ୍ପର ଜଳଧାରଣ କ୍ଷମତାବଢିବ । ଏହା ସହିତ ଏହାର ପାରିପାଶ୍ୱିର୍କ ସୌନ୍ଦର୍ଯ୍ୟକରଣ କରାଗଲେ ସହରବାସୀଙ୍କ ଅବଦରବିନୋଦନ ପାଇଁ ମଧ୍ୟ ସୁବିଧା ହେବ ବୋଲି ଦାବି କରାଯାଇଛି । କ୍ଷୁଦ୍ରଜଳସେଚନ ବିଭାଗ ମାଟିଉନ୍ନତିକରଣ କରାଇଲେ ପୌରପାଳିକା ପକ୍ଷରୁ ଏଠାରେ ଆଲୋକୀକରଣ ଓ ସୌନ୍ଧର୍ଯ୍ୟକରଣ କରିପାରିବ ବୋଲି ଜନସାଧରଣ ଦାବିକରିଛନ୍ତି । ବିଧାୟକ ଓ ଜିଲ୍ଲାପ୍ରଶାସନ ତୁରନ୍ତ ଏଦିଗରେ ପଦକ୍ଷେପ ନେବାକୁ ଦାବି କରାଯାଇଛି ।