04-Feb-2021

ସାଲେପୁର, (ଦୀପକ କୁମାର  ଷଡଙ୍ଗୀ): ସ୍ଵତନ୍ତ୍ର  ଉତ୍କଳ ପ୍ରଦେଶ ଗଠନର କର୍ଣ୍ଣଧାର ଉତ୍କଳ ଗୌରବ ମଧୁସୂଦନ ଦାସଙ୍କ ଆଜି ହେଉଛି ୮୭ ତମ ଶ୍ରାଦ୍ଧ ବାର୍ଷିକ। କଟକ ଜିଲ୍ଲା ସଲେପୁର ବ୍ଲକ ଅନ୍ତର୍ଗତ ସତ୍ୟଭାମପୁର ଗ୍ରାମରେ ୧୮୪୮ମସିହା ଏପ୍ରିଲ ୨୮ ତାରିଖରେ ମଧୁବାବୁ ଜନ୍ମ ଗ୍ରହଣ କରିଥିଲେ।ତାଙ୍କ ପିତାଙ୍କ ନାମ ଥିଲା ଚୌଧୁରୀ ରଘୁନାଥ ଦାସ ଓ ମାତାଙ୍କ ନାମ ପାର୍ବତୀ ଦେବୀ। ସେ ଖ୍ରୀଷ୍ଟ ଧର୍ମ ଗ୍ରହଣ କରିଥିଲେ। ମଧୁ ବାବୁଙ୍କ ପାଠପଢା ଗାଁ ଚାଟଶାଳୀରୁ ଆରମ୍ଭ ହୋଇଥିଲା।ତାପରେ କଲିକତା ବିଶ୍ୱବିଦ୍ୟାଳୟରେ ସେ ଉଚ୍ଚ ଶିକ୍ଷା ଲାଭ କରିଥିଲେ। ଓଡ଼ିଶାର ଲୋକ ମାନଙ୍କୁ ଖୁବ ଭଲ ପାଉଥିଲେ । ଓଡ଼ିଆ ଜାତି ଓ ଓଡ଼ିଆ ଭାଷାକୁ ସ୍ଵତନ୍ତ୍ର ମର୍ଯ୍ୟାଦା ପ୍ରଦାନ ନିମନ୍ତେ ତାଙ୍କର ଥିଲା ଅଦମ୍ୟ ପ୍ରଚେଷ୍ଟା । ମଧୁ ବାବୁ ଥିଲେ ପ୍ରଥମ ବାରିଷ୍ଟର ଓ ପ୍ରଥମ ବିଲତ ଯାତ୍ରୀ।ଓଡିଶାର ଲୋକ ମାନଙ୍କୁ ଉଚିତ ନ୍ୟାୟ ପ୍ରଦାନ କରିବାରେ ସତତ ଚେଷ୍ଟିତ ଥିଲେ। ଆଜି ବି ମନେପଡେ ତାଙ୍କର ହୃଦୟସ୍ପର୍ଶୀ କବିତା  ପଂକ୍ତି  'ଜାତିନନ୍ଦି ଘୋଷ ଚଳିବକି ଭାଇ ,ସ୍ୱାର୍ଥ କୁ ସାରଥୀ କଲେ ,ଚଳେ କିରେ  ଗାଡି ଦାନାର ତୋବଡା ଘୋଡା ମୁହେଁ ବନ୍ଧା ଥିଲେ' । ପ୍ରତିଟି ଓଡ଼ିଆ ପ୍ରାଣରେ ସ୍ପଦନ ସୃଷ୍ଟି କରିଥାଏ ଏହି କବିତା । ବହୁମଧୁ ପ୍ରେମି ସାହିତ୍ୟିକ ଓ  ସଂସ୍କୃତିକ ଅନୁଷ୍ଠାନର କର୍ମକର୍ତ୍ତାଙ୍କ ସମେତ ଶିକ୍ଷକ ଓ ଅଧ୍ୟାପକ, ବୁଦ୍ଧିଜୀବୀ ଆଜି ଜନ୍ମମାଟି ସତ୍ୟଭାମାପୁରରେ ତାଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ଅର୍ପଣ କରିଥିଲେ। ଆଜି ଜନ୍ମପୀଠରେ ମଧୁ ସ୍ମୃତି କମିଟି ପକ୍ଷରୁ ତାଙ୍କ ସ୍ମୃତି ଉଦ୍ଦେଶ୍ୟରେ ଏକ ସଭା ଅନୁଷ୍ଠିତ ହୋଇଯାଇଛି। କମିଟିର ସଭାପତି ବାସୁଦେବ ରାଉତ ସଭାପତିତ୍ୱରେ ଅନୁଷ୍ଠିତ ଉତ୍ସବରେ ମୁଖ୍ୟବକ୍ତା ଭାବେ ଅକ୍ଷୟ କୁମାର ଦାସ, ବରିଷ୍ଠ କବି ନିସିକାନ୍ତ ମିଶ୍ର,ସମ୍ମାନିତ ଅତିଥି ଭାବେ ଧୀରେନ୍ଦ୍ର ବିଶ୍ୱାଳ ଓ ସୁଜିତାଭ ଶତପଥି ପ୍ରମୁଖ ଯୋଗ ଦେଇଥିଲେ l ବିଶ୍ୱରଂଜନ ସାହୁ ଓ ନିରୂପମା ସାମଲ ସଭା ପରିଚାଳନା କରିଥିଲେ।