11-Jun-2026

ବରପାଲି (ସୁଦାମ ଦୀପ )
ବରଗଡ଼ ଜିଲ୍ଲା ବରପାଲି ବ୍ଲକ ଅନ୍ତର୍ଗତ ସତଲମା ଉଚ୍ଚ ବିଦ୍ୟାଳୟରେ ନୂତନ ପ୍ରଧାନଶିକ୍ଷକ ଭାବେ ଭବାନୀ ଶଙ୍କର ଗଡତିଆ ଯୋଗଦାନ କରିଛନ୍ତି। ତାଙ୍କ ଯୋଗଦାନ ପରେ ବିଦ୍ୟାଳୟ ପରିବେଶରେ ନୂତନ ଉତ୍ସାହ ଦେଖାଦେଇଛି।  ଭବାନୀ ଶଙ୍କର ଗଡତିଆ ଜଣେ ଅଭିଜ୍ଞ ଶିକ୍ଷାବିତ୍ ଭାବେ ପରିଚିତ। ବିଶେଷ କରି ବିଜ୍ଞାନ ଉପରେ ତାଙ୍କର ଗଭୀର ଜ୍ଞାନ ରହିଛି l ସେ ସତଲମା ଉଚ୍ଚ ବିଦ୍ୟାଳୟରେ ଯୋଗଦାନ ପୂର୍ବରୁ ବାରଗୁଡା ଅପଗ୍ରେଡେଡ଼ ହାଇସ୍କୁଲରେ ଶିକ୍ଷକ ଭାବେ କାର୍ଯ୍ୟରତ ଥିଲେ। ଦୀର୍ଘ ଶିକ୍ଷାଦାନ ଅନୁଭୂତି ଓ ଛାତ୍ରଛାତ୍ରୀଙ୍କ ସର୍ବାଙ୍ଗୀଣ ବିକାଶ ପ୍ରତି ତାଙ୍କର ନିଷ୍ଠା ତାଙ୍କୁ ଜଣେ ଦକ୍ଷ ଶିକ୍ଷକ ଭାବେ ପରିଚିତ କରାଇଛି। ଭଟିଗାଁ ଗ୍ରାମପଞ୍ଚାୟତ ଅନ୍ତର୍ଗତ ଖଇରପାଲି ଗ୍ରାମର ମୂଳ ବାସିନ୍ଦା ଗଡ଼ତିଆ ନିଜ କର୍ମନିଷ୍ଠା, ଶୃଙ୍ଖଳା ଓ ଛାତ୍ରମାନଙ୍କ ପ୍ରତି ସ୍ନେହ ପାଇଁ ସର୍ବତ୍ର ପ୍ରଶଂସିତ। ତାଙ୍କ ନେତୃତ୍ୱରେ ସତଲମା ଉଚ୍ଚ ବିଦ୍ୟାଳୟ ଶିକ୍ଷା, କ୍ରୀଡ଼ା ଓ ସାଂସ୍କୃତିକ କ୍ଷେତ୍ରରେ ଆହୁରି ସଫଳତା ହାସଲ କରିବ ବୋଲି ଅଭିଭାବକ, ଛାତ୍ରଛାତ୍ରୀ ଓ ଅଞ୍ଚଳବାସୀ ଆଶା ପ୍ରକାଶ କରିଛନ୍ତି।ଯୋଗଦାନ ଅବସରରେ ବିଦ୍ୟାଳୟର ଶିକ୍ଷକ, କର୍ମଚାରୀ ଏବଂ ସ୍ଥାନୀୟ ଶିକ୍ଷାପ୍ରେମୀମାନେ ନୂତନ ପ୍ରଧାନଶିକ୍ଷକଙ୍କୁ ସ୍ୱାଗତ ଜଣାଇଥିଲେ। ଶିକ୍ଷାର ଗୁଣାତ୍ମକ ଉନ୍ନତି ସହ ବିଦ୍ୟାଳୟର ସାମଗ୍ରିକ ବିକାଶ ପାଇଁ ସମସ୍ତଙ୍କ ସହଯୋଗରେ କାମ କରିବେ ବୋଲି ଗଡତିଆ ପ୍ରକାଶ କରିଥିଲେ।