11-Jun-2026

ସୁବର୍ଣ୍ଣପୁର (ମନୋରଞ୍ଜନ ତ୍ରିପାଠୀ )
 ସୋନପୁର ବିଜୁପଟ୍ଟନାୟକ ମହିଳା ଡିଗ୍ରୀ ମହାବିଦ୍ୟାଳୟର ଛାତ୍ରୀ ସୁଶ୍ରୀ ଅନନ୍ୟା ମିଶ୍ର ଚଳିତ ବର୍ଷ ରାଜେନ୍ଦ୍ର ବିଶ୍ୱବିଦ୍ୟାଳୟ ଦ୍ୱାରା ଶୁକ୍ରବାର ପ୍ରକାଶିତ ସ୍ନାତକ ପରୀକ୍ଷା ଫଳରେ ବୋଟାନୀ (ଉଦ୍ଭିଦ ବିଜ୍ଞାନ) ସମ୍ମାନରେ ୮.୮୬ ସିଜିପିଏ ହାସଲ କରି ବଲାଙ୍ଗିର ରାଜେନ୍ଦ୍ର  ବିଶ୍ବବିଦ୍ୟାଳୟ ଟପ୍ପର ହୋଇଛନ୍ତି। ତାଙ୍କର ଏହି ସଫଳତା ବିଜୁ ପଟ୍ଟନାୟକ ଡିଗ୍ରୀ କଲେଜ ସମେତ ସୁବର୍ଣ୍ଣପୁର ଜିଲ୍ଲା ପାଇଁ ଗୌରବ ଆଣିଛନ୍ତି। ଆର୍ଥିକ କ୍ଷେତ୍ରରେ ସ୍ୱଚ୍ଛଳତା ନ ଥିବା ସତ୍ତ୍ବେ ସେ ସଂଘର୍ଷ ଭିତରେ  ପାଠପଢ଼ା ଜାରି ରଖି ଅନ୍ୟ ମାନଙ୍କ ପାଇଁ ଉଦାହରଣ ସାଜିଛନ୍ତି। ତାଙ୍କର ସଫଳତା ପଛରେ  ବୋଟାନୀ ବିଭାଗୀୟ ମୂଖ୍ୟ ଦୁଃଖିଶ୍ୟାମ ମେହେର ଙ୍କ ନିରନ୍ତର ମାର୍ଗଦର୍ଶନ , କଲେଜ ଅଧ୍ୟକ୍ଷା ରୀତାରାଣୀ ପୂଜାରୀ ଓ ସମସ୍ତ ଅଧ୍ୟାପକ ଅଧ୍ୟାପିକାଙ୍କ ସହ ନିଜ ପରିବାର ବର୍ଗ ଙ୍କ ଉତ୍ସାହ ଓ ହାତ ଥିବା କହିଛନ୍ତି ଅନନ୍ୟା l ସମସ୍ତ ଙ୍କ ପ୍ରେରଣା ଓ ସହଯୋଗ  ଯୋଗୁଁ ଆଜି ମୁଁ ନିଜକୁ ଏ ସଫଳତା ପାଇଁ ଗର୍ବିତ ମନେ କରୁଛି ବୋଲି ସେ କହିଛନ୍ତି। ତାଙ୍କର ସଫଳତା ପାଇଁ ସୁବର୍ଣ୍ଣପୁର ଜିଲ୍ଲାପାଳ ଡଃ ନୃପରାଜ ସାହୁ ଅନନ୍ୟା ମିଶ୍ରଙ୍କୁ କାର୍ଯ୍ୟାଳୟ କୁ ଡାକି ଆଜି ପୁଷ୍ପଗୁଚ୍ଛ ସହ ଉପଢୌକନ ଦେଇ ସମ୍ବର୍ଦ୍ଧିତ କରିଛନ୍ତି। ସେ ଏପରିକି ଏକ ଡାଏରୀରେ ଶୁଭେଚ୍ଛା ବାର୍ତ୍ତା ସହ ନିଜର ଦସ୍ତଖତ ଦେଇ ଭବିଷ୍ୟତ ପାଇଁ ଶୁଭ ସଫଳତା କାମନା କରିଛନ୍ତି । ଠିକ୍ ସେହିପରି କଲେଜ ପରିଚାଳନା କମିଟି ସଭାପତି ତଥା ଅତିରିକ୍ତ ଜିଲ୍ଲାପାଳ ଅଞ୍ଜଳିନା ପ୍ରଧାନ ନିଜ କାର୍ଯ୍ୟାଳୟ କୁ ଡାକି ଅନନ୍ୟା ମିଶ୍ରଙ୍କୁ ପୁଷ୍ପଗୁଚ୍ଛ ଓ ଉତ୍ତରୀୟ ପ୍ରଦାନ କରିବା ସହ ସଫଳ ଭବିଷ୍ୟତ ପାଇଁ ଆଶିର୍ବାଦ ପ୍ରଦାନ କରିଥିଲେ। ଆଗାମୀ  ପିଢୀର ଛାତ୍ରୀ ମାନଙ୍କ ପାଇଁ ସେ କହିଛନ୍ତି ଯେ ବିଶ୍ବବିଦ୍ୟାଳୟ ସ୍ତରରେ ଟପ୍ପର କରିବା କଠିନ କାମ ଓ ଏହା ଏକ ସହଜ କଥା ନୁହେଁ। କିନ୍ତୁ କଠିନ ପରିଶ୍ରମ ଦୃଢ଼ ଇଚ୍ଛା ଶକ୍ତି ସହ ଅହରହ ଜ୍ଞାନ ଆହରଣ କଲେ ନିୟମିତ ପାଠ ପଢ଼ିଲେ ସଫଳତାର ଶୀର୍ଷରେ ପହଞ୍ଚି ହୁଏ। ବୋଟାନୀ HOD, ଦୁଃଖିଶ୍ୟାମ ମେହେର ଙ୍କ ପାଠପଢ଼ା ଶୈଳୀ Doubt clearing class ଓ ପରୀକ୍ଷା ପାଇଁ ପୂର୍ବ ପ୍ରସ୍ତୁତି ମୋ ପାଇଁ ସଫଳତା ଆଣିଦେଇଥିଲା ବୋଲି ଅନନ୍ୟା ମିଶ୍ର ଜିଲ୍ଲାପାଳ ଓ ଅତିରିକ୍ତ ଜିଲ୍ଲାପାଳ ଙ୍କ ଆଗରେ ପ୍ରକାଶ କରିବା ସହ ବିଶେଷ ସଫଳତାର ଶ୍ରେୟ ମୁଁ ତାଙ୍କୁ ଦେବି ବୋଲି କହିଥିଲେ। ତାଙ୍କର ଏହି ସାକ୍ଷାତ ସମୟରେ କଲେଜର ଅଧ୍ୟାପକ ଦୁଃଖିଶ୍ୟାମ ମେହେର କ୍ଷିରୋଦ କୁମାର ମେହେର, ମଦନମୋହନ ପଣ୍ଡା , ଅନ୍ତର୍ଯ୍ୟାମୀ ମିଶ୍ର ଓ କଲେଜ୍ ର ଶୁଭେଚ୍ଛୁ ତଥା ବରିଷ୍ଠ ସାମ୍ବାଦିକ ମନୋରଞ୍ଜନ ତ୍ରିପାଠି, ପିନାକୀ ପଣ୍ଡା ପ୍ରମୁଖ ଉପସ୍ଥିତ ଥିଲେ।