09-Apr-2026

ଅତାବିରା(ଆକାଶ ମିଶ୍ର): ଅତାବିରା ଏନ.ଏ.ସି ସ୍ଥିତ ୱାର୍ଡ ନମ୍ବର ୯ ଲାଦରପାଲି ଗ୍ରାମର ଏକ ବହୁ ପୁରାତନ ହନୁମାନ ମନ୍ଦିର ସମ୍ମୁଖରେ ଥିବା ବିଜୁଳି ଖୁଣ୍ଟ ଏବେ ଗ୍ରାମବାସୀଙ୍କ ପାଇଁ ମରଣଯନ୍ତା ସାଜିଛି। ନିକଟରେ ହୋଇଥିବା କାଳବୈଶାଖୀ ପ୍ରଭାବରେ ଏହି ଖୁଣ୍ଟଟି ବଙ୍କେଇ ଯାଇ ମନ୍ଦିର ଆଡ଼କୁ ଢଳି ରହିଥିବା ବେଳେ, ଯେକୌଣସି ମୁହୂର୍ତ୍ତରେ ବଡ଼ ଧରଣର ଅଘଟଣ ଘଟିବାର ଆଶଙ୍କା ଦେଖାଦେଇଛି। ଆଗକୁ ପବିତ୍ର ମହା ବିଷୁବ ସଂକ୍ରାନ୍ତି ତଥା ହନୁମାନ ଜୟନ୍ତୀ ପଡ଼ୁଥିବାରୁ ଏହି ପ୍ରାଚୀନ ମନ୍ଦିର ପ୍ରାଙ୍ଗଣରେ ଶ୍ରଦ୍ଧାଳୁଙ୍କ ପ୍ରବଳ ଭିଡ଼ ଜମିବ। ମହାସମାରୋହରେ ପାଳିତ ହେବାକୁ ଥିବା ଏହି ଉତ୍ସବ ସମୟରେ ଯଦି କୌଣସି ଅଘଟଣ ଘଟେ, ତେବେ ଏଥିପାଇଁ ବିଦ୍ୟୁତ୍ ବିଭାଗ ସମ୍ପୂର୍ଣ୍ଣ ଦାୟୀ ରହିବ ବୋଲି ଗ୍ରାମବାସୀ ଚେତାବନୀ ଦେଇଛନ୍ତି। ଦୁଃଖର ବିଷୟ, ଅତି ନିକଟରେ ବିଦ୍ୟୁତ୍ ବିଭାଗର କାର୍ଯ୍ୟାଳୟ ଥିଲେ ମଧ୍ୟ କର୍ତ୍ତୃପକ୍ଷ ଏଥିପ୍ରତି ସମ୍ପୂର୍ଣ୍ଣ ଆଖି ବୁଜି ଦେଇଛନ୍ତି। ଗ୍ରାମବାସୀଙ୍କ ପକ୍ଷରୁଅନଲାଇନ ମାଧ୍ୟମରେ ବିଭାଗୀୟ କର୍ତ୍ତୃପକ୍ଷ ଙ୍କୁ ଜଣାଇ ସାରିଥିଲେ ହେଁ, ଏପର୍ଯ୍ୟନ୍ତ କୌଣସି ସମାଧାନ ହୋଇନାହିଁ। ବିଭାଗର ଏହି ଚରମ ଅବହେଳାକୁ ନେଇ ଗ୍ରାମବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ଗ୍ରାମବାସୀ ସ୍ପଷ୍ଟ କରିଛନ୍ତି ଯେ, ଯଦି ହନୁମାନ ଜୟନ୍ତୀ ପୂର୍ବରୁ ଏହି ବିଜୁଳି ଖୁଣ୍ଟକୁ ସଜାଡ଼ିବା ସହ ବିପଦମୁକ୍ତ କରାନଯାଏ, ତେବେ ସେମାନେ ବାଧ୍ୟ ହୋଇ ବିଦ୍ୟୁତ୍ ବିଭାଗ କାର୍ଯ୍ୟାଳୟରେ ତାଲା ପକାଇବା ସହ କାମ ବନ୍ଦ କରିବେ। ତେଣୁ ପରିସ୍ଥିତିକୁ ଦୃଷ୍ଟିରେ ରଖି ତୁରନ୍ତ ପଦକ୍ଷେପ ନେବାକୁ ଗ୍ରାମବାସୀଙ୍କ ପକ୍ଷରୁ ଦାବି ହେଉଛି।