30-Apr-2026

ବରଗଡ଼(ପ୍ରେରଣା ଖବର)- ସ୍କେଟିଂ ଖେଳରେ ପୁଣି ଥରେ ଓଡିଶା ପାଇଁ ସୁନାମ ଆଣିଛି ବରଗଡ଼ ସ୍ଥିତ ବୈଦିକ ଇଣ୍ଟରନ୍ୟାସନାଲ ସ୍କୁଲ। ଚଣ୍ଡିଗଡ ଠାରେ ଗତ ୨୨ ତାରିଖରୁ ୨୮ତାରିଖ ପର୍ଯ୍ୟନ୍ତ ଅନୁଷ୍ଠିତ ହୋଇ ଯାଇଥିବା ତୃତୀୟ ଇଣ୍ଡିଆ ସ୍କେଟ ଗେମ୍ସ -୨୦୨୬ ରେ ଓଡିଶା ସ୍କେଟ ଟିମ ତରଫରୁ ସ୍ଥାନୀୟ ବୈଦିକ ସ୍କୁଲର ଦୁଇ ଜଣ ଛାତ୍ର ଅଂଶଗ୍ରହଣ କରିଥିଲେ। ଏଥିରେ ଉଭୟ ଖେଳାଳୀ ପଦକ ଜିଣି ଓଡିଶା ତଥା ବରଗଡ଼ ଜିଲ୍ଲା ପାଇଁ ଗୌରବ ଆଣିଛନ୍ତି। ଉକ୍ତ ଜାତୀୟ ସ୍ତରର ସ୍କେଟିଂ ପ୍ରତିଯୋଗିତାରେ ବିଦ୍ୟାଳୟର ଦଶମ ଶ୍ରେଣୀ ଛାତ୍ର ଓଜସ ସହାୟତା ଗୋଟିଏ ରୌପ୍ୟ ପଦକ ପାଇଥିବା ବେଳେ ଷଷ୍ଠ ଶ୍ରେଣୀର ଛାତ୍ର ଅର୍ଣ୍ଣବ ପ୍ରଧାନ ଦୁଇଟି ବ୍ରୋଞ୍ଜ ପଦକ ହାସଲ କରିଛନ୍ତି। ବିଦ୍ୟାଳୟର ସ୍କେଟିଂ କୋଚ ନଫିସା ବେଗମଙ୍କ ସୁଦକ୍ଷ ସ୍କେଟିଂ ଖେଳ ପରିଚାଳନା ବଳରେ ଉକ୍ତ ଛାତ୍ର ଦ୍ବୟ ଏହି ସଫଳତା ପାଇବାର ହକଦାର ହୋଇଛନ୍ତି। ଉକ୍ତ ସଫଳତା ନିମନ୍ତେ ବୈଦିକ ଗ୍ରୁପର ଚେୟାରମ୍ୟାନ ଆନନ୍ଦ ଅଗ୍ରୱାଲ ଓ ବିଦ୍ୟାଳୟର ପ୍ରିନସିପାଲ ଗାର୍ଗୀ ଚଟର୍ଜୀ ଉକ୍ତ ଛାତ୍ର ଦ୍ବୟଙ୍କୁ ଅଭିନନ୍ଦନ ଜଣାଇବା ସହ ସେମାନଙ୍କ ଉତ୍ତରୋତ୍ତର ଉନ୍ନତି କାମନା କରିଛନ୍ତି। 
        --------×××--------