21-Feb-2026

କାଲିମେଳା(ସନ୍ତୋଷ କୁମାର ପଣ୍ଡା): ମାଲକାନଗିରି ଜିଲ୍ଲାର ଏମଭି-୭୯ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ର (ପିଏଚସି)ରେ ଆଜି ଅତ୍ୟାଧୁନିକ ସୁବିଧାସମ୍ପନ୍ନ ନୂତନ ୧୦୮ ଆମ୍ବୁଲାନ୍ସ ସେବାର ଶୁଭାରମ୍ଭ ହୋଇଛି। ଏହି ନୂତନ ଆମ୍ବୁଲାନ୍ସ ପହଞ୍ଚିବା ସହିତ ଦୂରଗାମୀ ଅଞ୍ଚଳର ଆପତ୍କାଳୀନ ସ୍ୱାସ୍ଥ୍ୟସେବାରେ ନୂଆ ଗତି ଆସିବ ବୋଲି ଆଶା କରାଯାଉଛି।ପୂର୍ବରୁ ଏହି କେନ୍ଦ୍ରରେ ଚାଲୁଥିବା ଆମ୍ବୁଲାନ୍ସଟି ଦୀର୍ଘଦିନ ଧରି ପୁରୁଣା ଓ ବିକଳ ଅବସ୍ଥାରେ ଥିବାରୁ ଆପତ୍କାଳୀନ ରୋଗୀଙ୍କୁ ସମୟମତେ ହସ୍ପିଟାଲରେ ପହଞ୍ଚାଇବାରେ ବାଧା ସୃଷ୍ଟି ହେଉଥିଲା। କେତେବେଳେ ଯାନଟିକୁ ଠେଲି ଚାଲୁ କରିବାକୁ ପଡୁଥିବା ଘଟଣା ମଧ୍ୟ ଦେଖାଯାଇଥିଲା। ଏବେ ନୂତନ ଆମ୍ବୁଲାନ୍ସର ଆଗମନ ସହିତ ଅଞ୍ଚଳବାସୀଙ୍କ ମଧ୍ୟରେ ଆନନ୍ଦର ଲହରୀ ଖେଳିଯାଇଛି। ପୂଜାର୍ଚ୍ଚନା ପରେ ଏହାକୁ ରୋଗୀ ସେବା ଉଦ୍ଦେଶ୍ୟରେ ଲୋକାର୍ପିତ କରାଯାଇଛି।ଏହି ନୂତନ ୧୦୮ ଆମ୍ବୁଲାନ୍ସରେ ଇମରଜେନ୍ସି ମେଡିକାଲ ଟେକ୍ନିସିଆନ (ଇଏମଟି) ଭାବେ ଇନ୍ଦ୍ରଜିତ ସରକାର ଓ ଅମରେଶ ମଣ୍ଡଳ, ପାଇଲଟ୍ ଭାବେ କାନାଇ ବାଙ୍ଗାଲ ଓ ରାହୁଲ ବଚାଦ, ଏବଂ ହେଲ୍ପର ଭାବେ ଅଶ୍ୱିନୀ ବାଙ୍ଗାଲ ଓ ତୁସାର ସରଦାର କାର୍ଯ୍ୟରତ ରହିବେ। ସମସ୍ତେ ଦୀର୍ଘବର୍ଷର ଅଭିଜ୍ଞତା ସହିତ ଆମ୍ବୁଲାନ୍ସ ସେବାରେ ଜଡିତ ରହିଛନ୍ତି ଏବଂ ଅଞ୍ଚଳରେ ନିରନ୍ତର ଆପତ୍କାଳୀନ ସେବା ପ୍ରଦାନ କରିବାରେ ପ୍ରତିବଦ୍ଧ।ଏମଭି-୭୯ ପିଏଚସିର ଚିକିତ୍ସକ ଡାକ୍ତର ପ୍ରସନଜିତ ରାୟ କହିଛନ୍ତି, "ନୂତନ ଆମ୍ବୁଲାନ୍ସର ଯୋଗଦାନ ସହିତ ଆପତ୍କାଳୀନ ସ୍ୱାସ୍ଥ୍ୟସେବା ଅଧିକ ଦୃଢ ଓ କାର୍ଯ୍ୟକ୍ଷମ ହେବ। ଦୂରଦୂରାନ୍ତ ଅଞ୍ଚଳର ରୋଗୀଙ୍କୁ ସମୟମତେ ହସ୍ପିଟାଲରେ ପହଞ୍ଚାଇବାରେ ଏହା ଏକ ବରଦାନ ସାବ୍ୟସ୍ତ ହେବ।" ଏହି ନୂତନ ସେବାର ଆରମ୍ଭ ସହିତ ଏମଭି-୭୯ ଓ ପାଶ୍ୱର୍ବର୍ତ୍ତୀ ଅଞ୍ଚଳର ସ୍ୱାସ୍ଥ୍ୟ ବ୍ୟବସ୍ଥାରେ ନୂଆ ଉନ୍ନତିର ଆଶା ଜାଗ୍ରତ ହୋଇଛି। ଏହା ସରକାରୀ ସ୍ୱାସ୍ଥ୍ୟ ଯୋଜନାର ଏକ ଉଦାହରଣ ଭାବେ ପରିଗଣିତ ହେବ।