12-Dec-2025

ବଲାଙ୍ଗୀର(ପ୍ରେରଣା ଖବର): ଜିଲ୍ଲାର ଲୋଇସିଙ୍ଗା ବ୍ଲକ ଅନ୍ତର୍ଗତ ରେଙ୍ଗାଲି ଗ୍ରାମରେ ମେଗା ନିଃଶୁଳ୍କ ସ୍ୱାସ୍ଥ୍ୟ ଶିବିରର ସଫଳ ଆୟୋଜନ ହୋଇ ଯାଇଛି। ଏହି ଶିବିରଟି ବଲାଙ୍ଗିରର ବିଆଇଏମଏସ୍‌ (ବିମ୍ସ) ହସ୍ପିଟାଲ ଏବଂ ଗ୍ରାମବାସୀଙ୍କ ମିଳିତ ପ୍ରୟାସରେ ଆୟୋଜିତ ହୋଇଛି। ଶିବିରର ମୁଖ୍ୟ ଉଦ୍ଦେଶ୍ୟ ଥିଲା ଗ୍ରାମୀଣ ଅଞ୍ଚଳରେ ସ୍ୱାସ୍ଥ୍ୟ ସୁବିଧା ପହଞ୍ଚାଇବା ଏବଂ ଆବଶ୍ୟକତାମୂଳକ ଚିକିତ୍ସା ସେବା ପ୍ରଦାନ କରିବା ।ଶିବିରରେ ରେଙ୍ଗାଲି , କପିଲବହାଲ ବାଗଡୁଙ୍ଗୁରି, ତାଲଯୁରି ଆଦି ଗ୍ରାମରୁ ୩୫୯ ରୁ ଅଧିକ ଗ୍ରାମବାସୀ ପଞ୍ଜୀକରଣ କରି ବିଭିନ୍ନ ପରୀକ୍ଷା କରାଇଲେ । ସେଥିରେ ସାଧାରଣ ଚେକଅପ୍‌, ବ୍ଲଡ୍ ପ୍ରେସର, ସୁଗର ପରୀକ୍ଷା, ଫିଜିଓଥେରାପି ମୂଲ୍ୟାଙ୍କନ ଏବଂ ଆବଶ୍ୟକ ପ୍ରାଥମିକ ଚିକିତ୍ସା ଅନ୍ତର୍ଭୁକ୍ତ ଥିଲା । ସକାଳୁଠୁ ଲୋକମାନେ ଶିବିର ସ୍ଥଳକୁ ପହଞ୍ଚିବା ଆରମ୍ଭ କଲେ ଏବଂ ଡାକ୍ତରୀ ଟୀମ୍‌ ସମସ୍ତ ରୋଗୀଙ୍କୁ ଧୈର୍ଯ୍ୟର ସହିତ ପରୀକ୍ଷା କଲେ ।
ବିଆଇଏମଏସ୍‌ ହସ୍ପିଟାଲ ପକ୍ଷରୁ ଡା. ସୁମିତ ପାଧନ, ଡା. ଦେବେନ୍ଦ୍ର ଦୀପ ଏବଂ ସେମାନଙ୍କ ପାରଦର୍ଶୀ ଡାକ୍ତରୀ ଦଳ ନାନା ରୋଗର ପରୀକ୍ଷା କରି ଆବଶ୍ୟକ ଔଷଧ ଏବଂ ପରାମର୍ଶ ପ୍ରଦାନ କଲେ । ସେପରି, ପ୍ରସିଦ୍ଧ ଫିଜିଓଥେରାପିଷ୍ଟ ଶ୍ରୀ ସୁରେନ୍ଦ୍ର ଭୋଇ ଏବଂ ତାଙ୍କ ଟୀମ୍‌ ମଧ୍ୟ ସକ୍ରିୟଭାବେ ଅଂଶଗ୍ରହଣ କଲେ । ସେମାନେ ହାଡ଼, ପେଶୀ ଏବଂ ସ୍ନାୟୁ ସମସ୍ୟାରେ ପୀଡ଼ିତ ରୋଗୀଙ୍କୁ ବିଶେଷ ପରାମର୍ଶ ଦେବା ସହ ଚିକିତ୍ସା କରି ଥିଲେ।
ଶିବିରକୁ ଆସିଥିବା ରୋଗୀମାନଙ୍କ ମତରେ,  ଏହି ଶିବିର ସେମାନଙ୍କ ପାଇଁ ବହୁତ ଉପଯୋଗୀ ଥିଲା କାରଣ ଗ୍ରାମ ଅଞ୍ଚଳରେ ଏପରି ସେବା ସହଜରେ ମିଳେନାହିଁ । ଅନେକ ବୃଦ୍ଧ ଏବଂ ମହିଳାମାନେ ନିକଟରେ ସ୍ୱାସ୍ଥ୍ୟ ପରୀକ୍ଷା ପାଇପାରି ଆନନ୍ଦ ଏବଂ ସନ୍ତୋଷ ବ୍ୟକ୍ତ କଲେ ।
ଗ୍ରାମବାସୀମାନେ ବିଆଇଏମଏସ୍‌ ହସ୍ପିଟାଲର ସମସ୍ତ ଡାକ୍ତର, ଡାକ୍ତରୀ ଟୀମ୍‌, ଫିଜିଓଥେରାପି ଦଳ ଏବଂ ସମସ୍ତ ସହଯୋଗୀଙ୍କ ପ୍ରତି ଗଭୀର କୃତଜ୍ଞତା ଏବଂ ଆଭାର ବ୍ୟକ୍ତ କରିଛନ୍ତି । ସମସ୍ତେ ଏପରି ସ୍ୱାସ୍ଥ୍ୟ ଶିବିର ଆଗାମୀଦିନରେ ମଧ୍ୟ ନିୟମିତ ଭାବେ ଆୟୋଜନ ହେବା ଆବଶ୍ୟକତା ଉପରେ ଜୋର ଦେଇଛନ୍ତି ।
ଏହି ସଫଳ ଆୟୋଜନ ଦ୍ୱାରା ରେଙ୍ଗାଲୀ ଗ୍ରାମରେ ସ୍ୱାସ୍ଥ୍ୟ ସଚେତନତା ଏବଂ ସାମୁଦାୟିକ ସମ୍ମିଳନର ସୁନ୍ଦର ବାର୍ତ୍ତା ପ୍ରସାରିତ ହୋଇଛି ।