15-May-2026

୧୦୬ ଦିନର ଅପେକ୍ଷା ପରେ ପ୍ରତାପ ବରାଳଙ୍କ ଖାତାକୁ ଆସିଲା ୨ ଲକ୍ଷ ୧୭ ହଜାର ଟଙ୍କା

କାଲିମେଳା(ସନ୍ତୋଷ କୁମାର ପଣ୍ଡା):ଦୀର୍ଘ ୧୦୬ ଦିନ ଧରି ନିଜ ପରିଶ୍ରମର ଧାନ ବିକ୍ରୟ ଟଙ୍କା ପାଇଁ ସରକାରୀ କାର୍ଯ୍ୟାଳୟରୁ କାର୍ଯ୍ୟାଳୟ ଦୌଡ଼ୁଥିବା ମାଲକାନଗିରି ଜିଲ୍ଲା MV-96 ଗ୍ରାମର ଚାଷୀ ପ୍ରତାପ ବରାଳଙ୍କୁ ଶେଷରେ ମିଳିଛି ବଡ଼ ଆଶ୍ୱସ୍ତି। ଗଣମାଧ୍ୟମରେ ବାରମ୍ବାର ଖବର ପ୍ରକାଶ ଓ ଚାଷୀଙ୍କ ଅସହାୟ ସ୍ଥିତି ସାମ୍ନାକୁ ଆସିବା ପରେ ଆଜି ସଞ୍ଜ ସମୟରେ ତାଙ୍କ ବ୍ୟାଙ୍କ ଆକାଉଣ୍ଟକୁ ମୋଟ ୨ ଲକ୍ଷ ୧୭ ହଜାର ଟଙ୍କା କ୍ରେଡିଟ୍ ହୋଇଥିବା ସୂଚନା ମିଳିଛି।
ସୂଚନାଯୋଗ୍ୟ ଯେ, ପ୍ରତାପ ବରାଳ ଗତ ଜାନୁଆରୀ ୨୭ ତାରିଖରେ MV-79 ଧାନ କ୍ରୟ କେନ୍ଦ୍ରରେ ପ୍ରାୟ ୪୦ କ୍ୱିଣ୍ଟାଲ ଧାନ ବିକ୍ରୟ କରିଥିଲେ। କିନ୍ତୁ ଦୀର୍ଘ ୫ ମାସ ଧରି ତାଙ୍କ ଖାତାକୁ ଟଙ୍କା ନଆସିବାରୁ ସେ ଆର୍ଥିକ ଓ ମାନସିକ ଭାବେ ଭାଙ୍ଗିପଡ଼ିଥିଲେ। ଧାନ ଚାଷ ପାଇଁ ନେଇଥିବା କରଜ, ଘର ଖର୍ଚ୍ଚ ଓ ପରିବାରର ଚାପ ତାଙ୍କୁ ନିରାଶାର ସୀମାକୁ ନେଇଯାଇଥିଲା।

ଏନେଇ ସେ ଜନସୁନାନି ୱେବସାଇଟ୍‌ରୁ ଆରମ୍ଭ କରି ଜିଲ୍ଲାପାଳଙ୍କ ଯୁଗ୍ମ ଅଭିଯୋଗ ପ୍ରକୋଷ୍ଠ ପର୍ଯ୍ୟନ୍ତ ଅନେକ ସ୍ଥାନରେ ନ୍ୟାୟ ପାଇଁ ଦୁଆରେ ଦୁଆରେ ଘୁରିଥିଲେ। ପ୍ରତ୍ୟେକ ସ୍ଥାନରୁ ମିଳୁଥିଲା କେବଳ ଗୋଟିଏ ଉତ୍ତର —
“ଆଉ ୭ ଦିନ…”
“ଆଉ ୧୦ ଦିନ…”

ଏହି ଅପେକ୍ଷା ଓ ଅବହେଳା ମଧ୍ୟରେ ଚାଷୀ ପରିବାର ପ୍ରାୟ ଭାଙ୍ଗିପଡ଼ିଥିବାବେଳେ ଗଣମାଧ୍ୟମରେ ଘଟଣା ବାରମ୍ବାର ପ୍ରକାଶ ପାଇବା ପରେ ପ୍ରଶାସନ ତତ୍ପର ହୋଇଥିବା ଚର୍ଚ୍ଚା ହେଉଛି।
ଚାଷୀ ପ୍ରତାପ ବରାଳ କହିଛନ୍ତି—
“ମୁଁ ଆଶା ଛାଡ଼ିଦେଇଥିଲି। ବାରମ୍ବାର ଦୌଡ଼ିବା, ଅନୁରୋଧ କରିବା ଓ ଅପେକ୍ଷା କରି କରି ଥକିଯାଇଥିଲି। ଶେଷରେ ମୋ ପରିଶ୍ରମର ଟଙ୍କା ମିଳିଛି। ଯେଉଁମାନେ ମୋ ଦୁଃଖକୁ ସାମ୍ନାକୁ ଆଣିଲେ ସେମାନଙ୍କୁ ଧନ୍ୟବାଦ।”
ତେବେ ଏହି ଘଟଣା ଏକ ବଡ଼ ପ୍ରଶ୍ନ ଛାଡ଼ିଯାଇଛି —
ଜଣେ ଚାଷୀ ନିଜ ପରିଶ୍ରମର ଟଙ୍କା ପାଇବା ପାଇଁ କାହିଁକି ମାସ ମାସ ଧରି ଦୌଡ଼ିବେ? କାହିଁକି ବାରମ୍ବାର ଖବର ପ୍ରକାଶ, ଚାପ ଓ ଧମକ ପରେ ମାତ୍ର ବ୍ୟବସ୍ଥା କାମ କରିବ?
ସରକାରୀ ଧାନ କ୍ରୟ ବ୍ୟବସ୍ଥାରେ ଏଭଳି ଅବହେଳା ଓ ବିଳମ୍ବ କେବେ ବନ୍ଦ ହେବ?
ଜଣେ ସାଧାରଣ ଚାଷୀ ବିନା ହଇରାଣ ଓ ବିନା ଅପମାନରେ କେବେ ସମୟରେ ନିଜ ଟଙ୍କା ପାଇବେ?ଏହି ପ୍ରଶ୍ନର ଉତ୍ତର ଏବେ ସରକାର ଓ ପ୍ରଶାସନଙ୍କ ପାଖରେ।