11-Oct-2025

ବଲାଙ୍ଗିର(ପ୍ରେରଣା ଖବର): ନିକଟ ଭବିଷ୍ୟତରେ ଭାରତ ବର୍ଷ ସମଗ୍ର ବିଶ୍ୱ ମାନଚିତ୍ରରେ ଏକ ଯୁବଶକ୍ତିର ଦେଶ ହେବାକୁ ଯାଉଛି। ଯେଉଁଠି ୧୮ରୁ ୩୫ ବର୍ଷ ମଧ୍ୟରେ ବୟସ ରହିଥିବ। ଏହାକୁ ଦୃଷ୍ଟିରେ ରଖି ବଲାଙ୍ଗିର ଜିଲା କୁଲତା ସମାଜ ଯୁବକମାନଙ୍କ ଶୈକ୍ଷିକ, ବୈଦ୍ଧିକ ବିକାଶ ସହ ଏକ ଯୁବଶକ୍ତିର ନେତୃତ୍ୱକୁ ସ୍ୱୀକୃତି ଦେଇଛି। ଯୁବବର୍ଗ ହିଁ ସମାଜର ଭବିଷ୍ୟତ, ମେରୁଦଣ୍ଡ। ଏଣୁ ଏଣିକି ବୟସ୍କମାନେ ମାର୍ଗଦର୍ଶନ କରିବେ। ଯୁବବର୍ଗ ସମାଜର ନେତୃତ୍ୱ ନେବେ ବୋଲି ବଲାଙ୍ଗିର ସଦର ବ୍ଲକ ଅନ୍ତର୍ଗତ ହର୍ଡାଟାଲ ରଣେଶ୍ୱର ରାମଚଣ୍ଡୀଙ୍କ ପୀଠରେ ମତପ୍ରକାଶ ପାଇଛି।
 ବାବା ବିଶାଶହେ କୁଲତା ସମାଜ ବଲାଙ୍ଗିର ଜିଲା ମୁଖ୍ୟ କେନ୍ଦ୍ର ପକ୍ଷରୁ ବାର୍ଷିକ ଶାରଦୀୟ ପୂଜନୋତ୍ସବ ଓ ବାର୍ଷିକ ସଭା ଜିଲା ସଭାପତି ଇଂ.ବେଲାର ସିଂ ଭୋଇଙ୍କ ସଭାପତିତ୍ୱରେ ଅନୁଷ୍ଠିତ ହୋଇଯାଇଛି। ଜିଲା କୁଲତା ସମାଜର ଯୁବ ସଭାପତି ଉମେଶଚନ୍ଦ୍ର ଗଡ଼ତ୍ୟା, ଡା.ବର୍ଷାରାଣୀ ଭୋଇ, ଯୁବ ଚାଷୀ ଅଜିତ ବିଶ୍ୱାଳ, ପ୍ରଶାସନିକ ଅଧିକାରୀ ଟୁକୁ ପଧାନ, ବିଭୁ କଲ୍ୟାଣ ଗଡ଼ତ୍ୟା ଅତିଥି ଭାବେ ମଞ୍ଚାସୀନ ହୋଇଥିଲେ। ସଭାକୁ ବିଭିନ୍ନ ପର୍ଯ୍ୟାୟରେ ମହେନ୍ଦ୍ର ପଧାନ, ଭକ୍ତବନ୍ଧୁ ବିଶ୍ୱାଳ ଓ ରଘୁନାଥ ସାହୁ ମଞ୍ଚ ପରିଚାଳନା କରିଥିଲେ। ଏହି ଅବସରରେ ଶିକ୍ଷା, କ୍ରୀଡ଼ା, ଚାଷ, ପ୍ରତିଯୋଗିତାମୂଳକ ପରୀକ୍ଷାରେ କୃତିତ୍ୱ ଅର୍ଜନ କରିଥିବା ସମସ୍ତ କୃତୀଙ୍କୁ ମାନପତ୍ର ଓ ଉପଢୌକନ ଦେଇ ସମ୍ବର୍ଦ୍ଧିତ କରାଯାଇଥିଲା। ସମାଜରେ ରହିଥିବା ଅବହେଳିତ ବର୍ଗଙ୍କୁ ମୁଖ୍ୟସ୍ରୋତରେ ସାମିଲ, ଶିକ୍ଷା ଓ ସଂସ୍କୃତିକୁ ଗୁରୁତ୍ୱାରୋପ କରାଯାଇଥିଲା। ଚଳିତ ବର୍ଷ ପ୍ରଥମ କରି ଆୟୋଜିତ ସଭାକୁ ଯୁବବର୍ଗଙ୍କ ସମ୍ମାନାର୍ଥେ ଅର୍ପଣ କରାଯାଇଥିଲା। ବରିଷ୍ଠମାନେ ଏଣିକି ମାର୍ଗଦର୍ଶନ କରି ଯୁବବର୍ଗଙ୍କୁ ସଶକ୍ତ କରିବେ ବୋଲି ସଭାରେ ମତପ୍ରକାଶ ପାଇଥିବା ବେଳେ ଯୁବ କୁଲତା ସମାଜ ନିଜ ଅଧିକାର ପାଇଁ

ଉଲଗୁଲାନ୍‌‌ ଦେଇଥିଲା।
 ଦୀର୍ଘ ୯ ଦିନ ବ୍ୟାପୀ ହର୍ଡାଟାଲ ପୀଠରେ ପରମ୍ପରା ଅନୁଯାୟୀ ପୂଜାର୍ଚ୍ଚନା ହୋଇଥିବା ବେଳେ ପବିତ୍ର ପୂଜନୋତ୍ସବରେ ପାରାୟଣ ଆୟୋଜନ କରାଯାଇଥିଲା। ନୂଆଁପାଲି ଗାଁର ବ୍ରଜେଶ୍ୱରୀ ତୁଲସୀ ରାମାୟଣ ପାରାୟଣ ସଂଘର କଳାକାରମାନେ ବିଭିନ୍ନ ଭୂମିକାରେ ଅବତୀର୍ଣ୍ଣ ହୋଇ ରାମାୟଣ ପ୍ରଦର୍ଶନ କରିଥିଲେ। ଉଦଯାପନୀ ଉତ୍ସବରେ ଜିଲାର ବିଭିନ୍ନ ଆଞ୍ଚଳିକ କେନ୍ଦ୍ରରୁ ଶହ ଶହ ସଂଖ୍ୟାରେ କୁଲତା ଜାତିର ପୁରୁଷ ଓ ମହିଳା ଏଥିରେ ସାମିଲ ହୋଇଥିଲେ। ହର୍ଡାଟାଲ କେନ୍ଦ୍ରର ସମସ୍ତ ସଦସ୍ୟ/ସଦସ୍ୟା ସକ୍ରିୟ ଉପସ୍ଥିତ ରହି ସହଯୋଗ କରିଥିଲେ।