04-Mar-2026

ବଲାଙ୍ଗୀର(ପ୍ରେରଣା ଖବର): ବଲାଙ୍ଗୀର ସହରର ମଧ୍ୟ ଭାଗରେ ଥିବା ରାଜାରାଜୁଡା ଅମଳର ପୂରାତନ ଜଳାଶୟ ରାଣୀ ବନ୍ଧର ସୁରକ୍ଷା, ପୁନଃରୁଦ୍ଧାର ଓ ଏହାର ସୌନ୍ଦର୍ଯ୍ୟକରଣ ପାଇଁ ବଲାଙ୍ଗୀର ମୁନସିପାଲିଟି ଅନ୍ତର୍ଗତ ୱାର୍ଡ ନମ୍ବର ୧୩, ୧୪, ୧୫ ଓ ୧୬ର ଅଧିବାସୀ ଓ ସଚେତନ ନାଗରିକ ମାନଙ୍କୁ ନେଇ ଏକ ବୈଠକ ଟିକ୍ରାପଡା ରାମମନ୍ଦିିର ପରିସରରେ ଅନୁଷ୍ଠିତ ହୋଇଥିଲା। ଏହି ବନ୍ଧର ପୁନଃରୁଦ୍ଧାର ପାଇଁ ସରକାରଙ୍କ ତରଫରୁ  ପୁଣି ଆସିଥିବା ୩୫ଲକ୍ଷ ଟଙ୍କାର ଅନୁଦାନର କିପରି ସଠିକ ବିନିଯୋଗ ହୋଇପାରିବ ସେ ନେଇ ବିଭିନ୍ନ ଗଠନମୂଳକ ପ୍ରସ୍ତାବ ଦିଆଯାଇଥିଲା । ରାଣୀ ବନ୍ଧ ସୁରକ୍ଷା କମିଟିର ଆବାହକ ତଥା ବଲାଙ୍ଗୀର ମୁନିସିପାଲିଟିର ପୂର୍ବତନ ଚ୍ୟାରମେନ୍ ପ୍ରଦୀପ ସାହୁଙ୍କ ଅଧ୍ୟକ୍ଷତାରେ ଅନୁିଷ୍ଠିତ ଏହି ବୈଠକରେ ରାଣୀବନ୍ଧ ତାର ପୂର୍ବ ସୌନ୍ଦର୍ଯ୍ୟ କିପରି ଫେରିପାଇବ ସେ ନେଇ ବିଭିନ୍ନ ପ୍ରସ୍ତାବ ଦିଆଯାଇଥିଲା । ଏକଦା ଏହି ଜଳାଶୟର ପାଣିକୁ ଲୋକେ ପାନୀୟ ଜଳ ଭାବରେ ବ୍ୟବହାର କରୁଥିଲେ । ବଲାଙ୍ଗୀର ସହରର ୧୬ଟି ଜଳାଶୟର ପାଣି ପରଷ୍ପର ସହିତ ସଂଯୋଗୀକରଣ ଥିବା ଯୋଗୁଁ ଜଳାଶୟ ଗୁଡିକର ପାଣି ବର୍ଷ ତମାମ ନିର୍ମଳ ରହୁଥିଲା । ଏବେ ଜନସଂଖ୍ୟା ବୃଦ୍ଧି ସହ କ୍ରମାଗତ ଭାବରେ ଜବରଦଖଲ ଓ ସ୍ଥାନୀୟ ଲୋକଙ୍କ ସଚେତନତାର ଅଭାବ ଯୋଗୁଁ ଏହି ବନ୍ଧର ପାଣି ପ୍ରଦୂଷିତ ହେବାରେ ଲାଗିଛି । ପାଖରେ ଦୈନିକ ବଜାର ରହିଥିବାରୁ ଲୋକଙ୍କ ଭିଡ ଓ ପନିପାରିବାର ମଇଳା ଅବର୍ଜନା ଏହି ବନ୍ଧକୁ ପ୍ରଦୂଷିତ କରିଦେଇଛି । ପୂର୍ବରୁ ମଧ୍ୟ ରାଣୀ ବନ୍ଧର ସୌନ୍ଦର୍ଯ୍ୟକରଣ ପାଇଁ ଲକ୍ଷାଧିକ ଟଙ୍କାର ଅନୁଦାନ ଆସିଛି କିନ୍ତୁ ସଂପୃକ୍ତ ଠିକାଦାର  ଏବଂ ପ୍ରଶାସନର ଉଦାସୀନତା ମନୋଭାବ ଯୋଗୁଁ ଟଙ୍କା ବାଟମାରଣା ହେବା ସହ ଅତି ନିମ୍ନମାନର କାମ ହୋଇଥିବା ବୈଠକରେ ଅଭିଯୋଗ ହୋଇଥିଲା । ତେବେ ବର୍ତ୍ତମନର ବନ୍ଧର ସୌନ୍ଦର୍ଯ୍ୟକରଣ ପାଇଁ ଆସିଥିବା ଅନୁଦାନ ଯେପରି ବାଟମାରଣା ନହୋଇ ବନ୍ଧର ପୁନଃରୁଦ୍ଧର ପାଇଁ ଖର୍ଚ୍ଚ ହେବ ସେ ନେଇ ଅଣ୍ଟା ଭିଡିଛି ରାଣୀ ବନ୍ଧ ସୁରକ୍ଷା କମିଟି । ରାଣୀ ବନ୍ଧର ସୁରକ୍ଷା ପାଇଁ ଦରକାର ପଡିଲେ ଏକ ଷ୍ଟିୟରିଂ କମିଟି ଗଠନ କରାଯିବ । ଏଥିସହ ଆନ୍ଦୋଳନକୁ ବ୍ୟାପକ କରାଯାଇ ମୁନିସିପାଲିଟି ଘେରାଓ ମଧ୍ୟ କରାଯିବ ବୋଲି ରାଣୀ ବନ୍ଧର ସୁରକ୍ଷା କମିଟିି ଚେତାବନୀ ଦେଇଛି । ସୁରକ୍ଷା କମିଟି ତରଫରୁ ଅନୁଷ୍ଠିତ ଆଜିର ବୈଠକରେ ଅନ୍ୟ ମାନଙ୍କ ମଧ୍ୟରେ ଶିକ୍ଷାବିତ୍ ମନୋରଂଜନ ସାହୁ, ଶିବ ରଥ, ନୀଳମଣି ମିଶ୍ର, ଗୋପବନ୍ଧୁ ପୁରୋହିତ, ଜିଲ୍ଲା ଓକିଲ ସଂଘର ସଭାପତି ବାସୁଦେବ ରଥ, ଆଇନଜୀବୀ ଭବାନୀ ଶଙ୍କର ଶତପଥୀ, ବିଜେଡି ନେତା ବିଧୂଭୂଷଣ ତ୍ରିପାଠୀ, ସମାଜସେବୀ ଭଗବାନ ବଗର୍ତ୍ତୀ, ନାଗରିକ କମିଟିର ସଂପାଦକ ମଧୂସୂଦନ ନାୟକ,ପ୍ରକାଶ ନେପାକ ଓ ଅନ୍ୟ ମାନେ ଆଲୋଚନାରେ ଅଂଶଗ୍ରହଣ କରି ବିଭିନ୍ନ ପ୍ରସ୍ତାବ ଦେଇଥିଲେ ।