21-Feb-2026

ବଲାଙ୍ଗିର(ପ୍ରେରଣା ଖବର): ଶୁକ୍ରବାର ଦିନ ମୁଖ୍ୟମନ୍ତ୍ରୀ ମୋହନଚରଣ ମାଝୀ ରାଜ୍ୟର ବଜେଟ ଉପସ୍ଥାପନ କରିଛନ୍ତି । ଏଥିରେ ବଲାଙ୍ଗୀର ଜିଲ୍ଲାରେ ଏକ ସରକାରୀ ଇଞ୍ଜିନୟରିଂ କଲେଜ ଓ ଏକ କୃଷିମହାବିଦ୍ୟାଳୟ ସ୍ଥାପନ ସହ ସୁବର୍ଣ୍ଣପୁର ଜିଲ୍ଲାରେ ଏକ ମତ୍ସ୍ୟ ମହାବିଦ୍ୟାଳୟ ସ୍ଥାପନ କରିବାକୁ ଘୋଷଣା କରାଯାଇଛି । ଶାସକ ବିଜେପିଦଳ ଏହାକୁ ନେଇ ଉତଫୁଲ୍ଲିତ ହୋଇପଡିଥିବା ବେଳେ କିନ୍ତୁ ଜନସାଧାରଣରେ ସେତେଟା ଉତ୍ସାହ ଦେଖାଯାଉନାହିଁ । ବଲାଙ୍ଗୀର ହେଉଛି ଏକ ପୁରୁଣା ଜିଲ୍ଲା ଓ ଜିଲ୍ଲାରେ ବରିଷ୍ଠ ନେତୃବୃନ୍ଦ ଥାଉଥାଉ ଏବେ ସାମାନ୍ୟ ଦୁଇଟି ଅନୁଷ୍ଠାନ ଦେଇ ଭୁତାଇଦେଇଥିବା ଆଲୋଚନାର ବିଷୟ ହୋଇଛି । ବଲାଙ୍ଗୀର ଜିଲ୍ଲାବାସୀ ପୂର୍ବରୁ ଅନେକବର୍ଷ ହେଲା ବଲାଙ୍ଗୀରରେ କୃଷିବିଶ୍ୱବିଦ୍ୟାଳୟ ଓ ଆୟୁଷ ବିଶ୍ୱବିଦ୍ୟାଳୟ ସ୍ଥାପନ କରିବାକୁ ଦାବି କରି  ଆସୁଛନ୍ତି । କିନ୍ତୁ ସେଥିରେ ବଲାଙ୍ଗୀରବାସୀଙ୍କୁ ନୀରାଶ ହେବାକୁ ପଡିଛି । ଏବେ ଇଞ୍ଜିନିୟରିଂ କଲେଜର ଚାହିଦା କମୁଥିବା ବେଳେ ଏଭଳି ଏକ ଅନୁଷ୍ଠାନ ଦେଇ ବଲାଙ୍ଗୀରବାସୀଙ୍କୁ ଲଲିପପ ଧରାଇ ଦିଆଯାଇଛି ବୋଲି ଚାରିଆଡେ ଚର୍ଚ୍ଚା ହେଉଛି । ବଲାଙ୍ଗୀରରେ ପୂର୍ବରୁ ଏକ ସରକାରୀ ଆଇଟିଆଇ,ପଲିଟେକ୍ନୀକ ଡିପ୍ଲୋମା କଲେଜ ଥିବା ବେଳେ ଏବେ ଏକ ଇଞ୍ଜିନିୟରିଂ କଲେଜ ଦିଆଯାଇଛି । ପଲିଟେକ୍ନିକ କଲେଜକୁ ଡିଗ୍ରୀ ଇଞ୍ଜିନିୟରିଂ କରାଯିବ ବୋଲି କୁହାଯାଉଛି । ବୈଷୟିକ ଶିକ୍ଷା କ୍ଷେତ୍ରରେ ଏହା ବଲାଙ୍ଗୀରକୁ ଉନ୍ନତ କରିବ ବୋଲି ଶାସକଦଳ ସୋସିଅଅଲ ମିଡିଆରେ ଆଲୋଚନା କରୁଛନ୍ତି । କିନ୍ତୁ ସେପଟେ ରାଜ୍ୟରେ ଇଞ୍ଜିନିୟରିଂ କଲେଜମାନଙ୍କରେ ଛାତ୍ରଛାତ୍ରୀ ଅଭାବରୁ ସିଟ ଖାଲି ପଡୁଛି । ଛାତ୍ରଛାତ୍ରୀଙ୍କ ଜବପ୍ଲେସମେଣ୍ଟ ଅଭାବରୁ ସେମାନେ ଇଞ୍ଜିନିୟରିଂ ପାଠ ପ୍ରତି ବିମୁଖ ରହୁଛନ୍ତି । ତେଣୁ ଏବେ ଇଞ୍ଜିନିୟରିଂ କଲେଜ ଯେ,କେତେ ସଫଳ ହେବ ତାହା ସମୟ କହିବ ବୋଲି କିଛି ଲୋକ ଆଲୋଚନା କରୁଛନ୍ତି । ସେପଟେ ଗତ ୨୦୧୫ ମସିହାରୁ ବଲାଙ୍ଗୀର ଜିଲ୍ଲାରେ କୃଷି ବିଶ୍ୱବିଦ୍ୟାଳୟ ସ୍ଥାପନ ଦାବି ହୋଇ ଆସୁଥିବା ବେଳେ ଏବେ ସରକାର କେବଳ ଏକ କୃଷିମହାବିଦ୍ୟାଳୟ ଦେଇଛନ୍ତି । ବିଶ୍ୱବିଦ୍ୟାଳୟ ମାଗିଥିବା ବେଳେ ମହାବିଦ୍ୟାଳୟ ଦିଆଯାଇଛି । ଏହାକୁ ନେଇ ବଲାଙ୍ଗୀରବାସୀଙ୍କ ମନରେ ନୀରାଶା ଦେଖାଦେଇଛି । ବଲାଙ୍ଗୀରରେ ରାଜୁଡା ଅମଳରୁ କୃଷିଗବେଷଣାକେନ୍ଦ୍ର ଥିବା ସତ୍ୱେ ସରକାରମାନେ ବଲାଙ୍ଗୀର ଜିଲ୍ଲାକୁ ଗୁରୁତ୍ୱ ଦେଇନାହାଁନ୍ତି । ଏବେ ରାଜ୍ୟରେ ସରକାର ବଦଳିବା ପରେ ମଧ୍ୟ ଏଥିରେ କୌଣସି ପରିବର୍ତ୍ତନ ଆସିନାହିଁ । ଠିକ ସେହିପରି ଗତ ୫୦ବର୍ହ ହେଲା ବଲାଙ୍ଗୀରରେ ଏକ ଆୟୁର୍ବେଦ ମହାବିଦ୍ୟାଳୟ ଚାଲୁରହିଛି । ହଜାର ହଜାର ଆୟୁର୍ବେଦଚିକିତ୍ସକ ବାହାର କରି ରାଜ୍ୟ ତଥା ରାଜ୍ୟ ବାହାରେ ନାମକରା ଡାକ୍ତର ନିଯୁକ୍ତ ହୋଇଛନ୍ତି । ଜିଲ୍ଲାର ବିଭିନ୍ନ ପାହାଡ ପର୍ବତରେ ଔଷଧିୟ ବୃକ୍ଷଲତା,ଗୁଲ୍ମ ରହିଛି । ଏହାର ଗବେଷଣା ତଥା ଉଚ୍ଚଶିକ୍ଷା ପାଇଁ ବଲାଙ୍ଗୀରରେ ଏକ ଆୟୁଷ ବିଶ୍ୱବିଦ୍ୟାଳୟ ସ୍ଥାପନ ପାଇଁ ଦାବି ହୋଇ ଆସୁଛି । ବଲାଙ୍ଗୀର ଆୟୁର୍ବେଦ ମହାବିଦ୍ୟାଳୟର ୫୦ବର୍ଷ ପୂର୍ତ୍ତିରେ ସୁବର୍ଣ୍ଣଜୟନ୍ତି ଅବସରରେ  ଏଠାରେ  ଏକ ଆୟୁଷ ବିଶ୍ୱବିଦ୍ୟାଳୟ ସ୍ଥାପିତ ହେବ ବୋଲି ଆଶା କରାଯାଉଥିଲା । କିନ୍ତୁ ତାହା ମଧ୍ୟ ହେଲା ନାହିଁ । ସେପଟେ ବଲାଙ୍ଗୀର ଲୋକସଭା ନିର୍ବାଚନମଣ୍ଡଳି ଅନ୍ତର୍ଗତ ସୁବର୍ଣ୍ଣପୁରରେ ଆବଶ୍ୟକ ଭିତ୍ତିଭୂମୀ ରହିଥିବାରୁ ମତ୍ସ୍ୟ ମହାବିଦ୍ୟାଳୟ ସ୍ଥାପନ ଘୋଷଣାକୁ ଜନସାଧାରଣ ସ୍ୱାଗତ କରିଛନ୍ତି । ଏହି ତିନୋଟି ପ୍ରକଲ୍ପ ନିଶ୍ଚୟ ଏହି ଅଞ୍ଚଳର ଅର୍ଥନୈତିକ ଉନ୍ନତିରେ ସହାୟକ ହେବ ବୋଲି ଆକଳନ କରାଯାଉଛି ।