12-May-2026

କଣ୍ଟାମାଳ(ଜୟ କୁମାର ମହାରଣା):ବୌଦ୍ଧ ଜିଲ୍ଲା ଘଣ୍ଟାପଡ଼ା ପୋଲିସକୁ ମିଳିଛି ବଡ଼ ସଫଳତା। ଗଞ୍ଜେଇ ଚୋରାଚାଲାଣ କରୁଥିବା ଜଣେ ମହିଳାଙ୍କ ସମେତ ୬ଜଣ ଆନ୍ତଃରାଜ୍ୟ ମାଫିଆଙ୍କୁ ଗିରଫ କରି ସୋମବାର ଦିନ କୋର୍ଟ ଚାଲାଣ କରିଛି ପୋଲିସ। ବିଶ୍ଵସ୍ତ ସୂତ୍ରରୁ ଖବର ପାଇ ଘଣ୍ଟାପଡ଼ା ପୋଲିସ ରବିବାର ସଂଧ୍ୟାରେ ଖୁଣ୍ଟିଗୋରା ପଞ୍ଚାୟତର ଭଡ଼େର ଛକରେ ଛପି ରହିଥିଲା ବେଳେ ଦୃତ ଗତିରେ ଆସୁଥିବା ଏକ ଅଟୋ ଗାଡ଼ିକୁ ଅଟକାଇ ଯାଞ୍ଚ କରିଥିଲା। ଯାଞ୍ଚ ବେଳେ ଅଟୋରେ ଏକ ଜରି ବସ୍ତାରେ ଗଞ୍ଜେଇ ଥିବା ଜାଣି ଜଣେ ମହିଳାଙ୍କ ସମେତ ୬ଜଣଙ୍କୁ କାବୁ କରିଥିଲା ପୋଲିସ। ମାଜିଷ୍ଚ୍ରେଟ ସାମନାରେ ଓଜନ କରିବାରୁ ୨୧ କେଜି ଗଞ୍ଜେଇ ହୋଇଥିଲା। ଗିରଫ ଅଭିଯୁକ୍ତମାନେ ହେଲେ କନ୍ଧମାଳ ଜିଲ୍ଲା ଫିରିଙ୍ଗିଆ ଥାନା ଗୁରୁପଡ଼ା ଗ୍ରାମର ଅକ୍ଷୟ ଦିଗାଲ (୨୪), ମହାରାଷ୍ଟ୍ର ରାଜ୍ୟର ରାଜ ଶେଷରାଜ ଚୌହାନ (୩୩), ଗୁଜୁରାଟ ରାଜ୍ୟର ବରାଳି ସୁରଜ ରାମଙ୍କେଭାଲ(୩୪) ବିହାର ରାଜ୍ୟର ଚନ୍ଦନ କୁମାର (୨୦), ଗୁଜରାଟର ଉସମାନ ଅଲି ନାଜିବୁଲ୍ଲା ଶୈକ (୩୨) ଓ ଡାମନ ଏଣ୍ଡ ଡିଉ ର ମଧୁ ମଙ୍ଗର (୩୫) ବୋଲି ପୁଲିସର ତଦନ୍ତରୁ ଜଣାଯାଇଛି l ଏନେଇ ଘଣ୍ଟାପଡା ପୁଲିସ ପକ୍ଷରୁ ଏକ ମାମଲା ରୁଜୁ କରି ସମସ୍ତଙ୍କୁ କୋର୍ଟ ଚାଲାଣ କରିଥିବା ନେଇ ଥାନାଧିକାରୀ ସୌମ୍ୟ ରଂଜନ ପାତ୍ର ଓ ତଦନ୍ତକାରୀ ପୋଲିସ ଏସଆଇ ମାଧବ ଚନ୍ଦ୍ର ଟାକ୍ରି ସୂଚନାପ୍ରଦାନ କରିଛନ୍ତି।