13-May-2026

କଟକ(ତପନ ମହାନ୍ତି): କଟକ ସଦର ବ୍ଲକ୍‌ର କେତେକ ପଞ୍ଚାୟତରେ ଥିଲାବାଲା ବ୍ୟକ୍ତି ଅନ୍ତୋଦୟ ଯୋଜନାର ଘର ହାତେଇଥିବା ଅଭିଯୋଗ ହେଉଛି। ଗତ ଛଅ ମାସ ମଧ୍ୟରେ ସଦର ବ୍ଲକ୍‌ର ୨୩ଟି ପଞ୍ଚାୟତରେ ୪୦୦ରୁ ଅଧିକ ଅନ୍ତୋଦୟ ଘର ଆବଣ୍ଟନ କରାଯାଇଛି। କିନ୍ତୁ ଏହି ଘରଗୁଡିକ ଯାହାଙ୍କୁ ଦିଆଯାଇଛି, ସେମାନଙ୍କ ମଧ୍ୟରୁ ଅନେକେ ସ୍ବଚ୍ଛଳ ବ୍ୟକ୍ତି ବୋଲି ଅଭିଯୋଗ ହୋଇଛି। କେତେକ ହିତାଧିକାରୀଙ୍କର ନିଜସ୍ବ କୋଠା ଘର ଥିବା ସତ୍ତ୍ବେ ସେମାନେ କୌଶଳକ୍ରମେ କାର୍ଯ୍ୟାଦେଶ ପାଇଥିବା ଅଭିଯୋଗ ହୋଇଛି। ବେଣ୍ଟକାର ପଞ୍ଚାୟତରେ ଜଣେ ବ୍ୟକ୍ତିଙ୍କ କୋଠା ଘର ଥିବା ସତ୍ତ୍ବେ ସେ ଅନ୍ତୋଦୟ ଘର ପାଇବାରେ ସକ୍ଷମ ହୋଇଥିବା ଅଭିଯୋଗ ହୋଛି। ଏହି ବିଷୟରେ ବିଡିଓ ସହିତ ଯୋଗାଯୋଗ କରା ଯାଇଥିଲେ ସୁଦ୍ଧା ଯୋଗାଯୋଗ ହୋଇପାରିନାହଁ। ସଦର ବ୍ଲକରେ ସାଙ୍ଘାତିକ ଦୁର୍ନୀତି ହୋଇଥିଲେ ହେଁ ବ୍ଲକର କର୍ମଚାରୀ ଘଟଣାକୁ ଚପେଇ ଦେବା ସଙ୍ଗେସଙ୍ଗେ ଉକ୍ତ ଫାଇଲକୁ ପୋଡି ଦେବାପାଇଁ ଯୋଜନା କରୁଥିବା ଅଭିଯୋଗ ହେଉଛି । ବ୍ଲକର ପ୍ରତେକ ଦୁର୍ନୀତିକୁ ଭିଜିଲାନ୍ସ ତଦନ୍ତ ହେବା ବଦଳରେ ଚପେଇ ଦିଆଯାଉଥିବା କୁହାଯାଉଛି ।